Әбейҙәр һәм бабайҙар
Ғүмер буйы теләне:
Һуғыш ҡына сыҡмаһын,
Һуғыш ҡына ҡупмаһын!..
Һуғыш – үлем, мең ғазап,
Йәнеңде ҡыйыр салғы,
Утта янған уландар
Халыҡҡа бөтмәҫ ҡайғы.
Ут менән шаярмайҙар,
Яу менән уйнамайҙар.
Яу әҙәмде имләмәй,
Әҙәмде тик ғәрипләй.
Байҙар мәңге тартыша,
Батшаның яуы тынмай.
Ҡан көҫәгән бүреләр
Һис ҡасан ҡанға туймай.
Ҡоторған эт илереп,
Яҡты айға һикерә,
Шашыныуҙан тилереп,
Үҙ ояһын кимерә.
Яһилдың телендә – май,
Күңелендә – ҡан ҡойош.
Һуғыш илде ҡатыра,
Мең ирҙе ҡыла байғош.
Юлбаҫар үә илбаҫар
Икеһе бер ҡамырҙан.
Ҡатил, Шүлгән – яһилдар,
Ағыу аҡҡан тамырҙан.
Һуғыш ҡанды ярата,
Һуғыш ҡорбан ярата,
Һуғыш ҡаза яралта,
Һуғыш йәнде ҡарайта.
Башҡорт тик имен халыҡ,
Теләгәне – аманлыҡ.
Ил һаҡлау тигән – ҙурлыҡ,
Ил баҫыу иһә – хурлыҡ!..
Башҡорт – теҙ сүкмәҫ халыҡ...
Присоединяйтесь к ОК, чтобы посмотреть больше фото, видео и найти новых друзей.
Комментарии 4