""" Машшат маш умрэ ""

Ай умрэ ди фамэ бевафойат,
Ниғӯғ му гап ху савэ қозэ.
Машам башанд хуба балойат,
Ҳар цонд ца кини талғуза'бозэ.
Гарм'ам ту навинт доим шитойат,
Бурша ҷинов маш дамти жозэ.
Чиз дарthат ғамард ку ло давойат,
Дис донд'та ба қадри маштэ нозэ.
Чудаммэ ху ҷон ҳар ту баҷойат,
Ту ку чи тананд ху меҳр'ат розэ.
Ревҷам ту ғаманд фук бенавойат,
Бе мулк ку ло чи тахт нийозэ.
Вехчам чизон ту хез гадойат,
Чисам ку ца вахт ху thуст дарозэ.
То ғал ца ястам баланд баҳойат,
Бе даф'ат рабоб машард нивозэ.
Ширинэ винам турд донд равойат,
Маш цем ғацаканд цих цих пийозэ.
Фарруххта наловд туйец хатойат,
Гандайе му чуд ту бад маҷозэ.
Мам соз'занд ху бад вазм ту хойат
Ат уз ғал ху гуноҳ тажум тарозэ.
Фаррух Бозор...2005...