Предыдущая публикация
ТОН ТУИТЬ...
Килангсотано ниле часст малава. Килангось кувака.Текень кондямо кувака урныцянть морозо. Саран он - Игнатонь буе - Саран ош. Те вейке ардома ёнкс-пе. Омбоцесь: Саран ош - Вирь Тавлавеле - Давидвеле, конатне Кочкуронь буесэть (Мордовия Республика). Зяро те лиси асфальтсэ валакавтозь вайгельпесэ? Яла мерить - байтяк.
Якинек ниле цёрат - Туркичень Сандра, Калаганонь Керяз, мон ды... - Игнатонь буев Пиргуж Инязоронь калмамо. Те ульнесь те иень умарьковонь 23 чистэ. Лембе-валдосо лексиця кизэнь шкава. Певтеме ванькс валдо-сэнь менельсэнть, алонзо, мезеяк эзь ледстне куломадо..
Ускицянок ветицязо Туркичень Сандра. Те истя эрязасто, вармакс ардыця айгорось сонзэ. Сандра ялаксом - паро, домкасто ды келейстэ арсиця ходожник. Чувтосто керсевкс скульптуранзо содасызь ламонь-ламо таркава Россиясо ды омбо масторсо. Ялгаксчинек цёранть марто ушодовсь ды эскели ве киява кеменде ламо иеть. Эрямо тарказо "ветицянок" Пенза ёнксонь Шемышеень буе. Мон 65 иеде икеле, маряви теке улкоть, прядокшные тесэ, Пензасо, агрономокс улемань академиям. Секс, лиятнень коряс, ёнксось тень содавикс. Теяк, кадык аламнеде, теи минек седе малавиксэкс, седе куроксто вейкенек-вейкенек чарькодиццякс.
Сон ютась шкатнестэ марякшнизе вайгелем, сееремам ломантненень. Маримем ды путынзе валон оймензэ ёжос. Поладынзе мелявксон-тевен, Ансяк покштояк покш, виевдеяк-виев малавгавтыцякс, кедте-кедьс кундавтыцякс , ульнесь ды ули эрзянь келесь. Сонзэ орманзо-тарвонзо, сонзэ сэредькстэ пешксе кувсеманзо а мари ансяк се, кинь пилензэ потомдазь, кода Дууболго Пичаень, солавтозь штасо. Маринек минь сынст. Маринь мон, маринзе пенза ёнксонь цёрась, Сандра.
Ниле часонь перть экшелинь од, иень коряс, ялгань марто Эрьзянь келень ванькс, лембе ведь эрькесэ. Кодамо сон мазый, кодат вечкевикст чольдердиця гайтензэ!. Кодат аёвтавикст тюсонзо! Эрьва валстонть лиси, маряви, валдо, мезе-бути вечкевикс, чевте. Совсинек, арсеви, кортамонь кувтатнес вейкень пес. Эзинек стувтне варштамс ютазентень, велявтнинек неень, молиця шкантень. Кортнинек ломаненть икелень ды неень шкань ёжодонзо, пиштинек, мезес пачкоди, кодамокс тееви сыця шкатнестэ.
Вейкень-вейкень чарькодезь, кортамозонок ваясть аволь вейке сядо вайгельпеть. Тень эзь редявга, кода урныгаенэк нерезэ нерьгставсь келей, латыне ало кенкшс: "Йовлань Олонь лемсэ этнокудо". Кадовсть удалов Раськень Озксонь ютавтнема буесь, Игнатонь буе, мельганзо Саран ош, пачкодинек Вирь Тавлав.
Лиссинек чевте, тонадовозь таркастонок. Вастымизь, прок од, шумбра цёра, Йовлань Оло. Калаганонь Керяз, Музеень прявтось, панжизе келей кенкшенть ды панжовсь икеленек Мазычинь Мастор! Лиякс ды серьгедеме тешкстэме, кодаяк а мереват. Ламо, ламо авторонь, эрьва кодамо жанрань, темань, покшолмань скульптурат, теке учость минек. Парсте, валанято витнезь кудось-музеесь,кецневти седей. Перьканзо пиже, лугинесь ледстни панжиковдо. Сельметь а саевить перькат сравтовозь мазычистэнть, сонзэ тюстнестэ.
Кода а кецнемс, чачтыцязо те Мазычинь Масторонть - Эрзянь Мастор! Пачкам ютась, икельгам сравтнезенть неезь, лембе, оймень вадяшиця зэхельне. Ламо вийть путсь тенень се, кинь пиштямонзо прядовсть, ккинь калмамо якинек течи, Кшуманцянь Пиргуж инязорось.
Шкась мольсь. Чипаесь кундась тевензэ прядомо. Сандранень ардома ды ардома. Шемышеень буесь Саратов ёнксонть маласо. Сыргинек монь эрямо пизэнь варштамо, невтеме кода-косо эрян-аштян, месэ лексян, Пель часонь ютазь ульнинек монь кедьсэ, пиче вирь чиресэ пиже кудынесэ. Те невак колоньгемень вайкельпеть кадовсть удалов! Стуворэкш эзь лисе. Ансяк стинек экшстэнзэ ялаксон Керязонь кедьсэ. Инжеялгам теие содавиксэкс ним Марюш марто. "Экскурсия ютавтынь таркатнева, косо важодян. Теде верьга, Сандра ялаксом пек капшась. Учось-эзь эйсэнзэ сонзэ Пенза чачома ёнксозо, мезеяк а мерян, аздан, кудосо - учость. Секскак..ведьметнень эрявсь седе курок саемс кедькоморс ды хлыстядемс эйсэст лишменть.
Ванынь мельгат, зярс эзидизь копачаз-кекше сэрей пильге пиже пря пичетне, зярс эить пурда кистэть кершев..
Ванынь мельгат - превсэнь цивтордсть вейке цёрыненть валонзо, конатнень ёвтакшнынзе тензэ покштязо эйкакшпингстэ: "Тон монень, Олёша, а медаль, азё эрямо ломань юткс".
Ютасть аволь аламо иеть. Алексей Максимович Горький, самай се Олёш цёрынесь, сёрмадсь цёранстэнь:
"Тон туить, а балягатне-цецятне, конатнень тон озавтнить, касыть..."
Тетянстэнь, Горкийнень, эрзянтень, цёразо казекшнесь балягат, а тон, Сандра ялаксом, балягань-чахрань кондямо мазый пусмо - валт, мельть, кортамот. Сюконян теть, мельвановикс Сандра ялаксом, истямо кецневтиця казнеть кис карксамга.
Тон туить, а валдось...
Следующая публикация
Нет комментариев