Предыдущая публикация
Эрјинем!!!
Эрте чактардаҥ эмдиге јетире
Элим сӱӱген эрјине малым.
Эр кижини јӱрӱми ӧткӱре
Ээрде јӱктенип келген адым.
Тӱбинеҥ чактардыҥ бӱгӱнге јетире
Тӱӱкиде ады макталган эрјинем.
Тӱбекте таштабай талайлар кечире
Тӱштӱктеҥ Алтайга баатырыс јетирген,
Тӱгенбес быйанду аргымак адым.
Јаман-јакшыны ырымдап сезер
Јаманнаҥ канча айрыган адым.
Јалтанып билбес алып-кезер
Јалынаҥ тудунып учкан канадым.
Јонымныҥ јолыныҥ јорыгы
Јоргодо јымжак чактарла ӧткӧн.
Садыжып јӱрген амыр јӱрӱми
Сайалу чалгаалар ӱстинде ӧткӧн.
Јал-куйругын ажуларда албатым
Јалама болбозо – јаҥданып буулаган.
Јаанадып учурын озоодо јаандарым
Јаҥжыгу этире бистерге артыскан.
Малдыҥ-аштыҥ ортодо эптӱ,
Маҥы, јорыгы јаражы – јылкы.
Маргаанда, ойында баатыр кептӱ
Маҥын кӧргӧндӧ јондо – кыйгы.
Эрјине дегени – эҥ артыгы!
Эрјине малым – учатан канадым!
Эр кижиниҥ јолында тайагы –
Ээртеп салган эрјине адым!!!
Айдыҥбек Тазрашев
Следующая публикация
Комментарии 3