-Я руш ,Гуьлгвез вун вуч гьалар я ву хуьрериз мус хуьквезва,вун лап секиндиз ацукьнава гьаа анра?
Ватцапдай и гафар кlелай зак им вуж хьурай зав рахазвайди лагьана са тlимил гьерекатун акатна.
Номерни заз танишди тушир.
-Вун вуж я,хабар кьун хъувуна за гьакl ятlани.
-Зун ви къунши Магьият.
-Аааа Магьият ам вун яни, ваз зи номер гьинай жагъана ,гьикl ава куьн,кефияр-гьалар,хуьрера вуч хабарар ава?
Ви сагъламвилер хъсанзавани?
-Пис туш чун вири хъсанзава , гадани свас хъфена аяларни галаз,кlвалер ичlи хьайиди хьиз ава, отпускайриз хтана са варз хьана чахъ галаз.
Гила зунни Агъамирзе я кlвале амайди сад-садахъ гелкъвез ава чун.
-Я руш а ви номер за ви балдуздин рушавай къачуна, вун гъуьл иниз рахкурна вуч секиндиз ацукьнава ана,ву мус хуькведайвал я.
-Я Магьият билетар гъиле авайди я сентябрьдин 20-риз акъат хъийида зунни ,гьеле кlвалах ийизва,цlи за кlвалахдилай муьгьлетни са кlус геж хьиз къачунай ,гьаваярни серин хьуй, регьятдиз ялар ягъиз жедайвал,гатун вахт лап чими я анра,сифтедай хьиз дурум гузни жезмач.
-Гьикl ава зи юлдаш анра,аквазвани ваз ам?
Я руш лугьун гьикl ийин ,талагьнани гьикl акъвазин…..
Вуна заз яб це анжах зу вав рахайди садазни чирмир.
-Ви гъуьлуьз ина ашна авай хьтинди я.
-Я чан Магьият ашнаяр вучтинди я,гила са яшариз акъатайла,ам вуч гаф я вуна заз лугьузвайди?
-Вун зи чlалах хьухь къунши акуначиртlа ,ван хьаначиртla за ваз кхьинни ийидачир.
Куьне кьакьан цлар эцигна гьаятда вуч аватlа са акьван регьятдиз сифтедай хьиз аквазвачтlани заз ам рахадай ван къвезва.
Ви юлдашди а жагъунарни чаз вичи ийизвай крар акун тавурай лагьана хкажнавайди я.
Гьатта са сеферда куь чардахдик кьведни ацукьна чаяр хъвадайлани акуна,заз.
Са зу туш акурди муькуь къуншидизни акунва.
Адани вичиз акуна лугьузвай.
Са ваз хьиз лацу чlарар авай дишегьли я.
-Я руш,я Магьият акъваз абур жедай кlвалахар туш эхир къе са яшарив агакьайла,зун адахъ галаз яшамиш жез саки 45-йис я садрани акурди туш заз адай ахьтин крар.
-Вун итимрихъ ягъазвани ,дагъвийрихъ,ваз Джегерханьян акунайни виридаз машгьур пудкъанни цlуд йисалай алатайла жегьил дишегьлидал ашукь хьайи.
Гьакl хьайила чан вах абурухъ ягъамир!
Ви итимни жибинда пул авай ксарикай я.
Заз куь гьаятдай абур сад-садав рахазвай ванерни къвезва:
Сара ша чун салаз фин,гагь ада акъваз зун исятда Дербентдиз фена хуькведа за ваз балугъни гъида ,анжах Сара вун сефил жемир лугьузвай.
Югъ атана адан тlвар я Гуьлгвез ви итимдин мецел алайди, Сара,Сара лугьуз.
-Я руш ам сифте хтай вахтара гьич аватlани чир жедайди тушир,гила лап гуьгьуьлар ачухдиз чахъ галазни рахазва куьчейра гьалтайла.
Са гьафте идалай вилик ,за куьчедал гьалтна жузунар авурла,хъсан я вири Белидждиз физ экъечlайди я зу,Сарадин ем куьтягь хьанва лагьана , сад лагьана вичяй акъатна ееее ,фикир тавуна,вичин гуьгьуьларни лап ачухзавай.
-Килиг къунши, жув килиг зиди ваз акур кар лугьун я,анжах зун маса гуз тахьурай.
Жува чира вири лагьана хкудна Магьията телефон.
Телефон столдал эцигна гагь зак хъуьруьн акатиз,гагьни зи кьилиз рикl тlар жедай фикирар къвезвай.
Нянихъ зенг ийида за адаз,хабар кьада Сара вуж ятlа лагьана жува-жув секинарна ,зу туьквен галай патахъ рекье гьатна.
Вахт лап яргъал физ закни ажугъар акатзавай,гьикьван секинриз жува жуваз сабур гуз алахъайтlани,Магьиятан гафари зу михьиз къарсурнавай.
-Нянин сятдин 8-дар тир .
Голландиядинни Урусатдин арада кьве сятинин тафаватвални авай ,занни къачуна трубка зи юлдашдиз зенг авуна.
Тадиз трубка къачур зи юлдашди на гьикьван зенг ийида ,вуч кlанзава ваз,зу ахварал фенвай лагьана.
- Акъваз-акъваз са шумуд суал гун за ваз ,ахпа ксус лагьана за са кlус къал алаз.
А кlвалевай Сара вуж я?
-Сара я ман зи юлдаш.
Ам ваз гьинай атана?
Кьуна куьчедай гваз хтана ,за кlвализ.
-Вууу вун дели хьанвани я итим,куьчейрай кьаз ,дишегьлияр кlвализ гъиз,къалура кван ам заз?
-Эй,ваз …вуч ава ,ам за гъанвайди я,ксуз тур зав, жувни секиндиз ксус ,лагьана трубка хкудай зи юлдашди зун лап дели авуна.
И йиф заз гьикl акъатнатlани чир хьанач я зи кьилиз татай са пис кlвалахни хьанач.
За гила билетар ва отпускадин йикъар гьикl дегишардатlа ва садазни хабар тавуна хъфена и ченгидин кьилел гьикl цlай твадатlа вири планар кардик кутаз башламишна.
Сифте билетар дегишарна авайдалай са варз вилик кутун патал за мад артухан са кьве виш еврони гун хъувуна ,жуван хуьруьз хъфизвай рекьин билетар къайдада туна,ахпа за кlвалахал зенг авуна.
-Начальник зи планар дегиш хьанва,заз отпуск дегишарна авайдалай са вацран вилик къачуз кlанзава,лагьана хайиш авуна за.
-Им са акьван регьят вахтни туш,исятда отпускайриз физвайбур аялар галай ,жегьил диде-бубаяр я ,хьайи тади кар авани ,вуна вучиз дегишарзава отпуск,суал гана заз чlехида.
-Я чlехиди,зи юлдаш хайи чилел хъфена саки пуд варз тир ,гила начагъ хьанва ,ам ана кьилди ава ,килигдай кас герек я адаз,гьакинай зун тадиз хъфена кlанзава ,мад сеферда минет ийидай ванцелди хабар кьуна за.
-Хьурай ятlа ви гьуьрметдай за дегишарда,ваз кlанзавай вахтунда гуда ваз а кlвалахдилай азад йикъар лагьайла зун лап цаварив агакьна.
Гила заз галкlидай са карни амачир,билетарни гъиле, вахтни дегишарна хвеши хьайи зу киш югъ мус жедатlа лугьуз вил алаз авай.
Я мад зенг авуна юлдашдивай са хабар кьадай къийимни зи чанда амачир,ада лап зи рикle чукlулдин мурз эценавай.
Гена хъсан хьана Магьията заз хабар авуна,тахьайтlа низ чидай ада зу хуькведалди мад вуч кьуьруькар ийидайтlа фикиррик квай зун.
Киш югъни атана акъатна,за заказ авунвай такси вахтунда атана зи кlвалин вилик акъвазнавай.
Са зур сятни хьанач зун ада аэропортдал (Schiphol )агакьарна .Вили лиф хьиз,луварни акъайна акъвазнавай самалетдин вил зал алайди хьиз тир заз,са пуд сятни хьанач зу гила Урусатда авай.
Махачкаладиз хъфизвай самалет мад са 6 сятина вил алаз акъвазна кlанзавай и вахт зи ажугъвиляй акьван яргъал физвай хьи заз гьар са сят са вацрай акъатзавай.
Махачкаладин аэропортдилай такси кьуна рехъ давамар хъийизвай за кlвале сятдин шумудриз жедатlа ва абурун вилик жув
лайихлудаказ гьикl тухудатla лугьуз фикиррик акатзавай.
Таксистди са эхтилат башламишайла я тахьайтlа са суал гайила кьилиз тефиз,за мад сеферда ,куьне вуч лагьанай,лугьуз хабар кьазвай.
Аллагьдиз шукур хьуй гена агакьзавай вахт йифен сятдин 11-дар тир.
Къал-макъал акъатайтlани къуншийриз ван жедач,абур ксанвай секин вахт я фикирзавай за.
Гьа икl вахт гьикl акъатнатlани чир хьанач,куь агакьна, ингье куь кlвал ,за куь сагъ-саламатдиз чкалал кьван хкана гьуьрметлуди,лагьана заз машиндин кьулухъ галай ракlар акъайна таксистди.
-Ам ,шофер рази авуна вичин рекье хтур за (кlвалин варарин ва ракlарин куьлегар зав гвайди тир)
зурзазвай гъилералди тадиз ракlар акъайна кlвализ гьахьна.
Зи юлдаш гьеле ксанвачир ,кlвале экни кузвай.
Цавай аватайди хьиз кlвалин юкьвал акъатай зу акурла,зи юлдаш тадиз ярх хьанвай дивандилай къарагъна кичle хьайи жуьреда заз килигна,вичин вилер тlушуниз башламишна.
-Ву гьинай акъат хъувунвайди я,я тахьайтlа им зи вилерикай карагзавай кар яни векъи ванцелди лагьана ада.
Зу гьинай акъатнавайди ятlа за чирда квез,гагь са кlвализ гагь маса кlвализ гьахьиз виринра эквер ягъна за.
Санайни Сара такурла эхир суал гана.
-Гьинава ви Сара ,катнани ви пул гъиле гьатайла?
-Ваъ,ам гьиниз катда,атlангье креслодал ксанва вичиз лагьана, заз ругъал хьиз креслодал ярх хьанвай рехи кац къалурна.
05.08.2022.
Присоединяйтесь к ОК, чтобы посмотреть больше фото, видео и найти новых друзей.
Комментарии 80
Много,много здоровья!