Сюды не зарасці маёй сцяжыне,
Не існуе ў жыцці умоўны лад.
Як не квітнець па восені ажыне,
Так не вярнуць мінулае назад.
Бракуе мне і спрыту, і здароўя,
Даўно ўжо выплакаў сваю слязу,
Падумаць страшна, колькі ўжо гадоў я
Хадзіў сюды… А зараз во паўзу…
Час не спыніць, а зрэшты, і не трэба,
Няхай ляцяць няўмольныя гады,
Калі пакліча Бог мяне на неба,
Падумаю. А можа, лепш сюды?
Бо што я там, за пазухай у Бога,
Забыўся? І навошта мне той рай?
Да райства не прывыкну я чужога.
А тут – пабачу родны небакрай,
Пабачу вёску, возера, лагчыны,
Шашэйку, што бяжыць далей, каб жыць,
Пачую, як ляскочуць там машыны,
Прыслухаюся, як імжа імжыць.
Парадуюся ліпельскім грымотам,
Зімою з завірухай паскачу,
Ды што там неба, што той рай, ды што там!
Не трэба раю! Я сюды хачу!
Калі стамлюся жыць, здранцвеюць ногі
І сціснуцца маўкліва жаўлакі,
Мяне – дзіця, стамлёнае з дарогі—
Прытуляць на вякі мае бацькі…
Присоединяйтесь к ОК, чтобы посмотреть больше фото, видео и найти новых друзей.
Комментарии 3