Предыдущая публикация
Лидия Филиппова
Ку – ман çĕршыв!
Ку – ман çĕршыв!!! Эп Чăвашра çуралнă!
Чăваш анне сĕчĕпеле вăй илнĕ кунсерен.
Чăваш калаçăвне илтсе ирпе куç уçнă,
Чăваш юрри-юмахĕпе куç хупнă каçсерен.
Ку – ман çĕршыв!!! Кунта эп çунатланнă!
Кунти тĕнче, ентешĕмсем вăй панă пĕчĕкрен.
Çырми-çатри, шыв-шурĕ, сĕм вăрманĕ… -
Тунсăхласан … çара алпах татас килет вĕлтрен.
Ку – ман çĕршыв!!! Кунта эп хăватланнă!
Ют çĕршыва тухса кайсассăн теплерен,
Эп хамăр Атăл-аттепех шав мăнаçланнă,
Шур Шупашкар илемĕпех киленнĕ инçетрен.
Ку – ман çĕршыв!!! Кунта Чапай çуралнă.
Çеçпĕлпеле Элкер камне пĕлет тухан-кĕрен.
Чăваш тĕнчи Бичуринпа Ашмарина кун панă, -
Çак арсене пехиллесе антарнă тейĕн тÿперен.
Ку – ман çĕршыв!!! Раççейĕм чăмăртанă
Пиншер, миллионшар çынна мĕн ĕлĕкрен.
Халăхсене ват Шупашкарăм туслаштарнă, -
Ырă сунса пăхать вĕсем çине иртен-çÿрен.
Ку – ман çĕршыв!!! Эп Чăвашра çуралнă!
Палхар-чăваш пики пулсах вăранăп ирсерен.
Ку – сан çĕршыв! Эс Чăвашра çуралнă!
Йăх-несĕлсен пилне нихçан ан ярăр чĕререн!
Следующая публикация
Комментарии 11