Դեկտեմբերի 18-ը Միգրանտների միջազգային օրն է

Կան մի շարք գործոններ, որոնք արտագնա աշխատանքի մեկնողներին դարձնում են խոցելի ՄԻԱՎ-ի նկատմամբ:
Դրանք են՝
1.միգրանտների շրջանում ցածր է ՄԻԱՎ վարակի կանխարգելման վե­րաբերյալ գիտելիքների գնահատման ցուցանիշ­ը,
2.միգրանտները հիմնականում մեկնում են ՄԻԱՎ վարակի բարձր տարածվա­ծութ­յամբ երկրներ` հատկապես Ռուսաստանի Դաշնություն, որտեղ ռիսկային վարքագծի դրսևոր­ման դեպքում զգալիորեն մեծանում է վարակվելու հավանականությունը,
3.հեռու լինելով ընտանիքներից և մշտական զուգընկերներից` արտագնա աշխա­տանքի մեկնածներից շատերն իրենց ազատագրված են զգում ընտանիքում, ծանոթ­ների միջավայրում նրանց վարքը պայմանավորող սոցիալական նորմերից և ավելի հաճախ են դրսևորում ռիսկային վարքագիծ,
4.արտերկրում միգրանտներին հիմնականում հասանելի չեն լինում բժշկական, այդ թվում՝ ՄԻԱՎ վարա­կին առնչվող ծառայությունները, ՄԻԱՎ վարակի և դրա կանխարգելման ուղի­ների ու միջոցների վերաբերյալ տեղեկատ­վությունը:
Վերջին տարիներին զգալիորեն մեծացել է միգրացիայի գործոնի ազդեցությունը Հայաստանում արձանագրվող ՄԻԱՎ վարակի դեպքերի ընդհանուր թվի վրա։ Այսպես, վերջին 5 տարիների ընթացքում արձանագրված ՄԻԱՎ վարակով հիվանդների կեսից ավելին, հավանաբար վարակվել է արտերկրում, որոնցից ավելի քան 90%-ը՝ ՌԴ-ում: Ընդհանուր առմամբ, 2012-2014թթ. արձանագրված դեպքերի մեծամասնությունը՝ 59%-ը, կազմում են արտերկրում վարակվածները, 14%-ը՝ նրանց զուգընկերները: Այսպիսով, արձանագրված դեպքերի 73%-ը կապված է միգրացիայի հետ:
Համաձայն միգրանտների շրջանում իրականացված ՄԻԱՎ վարակի վերաբերյալ կենսաբանական և վարքագծային վերջին հետազոտությունների արդյունքների` նրանց շրջանում ՄԻԱՎ-ի տարածվածության ցուցանիշը 2,5 անգամ գերազանցում է Հայաստանում մեծահասակ բնակչության շրջանում տարածվածության ցուցանիշը:
Վարակմանը նպաստում է նաև այն թյուր պատկերացումը, համաձայն որի` ՄԻԱՎ-ով հնարավոր է վարակվել միայն մարմնավաճառ կանանցից: Մինչդեռ արտագնա աշխատողների շրջանում արձանագրված դեպքերի վերլու­ծությունը ցույց է տալիս, որ նրանք հիմնականում վարակվում են իրենց պատկերաց­մամբ վստահելի զուգընկերների հետ քիչ թե շատ տևական հարաբերությունների հետևանքով:
Բացի ռիսկային սեռական կապերից, երբ հայտնի չէ ՄԻԱՎ-ի նկատմամբ զուգընկերոջ կարգավիճակը, ՄԻԱՎ-ով վարակմանը նպաստող գործոնների թվում են նաև թմրամիջոցների գործածումը, բազմաթիվ զուգընկերներ ունենալը, պահպանակ չօգտագործելը, ռիսկային վարքագծի հետևանքների չգիտակցումը կամ անտեսումը, սեփա­կան առողջության հանդեպ պատասխանատ­վության բացակայությունը:
ՄԻԱՎ-ի նկատմամբ խոցելի են ոչ միայն միգրանտները, այլև նրանց զուգընկերները, քանի որ, վերադառնալով իրենց մշտական բնակավայրերը, միգրանտների գերակշիռ մասն առանց պահպանակի օգտագործման, առանց ՄԻԱՎ-ի վերաբերյալ հետազոտվելու վերսկսում են սեռական կյանքն իրենց նախկին զուգընկերների հետ` վտանգելով նրանց առողջությունը: http://www.armaids.am/main/news_more.php?lng=2&news=83