Предыдущая публикация
ШОКШЫМ ЖАПЫШТЫЖЕ ПУАТ
«Морко теплоэнергосервис» ООО Унчо тÿҥ школын котельныйжым 2010 ий гыч обслуживатла. Мастерлан котельныйым почмо годсек Пётр Григорьев тырша. Эрик Петров, Валериан Гаврилов, Геннадий Семёнов, Алексей Григорьев машинистлан шотлалтыт. Тунемше-влаклан шинчымашым погаш, туныктышо-влаклан пашам ышташ каньыле, шокшо лийже манын, йÿдшӧ-кечыже тыршат. Котельныйысе кугу коҥгаште чот йÿштӧ шогымо жапыште сутка еда 1200 кг мландышÿйым йÿлалтат. Тудым урем гыч изорва дене оптен пуртат.
«Тыге удан тунемат гын, уремым ÿштшылан але кочегарлан гына ышташ тÿҥалат», - школышто почешырак шÿдырнылшӧ-шамычлан туныктышо-влак чÿчкыдынак тыге ойлат. Но тиде ой тыште тыршыше пашаеҥ-влаклан йӧршынат келшен огеш тол ыле. Шке жапыштыже чыланат верысе озанлыкыште пашам ыштеныт: киндым куштеныт, мландым курал-ÿденыт. Мут толмашеш, Валериан Гаврилов шочмо «Передовик» озанлыкшылан 30 ийым пӧлеклен.
- Тыглай ончымаште кочегарын пашаштыже нимо нелылык уке гае чучеш, - 17 ий мастерлан ыштыше Пётр Иванович Григорьев ойла. - Сандене южышт шикш лектеш гын, йӧра веле манын кутырат. Ты пашан шке ойыртемже уло, садланак мастарлык кÿлеш. Уке гын тÿньык вуй гыч сур тÿсан огыл, а шем шикш тÿргаш тÿҥалеш.
Унчо школын котельныйыштыже тыршыше пашаеҥ-влак нерген «Морко теплоэнергосервис» ООО-н вуйлатышыже Александр Яковлев поро мутым гына каласыш: «Чыланат шке пашаштым кÿлын шуктат. Керек-могай татыштат икте-весылан эҥерташ, полыш кидым шуялташ ямде улыт. Арулык нергенат огыт мондо, йыр улшо кумдыкым эреак тÿзатат. Мемнан тÿҥ задачына – парт коклаште шинчымашым погышо тунемше-влаклан шокшым кÿрылтыш деч посна пуаш. Ты шотышто нунын велым нимогай экшык уке».
«Морко ТЭС» ООО-н вуйлатышыже Александр Владимирович Яковлевын мутшо почеш, предприятий районышто 14 котельныйын пашажлан мутым куча. Тышечын кокытшо: Волаксола ден Зеленогорск школ, газ дене пашам ыштымашке кусненыт. Олтымо пагытыште котельныйлаште 60 еҥ тырша. Лу еҥже кеҥежымат пашаштак кодеш. Кузе калыкыште ойлат, терым кеҥежым ямдылат, орвам – телым. Садланак олтымым чарныме деч вара олмыктымо паша тÿҥалеш веле.
Ончылно мемнам кужу теле вуча. Тудын лывырге але йÿштӧ лийшашыжым ончылгоч каласаш неле. Тунемше-влаклан шокшо лийже манын, Унчо школысо котельныйын пашаеҥже-влак чыла шотыштат ямде улыт.
Лариса ПЕТРОВА
«Морко ТЭС» ООО-н вуйлатышыже Александр Яковлев ден Унчо школысо котельныйын мастерже Пётр Григорьев
Котельныйын машинистше-влак (пурла гыч шолашке) Валериан Гаврилов, Геннадий Семёнов, Алексей Григорьев, Эрик Петров
Следующая публикация
Нет комментариев