Предыдущая публикация
Эрь валоц пачкотькшни ваймос
Рузаевскяй муниципальнай райононь Мокшень Пишля велеса сембе содасазь Валентина Осиповать. Мокшавась сятнень эзда, кие коса шачсь, тоса и кондястсь. Тяни сон пенсияса, и, варжакстомок эряфонь кинц лангс, ули кода азомс, што прязонза вестевок ашезь сашенда ёмла родинаста тумать колга мяль.
Мзярда Мокшень Пишляса ульсь совхоз, Валентина Осиповась ламос работась запчасттнень инкса отвечайкс—примсезень сафнень, а меле макссезень механизаторхненди.
Но эряфонц ламошканц мокшавась лемдезе культурати. Нинге шабакс примсесь участия велень художественнай самодеятельностьса. Велень лия эряйхнень мархта лисендсь сценать лангс морама. Валентина Ивановна несколька киза ульсь Мокшень Пишлянь клубонь заведующайкс. Комсь киза велень библиотекань заведующаель.
Пенсияс тумда меле ушедсь стихотворениянь сёрмадома. Велень клубть социальнай сетьтнень эса группанзон улихть фалу лисенди рубриканза. Фкясь эздост канни «Стихи от Валентины Ивановны» лем. Эсонза эрть учсы Валентина Осиповать мархта васедема—видеороликса сон лувсы тя или тона стихонц рузонь или мокшень кяльса.
Ужяль, лама кизода инголе мокшавать сатозе зиян—ушедсь кальдявста няема. Эряй велеса ськамонза. Ошста сидеста сашендыхть стирец и овоц. И сонь мзярдовок аф юкснесазь велеряйхне, якайхть ширезонза инжикс. Валентина Ивановна фалу васьфтьсыне синь пара валса, луви од стихт.
Лувость «Тядязти» стихотворениянц.
Тядязти
Вели сашендонь мяль вельде,
Куду вятемань кинясь
Тоса тядязе учсть эсон,
Пачань танцти шиненясь.
Кургоняда пицеть лама,
Панцеть танцти цюкорнят,
Шра лангса шову поза—
Сипть, мзяра симоват.
Тевдот, тядяй, ульсь пяк лама,
Ласькозь синь тон тиендить.
И кшиняцень салня мархта
Молембачк тон сивондить.
Шачфнеть, тядяй, лама шаба,
Касфтыть синь тон оцюста.
Аньцек Васяняце шавовсь
Тракторса работамста.
Ётасть кизоть—тусть иднятне,
Тисть эстеест пизот.
А тон, тядяй, ашат мархтонк
Вов ни лама киза.
Эряфце тонь ётась шарозь,
Бта сараз алня
И тон, тядяй, тячи маряк
Стирцень эзда валня.
Валентина Осипова.
Следующая публикация
Нет комментариев