Предыдущая публикация
ЭРЬБАНЬ ЧИ.
/ДЕНЬ ВЕРБЫ.
Кода эрзятне тешкстасть. /Как эрзяне отмечали.
Эрьбань чись - пек кезэрень финнэнь-угрань раськетнень покшчист. Христианстванть марто сон кодаяк апак сюлма. Те чистэнть тешкстыльть Тундонть самонзо. Эрьбась васенцекс панжови: пертьпельга ловоськак аволь весе солась, зярс-мезе якшамоткак эрсить, сон жо нолды чевтине, сияждыця пургондавкст. Те - эрьбанть цецянзо, те - Эрямонь вельмемань символ. Секс те чинть тешкстыльть пек келейстэ.
Веть, Эрьбань чинть каршо, од ломантне теить «Эрьбань салмат»: пурнавить аштема кудос пелеве малав. Кандыть мартост ярсамопельть, пидить салмат. Кирвазтить штатолт. Сыре аваломань ютавтсы озксонть, вейсэ морыть пазморот. Мейле ярсыть-симить ды ушодовить Эрьбань налксемат. Стить карадо каршо: ве ёно тейтерть, омбо ёно цёрат. Кедьсэст эрьбань тарадт. Мельга-мельцек весенень ютама те пирявксонть пачк. Эрьванть «парясызь» эрьбасо:
Эрьба, хлыстъ, хлысть, хлысть!
Орма, лиссть, лисстъ, лиссть!
Виев, шумбра улезат,
Валдо превнес совазат!
Ашолгадозь туить веле ланга удыцятнень стявтнеме:
Стяка, урькай, стякая
Келей ортань панжомо,
Тундонь эрьбань нолдамо.
Иляка пель, урякай!
Варминесэ чавтадызь,
Омбонь те шкас правтадызь.
Эрьбинесэ эрьбатадызь
Чачи сюронь чачомга,
Шумбрачинень улемга...
Косо велева а яксить, тосо Эрьбань чинь валскестэнть истя морсезь ды эрьбазь пувтыть эйкакштнэнь сынст тетятне-аватне. Мейле азортнэ лисить кардазов ды эрьбасызь ракшаст:
Скалнэм, ловцодо андыцям,
Вишка эйкакшонь кастыцям!
Эрьва телестэ вазыяк,
Кавтонь-кавтонь вазнэть кандт.
Эрьва кизэстэ ловцыяк,
Эрь кизэстэ паро кандт...
Чить веленек лисильть лейчирес: ве куринкань од ломантне вить чирентень, омбоцетне - каршонтень ды ушодовильть позярань морсемат - моросо пелькстамот.
-----
Маризь Кемаль,
саезь «Масторов нолдасынек сюкпрянок...» книгастонть
#моеселочернаяпромза
#вербноевоскресенье
Следующая публикация
Комментарии 2