Предыдущая публикация
Шучко жапым кинде шултыш шарныкта
27 январьыште Кугу Отечественный сарын ик эн неле пагытшым шарналтена – Ленинград блокадым. Ты олам аралыше Марий кундемыште шочын-кушшо 4,4 тӱжем еҥ тушан шке вуйжым пыштен.
Ленинград гыч тунам Марий АССР-ыш Кугыжаныш оптический институтым, Воено-воздушный Академийым, Оптико-механический заводым кусареныт, тыгак тулык икшыве-шамычым колтеныт.
81 ий олам утарымылан темын. Тиде кечын Марий Эл вуйлатыше Юрий Зайцев Воинын Чапшылан монумент да Курымашлык тул воктеке пеледыш аршашым пыштен.
– 900 кече блокаде шуйнен! Ленинград чыла чытен лектын. Тунам тушто илыше-влакын кочо шарнымашышт тачат чоным туржеш. Героизмышт мыланна айдемын кӧргӧ вий-куатшын примерже семын кодеш. Олам тушман деч аралыше-влак коклаште Марий кундем гычат салтак-влак лийыныт. Нунын подвигыштым да лӱмыштым ме курымеш шарнаш тӱҥалына, – каласен Юрий Зайцев.
Саргурал гыч кум гана лӱйымӧ деч вара мемнан герой-влакым ик тат шып шоген шарналтеныт.
Торжественный церемонийыш тыгак Марий Эл Кугыжаныш Погын председатель Михаил Васютин, республикысе правительствын, исполнительный властьын федерал органже-влакын территориальный структурыштын вуйлатышышт, мер ушем-влакын еҥышт, олаште илыше калык ушненыт.
Тидын деч вара регион вуйлатыше «Блокадысе кинде» акцийыш ушнен. Тудым Йошкар-Оласе тӱвыра да каныме рӱдӧ парк республикын Молодёжный политике комитетшын полшымыж дене эртарен. Военно-патриотический клуб-влакын воспитанникышт, юнармеец, тыгак «Сеҥымашын волонтёржо-влак», «Воскресение» студент отрядын ӱдыр-рвезыже-шамыч «Блокадысе киндын» символический шултышыжым да легендарный Таня Савичеван дневникше гыч лаштыкым пуэденыт.
«Блокадысе кинде» шарнымаш акций сар жапыште Ленинград олаште илыше калыкын лӱддымылыкшым ончыкта да кызытсе тукым тидын нерген ончыкыжымат шарнаш тӱҥалеш манын ӱшаным шочыкта.
Марий Эл вуйлатышын пресс-службыжын уверже негызеш Светлана Носова ямдылен.
Следующая публикация
Нет комментариев