Предыдущая публикация
📰 Газетнан у номерыштыже лудаш темлена:
✅ Морко район Волаксола школышто СВО-н участникше-влак дене вашлийын мутланыме, сӧй пасушто вуйым пыштыше военнослужащий-шамычым шарныме, гуманитар грузым чумырен колтымо да тунемше-влакым шочмо элым йӧратыме шӱлышеш куштымо шотышто кугу паша шукталтеш. Тидын нерген кумданрак "Тылат, салтак" лаштыкыште палдарыме.
✅ Пытартыш жапыште «Школыш самырык туныктышо-влак огыт тол» манмым чӱчкыдын колат, туге гынат тиде радамыш чылаштым пурташ ок лий. Улыт мемнан кундемыште йоча-влакым, туныктымо пашам, школ илышым уло шӱм-чон дене йӧратыше самырык педагог-влакат. Нунын кокла иктыже – Волжский район Учимсола ялын ӱдыржӧ, Пӧтъял кыдалаш общеобразовательный школышто физикым да математикым туныктышо Анна Михайлова.. Молан ӱдыр туныктышын профессийжым ойырен? Тиде йодышлан тудо "Школ йолгорно" лаштыкыште вашешта.
✅ Таклан огыл журналистикым нылымше кучем семын ончыктат. Журналист-влак илышнан летописьшым возымо дене пырля тӱшка калыкын шонымашыжым газет, радио, телевидений гоч луктын ойлат, илышыште мо ышталтме нерген писын палдараш тыршат, посна еҥ-влакым тургыжландарыше йодышлан вашмутым кычалыт. Санденак калык нунылан ӱшана. А ӱшаным сулаш куштылго огыл: шуко палыман, эре ончылно лийман. Кажне материал калыкын чоныштыжо йӱксавышым мужо манын, журналист тудым ойыртемалтшын ямдылышаш. Лач тыгай улыт журналист-влак. Нуно 13-шо январьыште профессионал пайремыштым палемденыт. Тиде кечылан пӧлеклалтше мероприятий-влакын кузе эртымышт нерген "13-шо январь - Печать кече "мужыр лаштыкым лудын , пален налыда.
✅ 2024-ше ий мучашке лишеме. Марий самырык театр шкенжын уэмдыме йоҥгыдо полатыштыже "Алые паруса" чапле мюзикл дене калыкым куандарыш.
Толын шуо 2025-ше ий. Самырык театр рушла йомак дене пырля у полатыштыже кок марий спектакльым ончыктыш - "Рошто уна" ден "Ик ялыште кум сӱан". Адакат калык - шыҥ-шыҥ. Ӱшанена, Самырык театрын артистше-влак калыкым ончыкыжымат тыгак куандарен шогаш тӱҥалыт. А мо вуча мемнам ончылно?.. Тидым те "Театр илыш" лаштыкыште пален налыда.
Следующая публикация
Нет комментариев