Предыдущая публикация
Тӱня кумалтыш – кум вере
Марий кечышот почеш 15 сентябрьыште шыже кумалтыш почылтын.
Ик эн ончыч, лач тиде кечын, мер кумалтышым Йошкар-Оласе «Марий кумалтыш» общине ола воктенысе Тумер отышто эртарен. Моло районлаштат кумалме йӱлам эртараш тӱҥалыныт. Республикысе Марий юмыйӱла ушемын кагаз пашам виктарышыже Галина Ласточкинан увертарымыж почеш, тӱня кумалтыш тений кундемыштына кум вере лиеш:
6 октябрьыште – Шернур район Коклалаште да Морко район Вараҥыж ялысе отылаште;
3 ноябрьыште – У Торъял район Токтарсола ял воктенысе Саваран отышто.
Марий вералан ӱшаныше кажне кумылан еҥ тушко тичмаш кинде, ший надыр дене миен кертеш.
6 октябрьыштак Параньга район Усола ден Олор ялла коклаште верланыше Тошкемнур ял отыштат Курык Кугызалан ик тулолмо дене кумалаш лектыт. Йӱлам эртарымылан вуйын шогышо Анатолий Деляновын ойлымыж почеш, ты кумалтышыш тыгак кумылан-влакым вучат.
С.Носован фотожо.
Следующая публикация
Нет комментариев