ՓՆՏՐՎՈՒՄ Է ԼԱՎԱԳՈՒՅՆ ԳԱՐԵԹ ԲԵՅԼԸ

13:59:00 30.08.2017Գարեթ Բեյլն արդեն մոռացել է «Վալենսիայի» դեմ խաղից հետո իր հասցեին հնչած քննադատություններն ու հիմա միացել է Ուելսի հավաքականին: Նա փորձելու է օգնել իր երկրի թիմին նվաճել Աշխարհի առաջնության ուղեգիր, չնայած դա այնքան էլ հեշտ չի լինի անել, քանի որ Ուելսն հիմա D խմբի երրորդ հորիզոնականում է՝ ունենալով 8 միավոր, ինչը 4-ով պակաս է Իռլանդիայի ու Սերբիայի միավորներից, այնպես որ բրիտանացիներին ամեն գնով հաղթանակ է հարկավոր Ավստրիայի ու Մոլդովայի դեմ առաջիկա խաղերում:Դա անելը դժվար է, բայց ոչ անհնարին, եթե հաշվի առնենք, որ Ուելսը կարող է հույս դնել Գարեթ Բեյլի պես աստղի վրա, որը թիմին հասցրեց Եվրո 2016-ի կիսաեզրափակիչ:Հիմա հավաքականին հարկավոր է լավագույն Գարեթ Բեյլը, որը ժպտում է ու ուրախ է և առաջնորդում է իր հավաքականին, մի բան, որը պակասում է նրան «Ռեալում»:Մրցաշրջանի մեկնարկում Բեյլի խաղը բավականին մեծ քննարկումների առիթ է դարձել, ու նա անգամ արժանացավ սուլոցների «Սանտիագո Բեռնաբեուի» կողմից վերջին խաղից հետո, բայց Զինեդին Զիդանը շարունակում է հավատալ նրա ուժերին ու նրան համարում է թիմի առանցքային խաղացող:Եվրոպայի սուպերգավաթի խաղում նա գոլային փոխանցում կատարեց Իսկոյին, իսկ Լա լիգայի առաջին տուրի մրցավեճում բացեց խաղի հաշիվը «Ռիասորում» և գոլային փոխանցում Կրոսին, բայց «Բեռնաբեուում» նա գրեթե անտեսանելի էր: Ուելսն ու «Ռեալը» հավատում են, որ Բեյլը արագորեն կվերգտնի իր լավագույն խաղը: