Предыдущая публикация
Айӆат ёх Грозной вошан уйтантысат
Чеченской Республика Грозной хон вошан Профессионалитет уйтантапса манас. Пулӊават, Ноябрьск па Новый Уренгой вошат эӆты, колледжатан рупата пеӆа утаӆтыты айӆат ёх па тохи яӊхсат.
Яӊхам няврэмат кутан Ирина Лонгортова ус. Ӆув там пуш веӆщи Овкурт эӆты Пулӊават воша утаӆтыты ёхтас. Ямальской многопрофильной колледжан «Туризм и гостеприимство» рупата пеӆа оӆаӊ курсан утаӆтыйӆ.
Хоты уйтантапса манас па муй щита версат, ма Ирина инщассэм: «Хон мувев арсыр вошат па куртат эӆты ӆоватаӆан ветсот няврэм щита ус. Кеншак рупитты ураӊан хус вет группая лакки пирысаюв. Кат хатӆ сыс муӊ яӆап щират, верат пеӆа утаӆтысаюв. Щаӆта па муӊ патан тувам проектӆув эӆты потар тусув. Мастер-классатан альсаюв. Манэм шеӊк ӆыпема рахас хоты Алихан Динаев потартас. Ӆув муӊев утаӆтасӆы, хоты ар хоят ещаӆт потар тувман катӆасты хошты, еӆэм ант тайты па мосты ясаӊ туӊа-щира ястаты мосаӆ. Муй щиран социальной сеть ӆыпийн рупитты. Верам рупата тыныты щира хорамаӊа верты.
Хоӆӊа муӊ нум турма яӊхты хоят – Андрей Федяев пиӆан уйтантысув. Ӆув рупатайӆ эӆты потартас, щи тумпийн няврэматан ищипа шеӊк ар инщасса. Мантаӆ еӆпийн «Прекрасное далёко» ар яха арысув.
Грозный вош хуват экскурсияйн версаюв. Вошеӆ сыстам, хорам, уӆты хоятӆаӆ мойӊ хоятат пеӆа шеӊк самаӊат, потраӊат.
Манэм щита шеӊк ям ус. Кат хатӆ сора етшасӊан. Яӆап пиӆат уятсам. Хоӆна йи яӆап вош вантсам».
Мойӊ няврэмат кеша хорам ун концерт верса, хота Чеченской Республика каш альты хоятат яксат, арысат па нарасӆысат. Уйтантапса етшаты еӆпийн ветсот ёхтам мойӊ айӆат ёх нох ӆойман, йи хоят иты СПО гимн арэӆ арэмасэӆ. Щи ӆоват щи ёраӊа па самаӊа утаӆтыты харӆаӆ па пирыйм рупатайӆаӆ тайӆаӆӆаӆ.
Уйтантапса етшас, эвет-похат ёхи мантсат. Туп кашӊ няврэм сам ӆыпеӆан хошм тут няӆмие патн тус. Щаха ёхи ёхаттыйн, щи тутые пиӆӆаӆ кутан лакки ортты па яӆпа ун, хорам, ям вер па номас туты ун тута нох вущитты.
Хор: Ирина Лонгортова
Следующая публикация
Нет комментариев