Предыдущая публикация
Хоты ханты нявремат ентӆат
Нявремат енттэӆ порайна, амыӆаӆ па ащиӆал олапсы эттаӆат. Хоты хуӆ веӆӆат, па ваят хоща веӆпасӆата яң хлат, каӆаң на яң хты олапсы. Юхаӆ эваӆт юватлиӆат, матты веӆпасӆаӆат. Катра корсэсат па ӆысат енттытты тайӆат. Мала хорпи ищки ат ол па йиёлты каман оллат. Щиты нявремат олапсы онттаӆат. Нявремат ай тэӆна ощлат, орна яң хтына вуӆ нэң ху холатта масаӆ.
«Кев пуӆат пиӆна ентапсы»
Щиты ентты ораң на, вет кев пуӆ масаӆ. Касаң ентапсына ниӆ кев масты щирна понла. Ветмет кевӆ па ниӆ пус ласкаӆа. Кев ласкаты порайна, ентты нэң ху масаӆ сара кев вута.
Аӆаң ентапсэӆна масаӆ ниӆ кев вута ниӆ пус ласкатына.
Кимет ентапсэӆна кат тахайна кат кев пуӆна понла. Ентапсы туты нэң ху кев ласкатаӆна, ентты нэң ху щи пущи кат кев вута масаӆ.
Холмет ентапсэӆна, йи кев отча понла, па холм па тахайна. Ентапсы туты нэң ху, кев кат пус ласкаӆли. Алаң на холам кев вуӆа щи юпина па йи кев.
Ниӆмет ентапсэӆна: ниӆ кев аса яха понта масаӆ. Ентты нэң ху масаӆ мув эваӆт иволап вута яха хойты кев пуӆат. Ант ки веритас кев вута, ентапсэӆ па нэң ху пеӆа манӆ.
«Сэм ӆап йирман нёхлапсы»
Алң ищ, ентты таха ӆэщатӆа. Ентапсы ясң ат лавты юпина, хой питӆ, сэмӆаӆ лап йирӆайт па нявремат юпина манӆ нёхласта. Ӆув масӆ няврем ясна катӆамта. Хонтатлиты нявремат ӆув хощеӆ питта ант масӆат. Топ ӆэщатам таха эваӆт хуви ант рахал хонтта. Хой ки катӆамса, щит па нёхласта питӆ. Ентта етсатэӆ юпина, хой йи пус харты ант катса, щит аӆң ищ этаӆ.
«Таӆды юх»
Кат нэң ху мув эӆты йи ищаӆт амасӆаң ан. Курӆан курпатӆанна яха ханалӆаӆан, ясна па юх вуӆң ан. Юх такан таӆда масаӆ, хой ентты пиӆаӆ таӆда веритӆаӆы, щит нох этӆ. Щи мохты ант рахал сансох яха атта па юх эста – юхи хыщӆан. Нох этам нэң ху па ат пиӆна юх таӆаӆ.
«Юх аң тат»
Там ентапсына камантсы командайна артаста масӆ. Рахал аң ат вута па маса юх варас, щи юпина йи командайна олды нявремат эӆты маӆайт па лайӆтаӆайт. Ветъёң -лапатъёң сантиметра кутӆаӆна олда масаӆ. Па енттытӆаӆ тынщаң вуӆат. Мохыӆаӆ ищаӆт лапат маса ёң ӆэм метра хуватна лайӆат. Яркоӆаӆат, ямас аң ат хоща питӆат ки, ӆув пеӆыӆаӆ таӆӆэӆ. Хой артансак питӆ, щит алң ищ этӆ.
Хор: Вера Лонгортова
Хор: smartik.ru
Следующая публикация
Нет комментариев