Предыдущая публикация
Ик вашлиймаш пӱрымашым вашталтен
Пирым йолжо пукша, маныт калыкыште. Тиде ой Курчак театрын артистше Руслан Незеевлан моткоч келшен толеш. Тудо илыш мучко тыршен пашам ышта, тӱрлӧ шӧрыныштӧ шке вийжым терга да молыланат полшаш жапым муэш.
Руслан Незеев Йошкар-Олаште шочын-кушкын, 16-шо №-ан кыдалаш школышто шинчымашым поген. Изиж годым танцевальный коллективыште куштен. Кугурак лиймекыже, спорт дене пеҥгыде кылым кучен, бокс, дзюдо, неле атлетике дене заниматлен. Мураш моткоч йӧратен, мыскара койыш-шоктышан лийын.
Г.Константинов лӱмеш Руш академический драмтеатр пелен театральный курсым погеныт. Сандене рвезе тушко тунемаш пураш кумылаҥын. Вара драмтеатрыште тудлан тӱрлӧ образым чоҥаш ӱшанен пуэныт.
– Курс деч вара Палантай лӱмеш тӱвыра да сымыктыш колледжыш хореографический отделенийыш тунемаш пуренам. Тыгак «Марий Эл» ансамбльыште куштенам, тӱҥ солист лийынам. Сандене руш драмтеатр гыч каяш логалын, – шарналта актёр.
2004 ийыште Руслан Незеев шке семын Китайыш Тайвань отрош пел ийлан пашам ышташ каен. Тушто эстраде куштышо коллектив дене пырля тӱрлӧ куштымашым шынден выступатленыт. Тыгак тудо циркыште трюкым ыштыше-влаклан пластикым шынден. А нуно Русланым цирковой упражненийлан туныктеныт.
2005 ийыште Р.Незеевлан Кечывалвел Корейыш пашам ышташ каяш йӧн лектын.
Курчак театрыште 2017 ий декабрь гыч тырша. Р.Незеевлан йоча-шамыч дене пашам ышташ келша. Нунын йывыртыше, йӱлышӧ шинчашт вийым пуа, манеш.
Следующая публикация
Нет комментариев