ДЗЕНЬ У ГІСТОРЫІ.

28 лютага.
1468 - У ВКЛ прыняты Судзебнік Казіміра. Судзебнік 1468 г. даў пачатак новаму этапу ў развіцці прававой тэорыі, практыкі заканадаўчай дзейнасці і кадыфікацыі феадальнага права, які завершаны выданнем Статута ВКЛ 1529 г., Статута ВКЛ 1566 г. і Статута ВКЛ 1588 г. Судзебнік напісаны на старабеларускай мове. Захаваўся ў 3 спісах канца 15-пач. 16 ст. Упершыню апублікаваны (лацінскімі літарамі) І.Даніловічам у 1826 г. у Вільні.
1616 - Памёр Мікалай Крыштаф Радзівіл Сіротка, дзяржаўны дзеяч Вялікага княства Літоўскага, падарожнік-мемуарыст.
1768 - Утворана Барская канфедэрацыя.
1913 - Нарадзіўся Аляксей Шудзейка (г. Мітава, цяпер Елгава, Латвія), дзеяч эміграцыі ў Нямеччыне і ЗША.
1916 - У Вільні выйшаў першы нумар беларускай грамадска-палітычнай і літаратурнай газеты "Гоман" ("Ноmаn"), выдавалася лацінкай і кірыліцай да канца 1918 г.
1942 - У Санкт-Пецярбургу (тады Ленінградзе, Расея) ад голаду памёр Канстанцін Пушкарэвіч беларускі і расейскі славіст, літаратуразнавец, педагог.