Предыдущая публикация
ЧИЗАРД ХУДЪОЙ ЛАКИХЪТ БАДИЙАТ, ДАРДЪАТ ҒАМ ВИД?
Бади йиктам зимадъти педъо сут, арвъахти Шайтӯн йакум пидъ фанд цадъод. Ас азал Шайтӯн комил фарихъта вуд, аммо то охирец «ақиқатанд наред» (Юҳанно 8:44). Въинд хойихъ педъо сут, лак одамен Худъойард найат въирд ибодатен. Шайтӯни ас Авъо фанд дъод, лак йа въи ниғӯгъдат Худъой най. Одами мис Авъо тараф зохътху ас Худъой пӯнд гахът. Йик ас там тарӯд мам заминти дардъат, ғамат мидовъ педъо сут. Хъойет Ҳастӣ 3:1–6, 19.
Йик тами Шайтӯн Авъо ас ро ца дъод йу муқобили Худъой окимийат андуйд. Бехъ одаменен мис Шайтӯнард амро сатху ас Худъойен, аранг ас ху Оким, ху пиц гардъент. Дисга Шайтӯн «окими мам ҷаӯн» сут. Хъойет Юҳанно 14:30; 1 Юҳанно 5:19.
2. ХУДЪОЙ ОФАРИДАЙЕНАНД КАМБУДИ ЙАСТО?
Худъойи арчиз офарид ца чугъҷ бе камбуди. Худъойи одаменат фарихътайен дис офарид чугъҷ, въадъ вардъодъҷат то абад Въи гап ниғихътовъ (Такрори Шариат 32:4, 5). Худъойи маш озод офарид чугъҷ, диҷат маш хубатъ хушам некийамо бади. Ди озодиқати маш вардъийам дивихътовъ Худъойам живъҷ. Хъойет Яъқуб 1:13–15; 1 Юҳанно 5:3.
3. ЧИЗАРД ХУДЪОЙ ҒАЛЕЦ ЛАКИХЪТ ДАРДЪАТ ҒАМ ВИД?
Худъойи дус въахт дъод, лак бар зидди Въи окимийат андизъен. Чизард? Лак фамен, бе Въи робари йичидӯматъ окимийат навардъед одаменард хушбахти видовъ (Воиз 7:29; 8:9). 6000 сола тарихи инсӯн ди башандатъ нихъӯн дъид. Йичидӯматъ окимийат дъедат касалийат беинсофи бас найат. Хъойет Хуруҷ 9:16; Ирмиё 10:23.
Бар одам окимийат Худъой окимийат биди, Йута фана баракатенат хушбахти вирт одаменард (Ишаъё 48:17, 18). Бақарибита Йаува фукатъ окимийатен тар пали кихът. Зимадътита йик въадъ одамен зиндагийен, артамта ас Худъой ху Оким қабул ца кихът (Ишаъё 11:9). Хъойет Дониёл 2:44.
4. ЧИЗАРДИ ХУДЪОЙ ДИДӮНД ВЪАХТ ТОҚАТ ЧУД?
Шайтӯни лӯд, йичидӯм одамта Худъойард ас дили ҷӯн хизмат накихът. Тут хоихъ чугъҷато ди дируғ фош чидовъ? Ту вардъийи ди чидовъ. Худъойи дидӯнд въахт тоқат чуд, лак ар йак ас маш вардъед дивихътовъ чидӯм окимийат тарафта зезд, Худъой окимийато одаманд. Ас маш зиндагиндита малум сӯд чи тарафам зохът. Хъойет Айюб 1:8–12; Масалҳо 27:11.
5. ЦАРАНГ ХУДЪОЙ ХУ ОКИМ ҚАБУЛАМ?
Худъой ху Оким қабул чидовъард даркор дини ақиқи виредовъ. Йика дин, въам асос Китоби Муқаддасти ца, ас руйи въам талимот зиндаги чидовъ (Юҳанно 4:23). Шайтӯнта йик там аранг оким рад кинам, арвъахта Йисо дастур ас сийосатат дъед дъар ху ца анҷавам. Хъойет Юҳанно 17:14.
Шайтӯн ху окимийат йик дис истифода йест, лак маш ғажд коренат бадахлоқи хурд тоза фамам. Ага машта дев корен бас цакинам, йилав ас маш қавъмийотат амрогӯн вардъийен маш қилоғ анҷивдовъ йо бар зидди маш андидовъ (1 Петрус 4:3, 4). Дӯнҷат, маш бойад йик ас шичатъ хурд фамам чи охънодори машард даркор. Артами Худъой ца живъҷ маш въиқати охънодори кинамо? Въи хирадмандӯна қонунента ниғӯгъамо? Ага машта дисга ца кинам, вардъийамта дивихътовъ, Шайтӯн — дируғгуй, ат одамен вардъийен қин давъранди Худъойард въафодор редовъ. Хъойет 1 Қӯринтиён 6:9, 10; 15:33.
Худъойи одамен лапатъ живъҷ, денҷат бофт бовъари дъедовъ дардъат азобта укмандатъ тайор сӯд. Арчай дирд бовъари дъид зимадъти то абад хушбахтатъ зиндаги кихът. Хъойет Юҳанно 3:16.
Следующая публикация
Нет комментариев