Минея, 20 Ноября, Кано́н предпра́зднства

Глас 4
Песнь 1
Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся,/ Тоя́ чудеса́.
Припев: Пресвята́я Богоро́дице, спаси́ на́с.
Святы́х во свята́я Всесвята́я и Непоро́чная всели́тися происхо́дит,/ Пресвята́го Бо́га я́ко да бу́дет храм освяще́н,/ и Той предтеку́т де́вы отрокови́цы.
Припев: Пресвята́я Богоро́дице, спаси́ на́с.
Сове́т преве́чный Преве́чнаго Бо́га на́шего во исполне́ние гряде́т/ предгряду́щей Ти воспита́тися во свята́я святы́х,/ Сло́ва в жили́ще, Отрокови́це Всенепоро́чная.
Сла́ва Отцу́ и Сы́ну и Свято́му Ду́ху.
Роди́телие Боже́ственнии Тя, Бо́жию Роди́тельницу хотя́щу бы́ти,/ вво́дят воспита́тися во свята́я святы́х:/ моли́тву, е́юже моля́хуся, обеща́ние исполня́ют, Пречи́стая.
И ны́не и при́сно и во ве́ки веко́в. Ами́нь.
Укрепи́, Влады́чице, не́мощь се́рдца моего́/ и утверди́, страстьми́ коле́блемое,/ я́ко да ве́рою Тя и любо́вию ублажа́ю, Присноблаже́нную и Всенепоро́чную.
Песнь 3
Ирмос: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Припев: Пресвята́я Богоро́дице, спаси́ на́с.
Начина́ющия отрокови́цы де́вы,/ свещи́ нося́щия све́тло, бу́дущее подпису́ют:/ из Нея́ бо роди́тся просвеще́ние зна́ния,/ реша́щее пре́лести омраче́ние.
Припев: Пресвята́я Богоро́дице, спаси́ на́с.
Ревну́ющи дре́вле Богому́дренно, А́нна моли́тву исполня́ет/ и Тебе́ привозлага́ет святи́лищу, Всенепоро́чная,/ свяще́ннейшее зача́тие име́ти хотя́щу и рождество́.
Сла́ва Отцу́ и Сы́ну и Свято́му Ду́ху.
Со́лнце простре́ лучи́, зря о́блак све́тлый, простира́емь/ ма́нием Боже́ственным внутрь во свята́я,/ из Нея́же одожди́т оставле́ние олядене́вшим страстьми́.
И ны́не и при́сно и во ве́ки веко́в. Ами́нь.
Обожа́ет мя Бог, всели́вся в Тя за милосе́рдие, Всенепоро́чная, Чи́стая,/ укра́дена сне́дию пре́жде ле́стию змии́ною,/ и тли нетле́ния па́ки пи́щу воздае́т.
Седален, глас 1
Восхвали́те, де́вы, ма́тери, предпра́зднуйте,/ лю́дие, славосло́вите, свяще́нницы, благослови́те Пречи́стую Ма́терь Бо́жию:/ пло́тию бо младе́нствующи пре́жде,/ во храм принесе́ся, я́ко храм Бо́жий святе́йший./ Те́мже пра́здник соверша́юще духо́вный, воспое́м Ю,/ я́ко Предста́тельницу ро́да челове́ческаго.
Песнь 4
Ирмос: Неизсле́дный Бо́жий сове́т/ е́же от Де́вы воплоще́ния/ Тебе́, Вы́шняго, проро́к Авваку́м, усмотря́я, зовя́ше:/ сла́ва си́ле Твое́й, Го́споди.
Припев: Пресвята́я Богоро́дице, спаси́ на́с.
Свяще́ннии провозвести́ша язы́цы Тебе́, Чи́стая,/ бы́ти село́ невмести́маго Естества́,/ сего́ ра́ди Тя ли́цы де́вственнии провожда́ют, свещи́ нося́ще во свята́я.
Припев: Пресвята́я Богоро́дице, спаси́ на́с.
Сла́ву взят Иоаки́м со А́нною,/ ходя́ще и нося́ще Тя с весе́лием во святы́й храм, хра́ме Бо́жий пресвяты́й,/ Чи́стая и Всенепоро́чная Влады́чице.
Сла́ва Отцу́ и Сы́ну и Свято́му Ду́ху.
Разреша́ется изрече́ние прароди́тельное:/ се бо процвете́ Лоза́, я́же Грозд нетле́нный нам плодоно́сит,/ вино́ нося́щий весе́лия конце́м.
И ны́не и при́сно и во ве́ки веко́в. Ами́нь.
Еди́ну Тя Всенепоро́чную Соде́тель Сло́во обре́т,/ всели́ся во Твое́ чре́во, содева́я на́ше спасе́ние благода́тию, Пречи́стая,/ за неизглаго́ланную ми́лость.
Песнь 5
Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Припев: Пресвята́я Богоро́дице, спаси́ на́с.
О́блацы да воска́плют пра́вду днесь,/ я́ко на Небеси́ бо простира́ется Боже́ственный о́блак во хра́ме Бо́жии,/ и́же ка́плет сла́дость, всю го́ресть душ на́ших изъе́млющу.
Припев: Пресвята́я Богоро́дице, спаси́ на́с.
Стра́нно Твое́ зача́тие, стра́нно Твое́ и рождество́, стра́нно твое́ происхожде́ние, Де́во,/ е́же внутрь святи́лища введе́ние,/ стра́нна и пресла́вна Твоя́, сло́во превосходя́ща и помышле́ние, Пречи́стая.
Сла́ва Отцу́ и Сы́ну и Свято́му Ду́ху.
Всю Тебе́ освяти́ Дух Всесвяты́й, внутрь хра́ма пребыва́ющу/ и пита́ему пи́щею небе́сною, Неве́сто О́тча прекра́сная,/ сего́ ра́ди была́ еси́ и Сло́ва Роди́тельница.
И ны́не и при́сно и во ве́ки веко́в. Ами́нь.
К Тебе́ мою́ всю наде́жду, Отрокови́це, полага́я,/ к щедро́там твои́м прибега́ю:/ вре́да де́монскаго яви́ неприча́стну па́дшую ду́шу мою́/ и изнемо́гшую сласте́й потопле́нми.
Песнь 6
Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Припев: Пресвята́я Богоро́дице, спаси́ на́с.
Укре́пльшеся Боже́ственно благода́тию, Боже́ственныя Де́вы родите́лие/ Сию́ я́ко непоро́чную голуби́цу во свята́я воспита́тися любо́вию возлага́ют.
Припев: Пресвята́я Богоро́дице, спаси́ на́с.
Тебе́, хотя́щей приима́ти Свет, из Све́та происходя́щий,/ свещи́ вжига́юще, отрокови́цы, Чи́стая,/ предхо́дят светови́дно к Боже́ственному хра́му, ликовству́юще.
Сла́ва Отцу́ и Сы́ну и Свято́му Ду́ху.
Полна́ сла́вы Пала́та,/ вели́кое проро́ков оглаше́ние, Престо́л Святы́й внутрь свята́я вво́дится,/ Царю́ всех гото́вящися.
И ны́не и при́сно и во ве́ки веко́в. Ами́нь.
Пою́ Твое́, Отрокови́це, зача́тие, пою́ Твое́ и неизрече́нное рождество́,/ пою́ и покро́в Твой, и́мже вре́да вся́каго избавля́емся,/ к Твоему́ оти́шию прибега́ющии.
Кондак, глас 4
Весе́лия днесь вселе́нная испо́лнися вся/ в благознамени́том пра́зднице Богоро́дицы,/ зову́щи:/ Та есть сень Небе́сная.
Икос
И́же всех Творе́ц, Созда́тель и Влады́ка,/ неизрече́нным благоутро́бием приклони́выйся, еди́нем человеколю́бием Свои́м,/ его́же Свои́ма устро́и рука́ма, ви́дев па́дша, уще́дри/ и возста́вити сего́ благоволи́, зда́ние Боже́ственнейшее,/ и истоще́нием Свои́м, я́ко благ естество́м и ми́лостив./ Тем Мари́ю Хода́таицу прие́млет и я́ко Де́ву и чи́стую та́инства,/ из Нея́ на́ше естество́ носи́ти восхоте́:/ Та есть сень Небе́сная.
Песнь 7
Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Припев: Пресвята́я Богоро́дице, спаси́ на́с.
Светоно́сное Тя я́ко со́лнце, прие́млет храм святы́й,/ внутрь сия́ющу зарю́ конце́м спасе́ния, Чи́стая,/ храм бы́ти иму́щую Сы́на Бо́жия, Де́во.
Припев: Пресвята́я Богоро́дице, спаси́ на́с.
Рука́ми вси воспле́щем,/ избавле́ния нося́щую о́бразы Неискусобра́чную ви́дяще:/ руко́ю бо А́нгеловою пита́ется,/ Небе́сный Хлеб нам я́ко хотя́щу неизрече́нно породи́ти.
Сла́ва Отцу́ и Сы́ну и Свято́му Ду́ху.
Ду́ши вся пра́ведных подзе́мныя благовести́ша Тя, голуби́це злата́я,/ поко́й нося́щу пото́па разу́мнаго проявля́ют,/ и во святы́х свята́я благоче́стно ликовству́ющу.
И ны́не и при́сно и во ве́ки веко́в. Ами́нь.
Я́ко красна́, Кра́снаго родила́ еси́,/ неле́поту на́шу возвраща́ющаго в пе́рвый о́браз, Отрокови́це Всенепоро́чная,/ Ему́же и пое́м:/ отце́в Госпо́дь и Бог, благослове́н еси́.
Песнь 8
Ирмос: Слы́ши, Отрокови́це, Де́во Чи́стая,/ да рече́т у́бо Гаврии́л/ сове́т Вы́шняго, дре́вний, и́стинный:/ бу́ди к прия́тию гото́ва Бо́жию,/ Тобо́ю бо Невмести́мый с челове́ки поживе́./ Тем и ра́дуяся, вопию́:/ благослови́те, вся дела́ Госпо́дня, Го́спода.
Припев: Пресвята́я Богоро́дице, спаси́ на́с.
Слы́ши и разуме́й, ста́рче му́дрый,–/ Заха́рии А́нна глаго́лет,–/ сове́том Боже́ственным, Ю́же и́мам Отрокови́цу Чи́стую до́блественною душе́ю приими́,/ Тоя́ бо ра́ди бу́дет избавле́ние,/ и в храм святы́й введи́ Сию́, вопия́:/ благослови́те, вся дела́ Госпо́дня, Го́спода.
Припев: Пресвята́я Богоро́дице, спаси́ на́с.
Благослове́н еди́н Госпо́дь, возопи́ свяще́нник:/ жи́зни вхо́ды ны́не указу́ют я́ве, нам объяви́вше,/ в ню́же хо́щет всели́тися, Боговмести́мую пала́ту, Христо́с, Царь вся́ческих,/ Ему́же вопие́т вся земля́:/ благослови́те, вся дела́ Госпо́дня, Го́спода.
Припев: Пресвята́я Богоро́дице, спаси́ на́с.
Се, ста́рче мудре́йше,–/ А́нна рече́ благогове́йно,–/ до́брейшую Отрокови́цу, Ю́же даде́ мне Бог,/ све́тло приими́ и проро́чествуй еди́ну, хотя́щую в ве́щи произнести́ пропове́дания,/ с ни́миже вопие́ши проро́чески:/ благослови́те, вся дела́ Госпо́дня, Го́спода.
Припев: Пресвята́я Богоро́дице, спаси́ на́с.
Ны́не позна́х, же́но, я́вственнейше,–/ разу́мно рече́ ста́рец,–/ дре́во возраста́ет посреде́ хра́ма,/ е́же процвете́т су́що Боже́ственный плод, в рай вводя́щий/ сне́дию изгна́нныя тле́ния, вопию́щия ра́достию:/ благослови́те, вся дела́ Госпо́дня, Го́спода.
Сла́ва Отцу́ и Сы́ну и Свято́му Ду́ху.
Глаго́л неизрече́нных уче́ний/ Твоя́ душа́, Отрокови́це Чи́стая, я́ве бу́дет,–/ ста́рец рече́ я́сно,–/ в Боже́ственный сей, Де́во, всели́шися храм:/ А́нгелом бо пита́ема, Сове́та Вели́каго А́нгела роди́ши. Ему́же пое́м:/ благослови́те, вся дела́ Госпо́дня, Го́спода.
И ны́не и при́сно и во ве́ки веко́в. Ами́нь.
Глас Ти поем, Отрокови́це Чи́стая, ра́достно Гаврии́лов:/ ра́дуйся, всех вина́ еди́на ра́дости,/ ра́дуйся, душ очище́ние, яко ро́ждшая избавле́ние на́ше и воздание, песнопою́щих Тому́:/ благослови́те, вся дела́ Госпо́дня, Го́спода.
Песнь 9
Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Припев: Пресвята́я Богоро́дице, спаси́ на́с.
Се Бо́жия гора́ свята́я со свеща́ми све́тлыми внутрь во свята́я ше́ствует,/ от Нея́же Ка́мень отсече́тся и тре́бища и куми́ры демонския истни́т,/ челове́ки же са́мыя соде́лает хра́мы и честна́я оби́телища.
Припев: Пресвята́я Богоро́дице, спаси́ на́с.
Кля́тся Бог и ны́не испо́лни,/ от коле́на Иу́дова нам дав Присноде́ву,/ Ея́же чре́во дре́во возрасти́т Жи́зни,/ смертоно́сныя сне́ди избавля́ющее, паде́нию пи́щею подни́кшия/ и укра́деныя пре́лестию змии́ною.
Припев: Пресвята́я Богоро́дице, спаси́ на́с.
Усты́ све́тлыми А́нна возопи́ в хра́ме Бо́жии:/ Тебе́ привозлага́ю, Ю́же мне дал еси́, Отрокови́цу, о Влады́ко!/ Из Нея́же за милосе́рдие неизглаго́ланное, Плотоно́сец яви́вся, спасе́ши мир,/ его́же созда́л еси́, возвели́чив Ю я́ко Ма́терь Твою́.
Сла́ва Отцу́ и Сы́ну и Свято́му Ду́ху.
Се озари́ся день спасе́ния су́щим в нощи́ лю́тых:/ дверь Небе́сная, хра́ма две́ри отве́рзши, со свеща́ми вхо́дит внутрь во свята́я/ от святы́я пита́тися си́лы, свято́е Бо́га вселе́ние.
И ны́не и при́сно и во ве́ки веко́в. Ами́нь.
Просвети́, Чи́стая, души́ моея́ о́чи, Свет ро́ждшая,/ да не пости́гнет мя грехо́вная тьма́ глубоча́йшая,/ ниже́ глубина́ да покры́ет мя отча́яния,/ но Сама́ мя спаси́ и окорми́ ко приста́нищу Боже́ственнаго хоте́ния.
Светилен
День предпра́зднственный/ храм приво́дит ны́не пречи́стым введе́нием Богоро́дицы Мари́и,/ Ю́же пою́т А́нгели, и челове́цы ублажа́ют,/ де́вы же провожда́ют, свещи́ нося́ще и игра́юще, в храм Госпо́день.
.....
Глас 6-й
Пе́снь 1
Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Перевод: Как по суше прошел Израиль по бездне стопами, и взывал, гонителя фараона видя утопавшим: «Богу победную песнь воспоем!»
Припе́в: Поми́луй мя, Бо́же, поми́луй мя.
Ны́не приступи́х а́з гре́шный и обремене́нный к Тебе́, Влады́це и Бо́гу моему́; не сме́ю же взира́ти на не́бо, то́кмо молю́ся, глаго́ля: да́ждь ми́, Го́споди, у́м, да пла́чуся де́л мои́х го́рько.
Ныне приступил я, грешный и обременённый, к Тебе, Владыке и Богу моему; но не смею взирать на небо, только молю, возглашая: «Дай мне, Господи, разум, чтобы оплакивал я дела мои горько!»
Поми́луй мя, Бо́же, поми́луй мя.
О, го́ре мне́ гре́шному! Па́че все́х челове́к окая́нен е́смь, покая́ния не́сть во мне́; да́ждь ми́, Го́споди, сле́зы, да пла́чуся де́л мои́х го́рько.
О, горе мне, грешному! Более всех людей окаянен я: покаяния нет во мне. Дай мне, Господи, слёзы, чтобы оплакивал я дела мои горько!
Сла́ва Отцу, и Сы́ну, и Свято́му Ду́ху. Безу́мне, окая́нне челове́че, в ле́ности вре́мя губи́ши; помы́сли житие́ твое́, и обрати́ся ко Го́споду Бо́гу, и пла́чися о де́лех твои́х го́рько.
Слава Отцу, и Сыну, и Святому Духу. Безумный, окаянный человек, ты время в лености губишь! Помысли о жизни своей и обратись ко Господу Богу, и плачь о делах своих горько!
И ны́не, и при́сно, и во ве́ки веко́в, ами́нь. Ма́ти Бо́жия Пречи́стая, воззри́ на мя́ гре́шнаго, и от се́ти диа́воли изба́ви мя́, и на пу́ть покая́ния наста́ви мя́, да пла́чуся де́л мои́х го́рько.
И ныне, и всегда, и во веки веков, аминь. Матерь Божия Пречистая! Воззри на меня, грешного, и от сети диавола избавь меня, и на путь покаяния направь меня, чтобы оплакивал я дела мои горько!
Пе́снь 3
Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Нет святого, как Ты, Господи Боже мой, возвысивший верных Тебе, Благой, и утвердивший нас на камне исповедания Твоего.
Поми́луй мя, Бо́же, поми́луй мя.
Внегда́ поста́влени бу́дут престо́ли на суди́щи стра́шнем, тогда́ все́х челове́к дела́ облича́тся; го́ре та́мо бу́дет гре́шным, в му́ку отсыла́емым; и то́ ве́дущи, душе́ моя́, пока́йся от злы́х де́л твои́х.
Когда поставлены будут престолы на Страшном Суде, тогда всех людей дела обличатся; горе там будет грешным, в муку отсылаемым! И зная это, душа моя, покайся в злых делах твоих!
Поми́луй мя, Бо́же, поми́луй мя.
Пра́ведницы возра́дуются, а гре́шнии воспла́чутся, тогда́ никто́же возмо́жет помощи́ на́м, но дела́ на́ша осу́дят на́с, те́мже пре́жде конца́ пока́йся от злы́х де́л твои́х.
Праведники возрадуются, а грешники возрыдают: тогда никто не сможет помочь нам, но дела наши осудят нас. Потому прежде конца покайся в злых делах твоих!
Сла́ва Отцу, и Сы́ну, и Свято́му Ду́ху. Увы́ мне́ великогре́шному, и́же де́лы и мы́сльми оскверни́вся, ни ка́пли сле́з име́ю от жестосе́рдия; ны́не возни́кни от земли́, душе́ моя́, и пока́йся от злы́х де́л твои́х.
Увы мне, многогрешному! Я, делами и мыслями осквернившись, ни капли слёз не имею от жестокосердия! Ныне воспрянь от земли, душа моя, и покайся в злых делах твоих!
И ны́не, и при́сно, и во ве́ки веко́в, ами́нь. Се́, взыва́ет, Госпоже́, Сы́н Тво́й, и поуча́ет на́с на до́брое, а́з же гре́шный добра́ всегда́ бе́гаю; но Ты́, Ми́лостивая, поми́луй мя́, да пока́юся от злы́х мои́х де́л.
Вот, взывает, Госпожа, Сын Твой и нас научает доброму; я же, грешный, всегда бегу от добра! Но Ты, Милостивая, помилуй меня, чтобы я раскаялся в делах моих злых!
Седа́лен, гла́с 6-й
Помышля́ю де́нь стра́шный и пла́чуся дея́ний мои́х лука́вых: ка́ко отвеща́ю Безсме́ртному Царю́, или́ ко́им дерзнове́нием воззрю́ на Судию́, блу́дный а́з? Благоутро́бный О́тче, Сы́не Единоро́дный и Ду́ше Святы́й, поми́луй мя́.
Помышляю о дне страшном и плачу о деяниях моих лукавых, как отвечу Бессмертному Царю? И как дерзну воззреть на Судию, я, блудный? Милосердный Отец, Сын Единородный, Дух Святой, помилуй меня.
Сла́ва Отцу, и Сы́ну, и Свято́му Ду́ху, и ны́не, и при́сно, и во ве́ки веко́в, ами́нь.
Богоро́дичен
Свя́зан мно́гими ны́не плени́цами грехо́в и содержи́м лю́тыми страстьми́ и беда́ми, к Тебе́ прибега́ю, моему́ спасе́нию, и вопию́: помози́ ми́, Де́во, Ма́ти Бо́жия.
Ныне, связанный многими узами грехов и теснимый лютыми страданиями и бедами, к Тебе прибегаю, моему спасению, и взываю: «Помоги мне, Дева, Матерь Божия!»
Пе́снь 4
Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи от смы́сла чи́ста, о Го́споде пра́зднующи.
Христос моя сила, Бог и Господь, святая Церковь благоговейно поёт, взывая, от чистого разума в Господе торжествуя.
Поми́луй мя, Бо́же, поми́луй мя.
Широ́к пу́ть зде́ и уго́дный сла́сти твори́ти, но го́рько бу́дет в после́дний де́нь, егда́ душа́ от те́ла разлуча́тися бу́дет: блюди́ся от си́х, челове́че, Ца́рствия ра́ди Бо́жия.
Широк путь здесь и легко делать приятное, но горько будет в последний день, когда душа с телом разлучаться будет! Храни себя от того, человек, ради Царства Божия!
Поми́луй мя, Бо́же, поми́луй мя.
Почто́ убо́гаго оби́диши, мзду́ нае́мничу уде́ржуеши, бра́та твоего́ не лю́биши, блу́д и го́рдость го́ниши? Оста́ви у́бо сия́, душе́ моя́, и пока́йся Ца́рствия ра́ди Бо́жия.
Зачем бедного обижаешь, плату работника удерживаешь, брата своего не любишь, к блуду и гордыне стремишься? Оставь же все это, душа моя, и покайся ради Царствия Божия!
Сла́ва Отцу, и Сы́ну, и Свято́му Ду́ху. О, безу́мный челове́че, доко́ле углеба́еши, я́ко пчела́, собира́ющи бога́тство твое́? Вско́ре бо поги́бнет, я́ко пра́х и пе́пел: но бо́лее взыщи́ Ца́рствия Бо́жия.
О безумный человек! Доколе будешь суетиться, словно пчела, собирая богатство своё? Ведь вскоре погибнет оно, как прах и пепел; но ты прежде взыщи Царствия Божия.
И ны́не, и при́сно, и во ве́ки веко́в, ами́нь. Госпоже́ Богоро́дице, поми́луй мя́ гре́шнаго, и в доброде́тели укрепи́, и соблюди́ мя́, да на́глая сме́рть не похи́тит мя́ негото́ваго, и доведи́ мя́, Де́во, Ца́рствия Бо́жия.
Госпожа Богородица! Помилуй меня, грешного, и в добродетели укрепи и сохрани меня, чтобы внезапная смерть не похитила меня, неготового, и доведи меня, Дева, до Царствия Божия!
Пе́снь 5
Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Божественным светом Своим, Благой, души с рассвета к Тебе стремящихся любовью озари, молюсь я, чтобы знать Тебя, Слово Божие, истинного Бога, от мрака грехов к Себе призывающего.
Поми́луй мя, Бо́же, поми́луй мя.
Воспомяни́, окая́нный челове́че, ка́ко лжа́м, клевета́м, разбо́ю, не́мощем, лю́тым звере́м, грехо́в ра́ди порабоще́н еси́; душе́ моя́ гре́шная, того́ ли восхоте́ла еси́?
Вспомни, окаянный человек, как лжи, клевете, разбою, болезням, словно лютым зверям, порабощён ты по грехам своим! Душа моя грешная, того ли желала ты?
Поми́луй мя, Бо́же, поми́луй мя.
Трепе́щут ми́ у́ди, все́ми бо сотвори́х вину́: очи́ма взира́яй, уши́ма слы́шай, язы́ком зла́я глаго́ляй, всего́ себе́ гее́нне предая́й; душе́ моя́ гре́шная, сего́ ли восхоте́ла еси́?
Трепещут члены тела моего, ибо я всеми ими провинился: глазами взирая, ушами слушая, языком говоря злое, всего себя геенне предал! Душа моя грешная, этого ли желала ты?
Сла́ва Отцу, и Сы́ну, и Свято́му Ду́ху. Блудника́ и разбо́йника ка́ющася прия́л еси́, Спа́се, а́з же еди́н ле́ностию грехо́вною отягчи́хся и злы́м дело́м порабо́тихся, душе́ моя́ гре́шная, сего́ ли восхоте́ла еси́?
Блудного сына и разбойника кающегося принял Ты, Спаситель; но лишь я один греховной ленью отягчён и злым делам порабощён! Душа моя грешная, этого ли желала ты?
И ны́не, и при́сно, и во ве́ки веко́в, ами́нь. Ди́вная и ско́рая помо́щнице все́м челове́ком, Ма́ти Бо́жия, помози́ мне́ недосто́йному, душа́ бо моя́ гре́шная того́ восхоте́.
Дивная и скорая помощница всем людям, Матерь Божия! Помоги мне, недостойному, ибо душа моя грешная того возжелала!
Пе́снь 6
Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.
Житейское море видя, поднимающееся волнами искушений, я, к тихой пристани Твоей стремясь, взываю Тебе: «Возведи от погибели жизнь мою, Многомилостивый!»
Поми́луй мя, Бо́же, поми́луй мя.
Житие́ на земли́ блу́дно пожи́х и ду́шу во тьму́ преда́х, ны́не у́бо молю́ Тя́, Ми́лостивый Влады́ко: свободи́ мя́ от рабо́ты сея́ вра́жия, и да́ждь ми́ ра́зум твори́ти во́лю Твою́.
Жизнь земную я блудно прожил и душу во тьму предал; ныне же молю Тебя, милостивый Владыка: освободи меня от этого рабства врагу и дай мне разум исполнять волю Твою!
Поми́луй мя, Бо́же, поми́луй мя.
Кто́ твори́т такова́я, я́коже а́з? Я́коже бо свиния́ лежи́т в калу́, та́ко и а́з греху́ служу́. Но Ты́, Го́споди, исто́ргни мя́ от гну́са сего́ и да́ждь ми́ се́рдце твори́ти за́поведи Твоя́.
Кто совершает такое, как я? Ибо как свинья лежит в грязи, так же и я греху служу. Но Ты, Господи, исторгни меня из гнусности той и дай мне сердце, готовое исполнять заповеди Твои!
Сла́ва Отцу, и Сы́ну, и Свято́му Ду́ху. Воспряни́, окая́нный челове́че, к Бо́гу, воспомяну́в своя́ согреше́ния, припа́дая ко Творцу́, слезя́ и стеня́; То́й же, я́ко милосе́рд, да́ст ти́ у́м зна́ти во́лю Свою́.
Воспрянь к Богу, окаянный человек, вспомнив свои согрешения, припадая ко Творцу, проливая слезы и стеная! Он же, как милосердный, даст тебе ум познать волю Его!
И ны́не, и при́сно, и во ве́ки веко́в, ами́нь. Богоро́дице Де́во, от ви́димаго и неви́димаго зла́ сохрани́ мя́, Пречи́стая, и приими́ моли́твы моя́, и донеси́ я́ Сы́ну Твоему́, да да́ст ми́ у́м твори́ти во́лю Его́.
Богородица Дева! От видимого и невидимого зла сохрани меня, Пречистая, и прими прошения мои, и передай их Сыну Твоему, да даст мне ум исполнять волю Его!
Конда́к
Душе́ моя́, почто́ греха́ми богате́еши, почто́ во́лю диа́волю твори́ши, в чесо́м наде́жду полага́еши? Преста́ни от си́х и обрати́ся к Бо́гу с пла́чем, зову́щи: милосе́рде Го́споди, поми́луй мя́ гре́шнаго.
Душа моя! Зачем грехами богатеешь? Зачем волю диавола исполняешь? На что надежду возлагаешь? Перестань так поступать и обратись к Богу, с плачем взывая: «Милосердный Господи, помилуй меня, грешного!»
И́кос
Помы́сли, душе́ моя́, го́рький ча́с сме́рти и стра́шный су́д Творца́ твоего́ и Бо́га: А́нгели бо гро́знии по́ймут тя́, душе́, и в ве́чный о́гнь введу́т: у́бо пре́жде сме́рти пока́йся, вопию́щи: Го́споди, поми́луй мя́ гре́шнаго.
Помысли, душа моя, о горьком часе смерти и о Страшном Суде Творца твоего и Бога. Ведь тогда Ангелы грозные возьмут тебя, душа, и в вечный огонь введут. Так покайся же прежде смерти, взывая: «Господи, помилуй меня, грешного!»
Пе́снь 7
Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Росоносною соделал печь Ангел для благочестивых отроков, а Божие веление, халдеев опалявшее, мучителя заставило взывать: «Благословен Ты, Боже отцов наших!»
Поми́луй мя, Бо́же, поми́луй мя.
Не наде́йся, душе́ моя́, на тле́нное бога́тство и на непра́ведное собра́ние, вся́ бо сия́ не ве́си кому́ оста́виши, но возопи́й: поми́луй мя́, Христе́ Бо́же, недосто́йнаго.
Не полагайся, душа моя, на тленное богатство и на неправедное стяжание; ведь не знаешь ты, кому всё это оставишь, но воззови: «Помилуй меня, Христе Боже, недостойного!»
Поми́луй мя, Бо́же, поми́луй мя.
Не упова́й, душе́ моя́, на теле́сное здра́вие и на скоромимоходя́щую красоту́, ви́диши бо, я́ко си́льнии и млади́и умира́ют; но возопи́й: поми́луй мя́, Христе́ Бо́же, недосто́йнаго.
Не надейся, душа моя, на телесное здоровье и на скоро преходящую красоту; ведь ты видишь, как сильные и молодые умирают, но воззови: «Помилуй меня, Христе Боже, недостойного!»
Сла́ва Отцу, и Сы́ну, и Свято́му Ду́ху. Воспомяни́, душе́ моя́, ве́чное житие́, Ца́рство Небе́сное, угото́ванное святы́м, и тьму́ кроме́шную и гне́в Бо́жий злы́м, и возопи́й: поми́луй мя́, Христе́ Бо́же, недосто́йнаго.
Вспомни, душа моя, о вечной жизни и о Царстве Небесном, уготованном святым, и о тьме кромешной и гневе Божием – злым, и воззови: «Помилуй меня, Христе Боже, недостойного!»
И ны́не, и при́сно, и во ве́ки веко́в, ами́нь. Припади́, душе́ моя́, к Бо́жией Ма́тери и помоли́ся То́й, е́сть бо ско́рая помо́щница ка́ющимся, умо́лит Сы́на Христа́ Бо́га, и поми́лует мя́ недосто́йнаго.
Припади, душа моя, к Божией Матери и помолись Ей, ибо Она, скорая Помощница кающимся, умолит Сына, Христа Бога, и Он помилует меня, недостойного.
Пе́снь 8
Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Из пламени Ты для благочестивых росу источил, и жертву праведника водою попалил: ибо Ты все совершаешь, Христе, одним Своим хотением. Тебя мы превозносим во все века.
Поми́луй мя, Бо́же, поми́луй мя.
Ка́ко не и́мам пла́катися, егда́ помышля́ю сме́рть, ви́дех бо во гро́бе лежа́ща бра́та моего́, безсла́вна и безобра́зна? Что́ у́бо ча́ю, и на что́ наде́юся? То́кмо да́ждь ми́, Го́споди, пре́жде конца́ покая́ние. (Два́жды)
Как мне не плакать, когда помышляю о смерти! Ибо видел я лежащего во гробе брата своего бесславным и безобразным. Чего же я жду и на что надеюсь? Только дай мне, Господи, прежде конца покаяние!
Сла́ва Отцу, и Сы́ну, и Свято́му Ду́ху. Ве́рую, я́ко прии́деши суди́ти живы́х и ме́ртвых, и вси́ во свое́м чи́ну ста́нут, ста́рии и млади́и, влады́ки и кня́зи, де́вы и свяще́нницы; где́ обря́щуся а́з? Сего́ ра́ди вопию́: да́ждь ми́, Го́споди, пре́жде конца́ покая́ние.
Верую, что Ты придёшь судить живых и мёртвых, и все по чину своему станут: старые и молодые, владыки и князья, девы и священники. Но где окажусь я? Потому взываю: «Дай мне, Господи, прежде конца покаяние!»
И ны́не, и при́сно, и во ве́ки веко́в, ами́нь. Пречи́стая Богоро́дице, приими́ недосто́йную моли́тву мою́ и сохрани́ мя́ от на́глыя сме́рти, и да́руй ми́ пре́жде конца́ покая́ние.
Пречистая Богородица! Прими недостойную молитву мою, и сохрани меня от внезапной смерти и даруй мне прежде конца покаяние!
Пе́снь 9
Ирмо́с: Бо́га челове́ком невозмо́жно ви́дети, на Него́же не сме́ют чи́ни А́нгельстии взира́ти; Тобо́ю же, Всечи́стая, яви́ся челове́ком Сло́во Воплоще́нно, Его́же велича́юще, с небе́сными во́и Тя́ ублажа́ем.
Невозможно людям увидеть Бога, на Которого не смеют и сонмы Ангелов взирать; но чрез Тебя, Всечистая, стало видимым для смертных Слово воплощённое. Его величая, мы вместе с небесными воинствами Тебя восхваляем.
Поми́луй мя, Бо́же, поми́луй мя.
Ны́не к ва́м прибега́ю, А́нгели, Арха́нгели и вся́ небе́сныя си́лы, у Престо́ла Бо́жия стоя́щии, моли́теся ко Творцу́ своему́, да изба́вит ду́шу мою́ от му́ки ве́чныя.
Ныне к вам прибегаю, Ангелы, Архангелы и все небесные Силы, у престола Божия стоящие: молитесь Творцу своему, да избавит Он душу мою от муки вечной!
Поми́луй мя, Бо́же, поми́луй мя.
Ны́не пла́чуся к ва́м, святи́и патриа́рси, ца́рие и проро́цы, апо́столи и святи́телие и вси́ избра́ннии Христо́вы: помози́те ми́ на суде́, да спасе́т ду́шу мою́ от си́лы вра́жия.
Ныне плачу пред вами, святые праотцы, цари и пророки, апостолы и святители, и все избранники Христовы: помогите мне на Суде, да спасет Господь душу мою от силы вражией!
Сла́ва Отцу, и Сы́ну, и Свято́му Ду́ху. Ны́не к ва́м воздежу́ ру́це, святи́и му́ченицы, пусты́нницы, де́вственницы, пра́ведницы и вси́ святи́и, моля́щиися ко Го́споду за ве́сь ми́р, да поми́лует мя́ в ча́с сме́рти моея́.
Ныне к вам возношу руки, святые мученики, пустынники, девственники, праведники и все святые, молящиеся ко Господу за весь мир, да помилует Он меня в час смерти моей!
И ны́не, и при́сно, и во ве́ки веко́в, ами́нь. Ма́ти Бо́жия, помози́ ми́, на Тя́ си́льне наде́ющемуся, умоли́ Сы́на Своего́, да поста́вит мя́ недосто́йнаго одесну́ю Себе́, егда́ ся́дет судя́й живы́х и ме́ртвых, ами́нь.
Матерь Божия, помоги мне, на Тебя крепко надеющемуся, умоли Сына Своего, да поставит Он меня, недостойного, справа от Себя, когда сядет судить живых и мёртвых! Аминь.
Моли́тва
Влады́ко Христе́ Бо́же, И́же страстьми́ Свои́ми стра́сти моя́ исцели́вый и я́звами Свои́ми я́звы моя́ уврачева́вый, да́руй мне́, мно́го Тебе́ прегреши́вшему, сле́зы умиле́ния; сраствори́ моему́ те́лу от обоня́ния Животворя́щаго Те́ла Твоего́, и наслади́ ду́шу мою́ Твое́ю Честно́ю Кро́вию от го́рести, е́юже мя́ сопроти́вник напои́; возвы́си мо́й у́м к Тебе́, до́лу пони́кший, и возведи́ от про́пасти поги́бели: я́ко не и́мам покая́ния, не и́мам умиле́ния, не и́мам сле́зы уте́шительныя, возводя́щия ча́да ко своему́ насле́дию. Омрачи́хся умо́м в жите́йских страсте́х, не могу́ воззре́ти к Тебе́ в боле́зни, не могу́ согре́тися слеза́ми, я́же к Тебе́ любве́. Но, Влады́ко Го́споди Иису́се Христе́, сокро́вище благи́х, да́руй мне́ покая́ние всеце́лое и се́рдце люботру́дное во взыска́ние Твое́, да́руй мне́ благода́ть Твою́ и обнови́ во мне́ зра́ки Твоего́ о́браза. Оста́вих Тя́, не оста́ви мене́; изы́ди на взыска́ние мое́, возведи́ к па́жити Твое́й и сопричти́ мя́ овца́м избра́ннаго Твоего́ ста́да, воспита́й мя́ с ни́ми от зла́ка Боже́ственных Твои́х Та́инств, моли́твами Пречи́стыя Твоея́ Ма́тере и все́х святы́х Твои́х. Ами́нь.
Владыка Христос Бог, страданиями Твоими страсти мои исцеливший и ранами Твоими язвы мои уврачевавший! Даруй мне, много пред Тобою согрешившему, слёзы сокрушения о грехах. Даруй моему телу принять благоухание животворящего Тела Твоего, и подай душе моей сладость Твоей драгоценной Крови вместо горечи, которой напоил меня враг. Возвысь к Тебе мой ум, к земле поникший, и возведи из пропасти погибельной. Ибо нет во мне покаяния, нет во мне сокрушения, нет во мне слёз утешительных, приводящих чад к Отчему дому. Омрачился я разумом в житейских страстях, не могу воззреть на Тебя в страдании, не могу согреться слезами любви к Тебе! Но, Владыка Господь Иисус Христос, Сокровищница благ! Даруй мне покаяние полное и сердце, с любовью трудящееся в поисках Тебя; даруй мне благодать Твою и обнови во мне черты Твоего образа. Я оставил Тебя — не оставь меня. Выйди искать меня, приведи на Своё пастбище и сопричисли меня к овцам Твоего избранного стада, напитай меня вместе с ними от хлеба Божественных Твоих Таинств, по молитвам Пречистой Твоей Матери и всех святых Твоих. Аминь.
........
Канон святаго, глас 2.
Песнь 1.
Ирмос: Во глубине́ постла́ иногда́ / фараони́тское всево́инство преоруже́нная си́ла, / вопло́щшееся же Сло́во всезло́бный грех потреби́ло есть: / препросла́вленный Госпо́дь сла́вно бо просла́вися.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Крести́телю и Предте́че Христо́в, / погружа́емый всегда́ сластьми́ теле́сными ум мой упра́ви / и во́лны страсте́й укроти́, / я́ко да в тишине́ Боже́ственней быв, песносло́влю тя.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Недоуме́нным просвети́вся просвеще́нием, / я́ко многосве́тлая звезда́, мы́сленному Восто́ку предте́кл еси́, / И́мже озари́тися се́рдцу моему́, Крести́телю, моли́, / омраче́нному все́ми бесо́вскими приложе́нии.
Сла́ва Отцу, и Сы́ну, и Свято́му Ду́ху. В реце́ бе́здну иногда́, Всему́дре, погрузи́л еси́, / пото́п содева́ющую благода́тию всего́ преступле́ния. / Но молю́ся, пото́ки, блаже́нне, мои́х прегреше́ний изсуши́, / Боже́ственным хода́тайством твои́м.
И ны́не, и при́сно, и во ве́ки веко́в, ами́нь. Чи́стыя Де́вы, Бо́га воплоти́вшия, / сро́дник был еси́, блаже́нне Предте́че, / с Не́ю же тя чтим и мо́лим, / и́же в Боже́ственнем хра́ме твое́м ны́не живу́ще, / хра́мы и нас сотвори́ Ду́ха Свята́го.
Песнь 3.
Ирмос: На ка́мени мя ве́ры утверди́в, / разшири́л еси́ уста́ моя́ на враги́ моя́, / возвесели́ бо ся дух мой, внегда́ пе́ти: / несть свят, я́коже Бог наш, / и несть пра́веден, па́че Тебе́, Го́споди.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Исцели́ стру́пы души́ моея́ / и ум мой, омраче́нный небреже́нием, / озари́ Боже́ственным твои́м хода́тайством, Госпо́день Предте́че, / и вся́каго изба́ви мя сопроти́внаго обстоя́ния, молю́ся.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Непло́дствие разреши́л еси́ ро́ждшия, / роди́вся Бо́жиим промышле́нием, прему́дре проро́че; / непло́дное у́бо се́рдце мое́ / плодоно́сно ны́не соде́лай, Госпо́день Предте́че, хода́тайством твои́м, / доброде́телей приноси́ти прозябе́ния.
Сла́ва Отцу, и Сы́ну, и Свято́му Ду́ху. Любо́вию твое́ю созида́ющаго Боже́ственный дом, / вы́шняго жития́ улучи́ти моли́, / и́же ве́рою храму твоему́ служа́щия, / хра́мы Ду́ха Боже́ственнаго сотвори́, / Крести́телю и Предте́че, хода́тайствы твои́ми.
И ны́не, и при́сно, и во ве́ки веко́в, ами́нь. Веселя́шеся Предте́ча, в ложесна́х носи́м ма́терних, / и покланя́шеся Го́споду, носи́му в ложесна́х Благода́тныя, / Его́же моли́ от вся́кия ско́рби изба́вити мя.
Го́споди, поми́луй, трижды.
Седален, глас 8.
Заха́риин глас све́тло разреши́ / Словесе́ глас ро́ждься, Предте́ча, / и зако́на непло́дие всем показа́, зовы́й: / пока́йтеся, су́щии на земли́, / се бо прии́де и яви́ся Иису́с, / вся хотя́ изба́вити от пе́рвыя кля́твы, просвеща́я Креще́нием. / Вои́стинну чу́до пресла́вно!
Сла́ва Отцу, и Сы́ну, и Свято́му Ду́ху. Глас 4.
Я́коже со́лнце све́тло, из чре́ва Елисаве́ти возсия́ нам Заха́риин сын, / и о́тчее разреши́ безгла́сие́, / и всем лю́дем в дерзнове́нии мно́зе, испра́вите, вопия́, путь Госпо́день, / и́бо Той свободи́т и спасе́т к Нему́ притека́ющия. / Его́же пропове́дал еси́, Иоа́нне, моли́ спасти́ся душа́м на́шим.
И ны́не, и при́сно, и во ве́ки веко́в, ами́нь.
Богородичен:
Обнови́ла еси́, Чи́стая, Бо́же́ственным Рождество́м Твои́м / истле́вшее во страсте́х земноро́дных ме́ртвенное существо́ / и воздви́гла еси́ вся от сме́рти к животу́ нетле́ния. / Те́мже Тя по до́лгу блажи́м вси, Де́во Препросла́вленная, я́коже прорекла́ еси́.
Песнь 4.
Ирмос: Прише́л еси́ от Де́вы не хода́тай, ни А́нгел, / но Сам, Го́споди, вопло́щся, / и спасл еси́ всего́ мя, челове́ка. / Тем зову́ Ти: сла́ва си́ле Твое́й, Го́споди.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Прекло́ншему небеса́ и челове́ком бесе́довавшу, / главу́ приклони́л еси́ десни́цею твое́ю, пребога́те; / е́юже мя соблюди́, / во смире́нии соблюда́я се́рдце мое́.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Пусты́ня тебе́ граждани́на непрохо́дная имя́ше, блаже́нне Предте́че, / те́мже вопию́ ти: / пу́сту вся́каго Боже́ственнаго дея́ния бы́вшу, / ду́шу мою́ снабди́.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Зако́н Боже́ственный управля́я, / беззако́нно закла́н был еси́. / Те́мже молю́ся тебе́: / беззако́ннующа мя всегда́ / и прельща́ема бесо́вскими прельще́ньми испра́ви.
Сла́ва Отцу, и Сы́ну, и Свято́му Ду́ху. Созда́в себе́ храм Влады́це Царю, / к Боже́ственным селе́нием ны́не преше́л еси́, Предте́че, / и́хже получи́ти моли́, тебе́ пресвяты́й дом Воздви́гшаго.
И ны́не, и при́сно, и во ве́ки веко́в, ами́нь. При́зри на мя неду́гующаго, Всенепоро́чная, / и разреши́ стра́сти моя́ лю́тыя и неудобоисце́льныя, / я́ко да велича́ю Тя, / возвели́чившую все челове́чество.
Песнь 5.
Ирмос: Просвеще́ние во тьме лежа́щих, / спасе́ние отча́янных, Христе́, Спа́се мой, / к Тебе́ у́тренюю, Царю́ ми́ра, / просвети́ мя сия́нием Твои́м, / ино́го бо, ра́зве Тебе́, бо́га не зна́ю.
Припев: Святы́й вели́кий Иоа́нне Предте́че Госпо́день, моли́ Бо́га о нас.
В тече́ниих Иорда́нских струю́ нетле́ния, / Предте́че, крести́в Христа́, моли́, / истека́ния страсте́й мои́х изсуши́ти, / и пото́ки сла́достныя насле́довати, / и пра́ведных кра́снаго ра́дования.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Уже́ рыда́ю, и содрага́юся стра́хом, / и недоуме́нием всегда́ содержи́мь есмь, / помышля́я моя́ соде́ланная / и бу́дущий суд ужа́сный, Благоутро́бне Го́споди, / пощади́ мя Твоего́ Крести́теля мольба́ми.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Законополага́яй лю́дем спасе́ние, / в раска́янии Предте́че, прегреше́ний бы́вшее, / посреде́ зако́на и благода́ти стал еси́. / Сего́ ра́ди мо́лим тя: / образми́ покая́ния нас просвети́.
Сла́ва Отцу, и Сы́ну, и Свято́му Ду́ху. Даждь ми вре́мя покая́ния, / уны́нно преше́дшее все ижди́вшему, Благоде́телю, / име́я на сие́ моля́щаго Тя, Сло́ве, / Иоа́нна вели́каго, Предте́чу и покая́ния всеми́рнаго пропове́дника.
И ны́не, и при́сно, и во ве́ки веко́в, ами́нь. Наве́ты и ловле́нии льсти́ваго умертви́хся, Влады́чице Всенепоро́чная, / оживи́ мя, я́же ро́ждшая Живо́т всех, Богоро́дице, ипоста́сный, / да Тя пою́ благоче́стно Всенепоро́чную.
Песнь 6
Ирмос: В бе́здне грехо́вней валя́яся, / неизсле́дную милосе́рдия Твоего́ призыва́ю бе́здну: / от тли, Бо́же, мя возведи́.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Глас Сло́ва пропове́давый, / всех гла́сы восприе́м, / проси́ грехо́в проще́ние дарова́ти / ве́рою пою́щим тя.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Сокруше́ние души́ моея́ исцели́, / и грехо́в бре́мя разреши́, / и па́че наде́жды спаси́ мя моли́твами твои́ми, / блаже́нне Предте́че.
Сла́ва Отцу, и Сы́ну, и Свято́му Ду́ху. Иису́са, Его́же руко́ю твое́ю крести́л еси́, Предте́че, моли́, / руки́ мя изба́вити греха́, / взима́юща к Нему́ ру́це при́сно, всесла́вне.
И ны́не, и при́сно, и во ве́ки веко́в, ами́нь. Дрема́нием ле́ностным одержи́мь есмь, / сон грехо́вный тяготи́т се́рдце мое́: / Твои́м, Пречи́стая, бде́нным хода́тайством, / воздви́гни и спаси́ мя.
Го́споди, поми́луй, трижды. Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Кондак, глас 3.
Пре́жде непло́ды днесь Христо́ва Предте́чу ражда́ет, / и той есть исполне́ние вся́каго проро́чества: / Его́же бо проро́цы пропове́даша, / на Сего́ во Иорда́не ру́ку положи́в, / яви́ся Бо́жия Сло́ва проро́к, пропове́дник, вку́пе и Предте́ча.
Икос:
Восхва́лим ны́не Госпо́дня Предте́чу, / его́же свяще́ннику Елисаве́ть роди́ из ложе́сн непло́дных, но не без се́мене: / Христо́с бо еди́н вмести́лище про́йде непроходи́мо без се́мене. / Иоа́нна непло́ды роди́, без му́жа же сего́ не роди́, / Иису́са же, осене́нием Отца́ и Ду́ха Бо́жия, Де́ва роди́ Чи́стая. / Но Безсе́менному яви́ся от непло́дныя проро́к и пропове́дник, вку́пе и Предте́ча.
Песнь 7.
Ирмос: Богопроти́вное веле́ние беззако́ннующаго мучи́теля / высо́к пла́мень вознесло́ есть. / Христо́с же простре́ Богочести́вым отроко́м ро́су духо́вную, / Сый благослове́н и препросла́влен.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Из ко́рене секи́рою твоего́ покая́ния / исто́рг я́звы стра́стнаго се́рдца моего́, / всади́, Предте́че, Боже́ственное безстра́стие / и страх чисте́йший Бо́жий, / вся́кия зло́бы отчужда́ющий мя.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Во струя́х Иорда́нских, я́ко крести́л еси́ / покрыва́ющаго вода́ми превы́спренняя Го́спода, / Того́ моли́ во́ду дарова́ти Боже́ственнаго умиле́ния / при́сно очи́ма мои́ма, сла́вный Предте́че.
Сла́ва Отцу, и Сы́ну, и Свято́му Ду́ху. И́же ми́ру взе́млющаго грех, / А́гнца Бо́жия, Предте́че, пропове́дав, / Того́ моли́ от ко́злищ ча́сти яви́ти мя чу́жда, / и десны́м Его́ овца́м и мене́ сочета́ти, сла́вне.
И ны́не, и при́сно, и во ве́ки веко́в, ами́нь. Непло́дная утро́ба нося́ше Тя, Де́во, / во чре́ве носи́вшую Сло́во воплоще́нно, / Его́же Боже́ственными взыгра́нии вели́кий Предте́ча, / непло́дныя всесвяты́й плод, / позна́ ра́дуяся и поклони́ся.
Песнь 8.
Ирмос: Пещь иногда́ о́гненная в Вавило́не де́йства разделя́ше, / Бо́жиим веле́нием халде́и опаля́ющая, / ве́рныя же ороша́ющая, пою́щия: / благослови́те, вся дела́ Госпо́дня, Го́спода.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Даждь десни́цу мне, на земли́ лежа́щему, Предте́че, / и́же десни́цу просте́р и омы́л еси́ вода́ми Нескве́рнаго: / и изба́ви мя скве́рны теле́сныя, / всего́ мя очища́я покая́нием, и спаси́ мя.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Иму́щи, душе́, вре́мя пока́ятися, / ле́ности тяжча́йший сон оттряси́ / и спе́шно побди́, вопию́щи Влады́це твоему́: / Милосе́рде, уще́дри мя, / Крести́теля Твоего́ мольба́ми.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Пото́цы страсте́й и во́ды зло́бы / до души́ моея́ внидо́ша, блаже́нне Предте́че, / потщи́ся ско́ро изъя́ти мя, / и́же ре́чными струя́ми измы́в / безстра́стия тиша́йшую пучи́ну.
Сла́ва Отцу, и Сы́ну, и Свято́му Ду́ху. Увы́ мне, мно́га зла сотво́ршему! / Увы́ мне, еди́ному прогне́вавшему Бо́га Преблага́го! / Крести́телю Христо́в, помози́ ми, / и пода́ждь прегреше́ний мои́х разреше́ние, / и долго́в мои́х отсече́ние твои́ми хода́тайствы.
И ны́не, и при́сно, и во ве́ки веко́в, ами́нь. Вы́шняго Бо́га пло́тию ро́ждшая, / от гно́я мя возста́ви страсте́й, оскорбля́ющих мя: / и лю́те всего́ обнища́вша, / Боже́ственными обогати́, Пречи́стая, доброде́тельми, / я́ко да воспою́ Тя спаса́емь.
Песнь 9.
Ирмос: Безнача́льна Роди́теля Сын, Бог и Госпо́дь, / вопло́щся от Де́вы, нам яви́ся, / омраче́нная просвети́ти, собра́ти расточе́нная. / Тем Всепе́тую Богоро́дицу велича́ем.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Ка́ла мя изба́ви грехо́внаго, Го́споди, / Безгре́шне Еди́не и Многоми́лостиве, / Крести́теля мольба́ми, / и́же Тебе́ пропове́давый всему́ ми́ру А́гнца Бо́жия, / взе́млющаго челове́ков грехи́.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Я́ко ши́пок благово́нен, я́ко благоуха́нный кипари́с, / я́ко неувяда́емый крин, я́ко ми́ро че́стно / име́яй тя, Госпо́день Предте́че, / мои́х дел злосмра́дия избавля́юся моли́твами твои́ми, / притека́я к покро́ву твоему́.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Непло́дствовати мя непло́дными де́лы, всеблаже́нне, сотвори́, / доброде́телей благопло́дие при́сно принося́ща, / ча́до мя Госпо́дне творя́, / и прича́стника Боже́ственному Ца́рствию, / и святы́х собо́ру купножи́теля.
Сла́ва Отцу, и Сы́ну, и Свято́му Ду́ху. Нам лю́бящим тя, любо́вию почита́ющим, / и в Боже́ственнем хра́ме твое́м лику́ющим, / даждь с небесе́ разреше́ние лю́тых, Предте́че Госпо́день, / и жития́ исправле́ние, и прегреше́ний избавле́ние.
И ны́не, и при́сно, и во ве́ки веко́в, ами́нь. Носи́му во утро́бе Богома́терни, вся нося́щему ма́нием, / поклони́лся еси́, проро́че: / с Не́юже моли́ смире́нней спасти́ся души́ мое́й, / во мно́гая впа́дающей по вся дни согреше́ния.
Светилен, глас 4:
Предте́чу Иоа́нна, и крести́теля Спа́сова, / во проро́цех проро́ка и пусты́ни воспита́ние, / Елисаве́тино рожде́ние восхва́лим вси.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен:
Сла́дость А́нгелов, скорбя́щих ра́дость, / христиа́н предста́тельница, Де́во Ма́ти Госпо́дня, / заступи́ нас, и изба́ви ве́чных мук.
Молитва:
Крести́телю Христо́в, пропове́дниче покая́ния, ка́ющагося не пре́зри мене́, но совокупля́яся с во́и Небе́сными, моли́ся ко Влады́це за мене́ недосто́йнаго, уны́лаго, немощна́го и печа́льнаго, во мно́гия беды́ впа́дшаго, утружде́ннаго бу́рными по́мыслы ума́ моего́; аз бо есмь верте́п злых дел, отню́дь не име́яй конца́ грехо́вному обы́чаю; пригвожде́н бо есть ум мой земны́м ве́щем, что сотворю́, не вем, и к кому́ прибе́гну, да спасе́на бу́дет душа́ моя́? То́кмо к тебе́, святы́й Иоа́нне, благода́ти тезоимени́те, я́ко тя пред Го́сподем по Богоро́дице вем бо́льша бы́ти рожде́нных всех, и́бо ты сподо́бился еси́ косну́тися верху́ Царя́ Христа́, взе́млющаго грехи́ ми́ра, А́гнца Бо́жия. Его́же моли́ за гре́шную мою́ ду́шу, да поне́ от ны́не, в пе́рвыйна́десять час, понесу́ тяготу́ благу́ю и прииму́ мзду с после́дними. Ей, Крести́телю Христо́в, честны́й Предте́че, кра́йний проро́че, пе́рвый во благода́ти му́чениче, по́стников и пусты́нников наста́вниче, чи́стоты учи́телю и бли́жний дру́же Христо́в, тя молю́, к тебе́ прибега́ю: не отри́ни мене́ от твоего́ заступле́ния, но возста́ви мя па́дшагося мно́гими грехи́, обнови́ ду́шу мою́ покая́нием, я́ко вторы́м креще́нием, поне́же обоего́ нача́льник еси́, креще́нием омыва́яй прароди́тельный грех, покая́нием же очища́яй коего́ждо де́ло скве́рно. Очи́сти мя, греха́ми оскверне́ннаго и пону́ди вни́ти, а́може ничто́же скве́рно вхо́дит, во Ца́рствие Небе́сное, ами́нь.