Дар рӯза се фарз аст: Аввал, ният кардан. Дуюм, аз субҳи содиқ то фурӯ рафтани офтоб (намози шом) хӯрдану нӯшиданро тарк намудан. Сеюм, аз субҳи содиқ то фурӯ рафтани офтоб тарки алоқаи ҷинсӣ кардан.
Баъди саҳархӯрӣ дандонҳоро тоза шуста, чунин ният мекунанд: “Навайту ан асума шаҳра Рамазона минал фаҷри илал мағриби”. (Ният кардам рӯзаи моҳи Рамазонро аз субҳи содиқ то шом). Ё ин ки “Ва ли савми ғаддин мин шаҳри Рамазониллазӣ фаризатан навайту” (Ният кардам рӯзаи фарзии фардоро, ки аз моҳи Рамазон аст). Барои ҳар як рӯз алоҳида ният кардан зарур аст.
Дар вақти рӯзакушоӣ ин дуоро мехонанд: “Аллоҳумма лака сумту ва бика оманту ва алайка таваккалту ва ло ризқика афтарту”. (Парвардигоро, барои ризои ту рӯза гирифтам, ба ту имон овардам, ба ту таваккал кардам ва ба ризқи додагиат ифтор намудам).
Рӯзаро бо мева (хурмо, мавиз, себ), намак ва ё ҷуръаи об кушодан хуб аст.
ТАРТИБ ВА ҚОИДАҲОИ РӮЗАДОРӢ
Рӯза яке аз рукнҳои панҷгонаи бинои мусулмонӣ буда, ба ҳар мусулмони оқилу болиғ фарз аст. Рӯза гирифтан се фарз дорад:
1) Ният.
2) Аз субҳи содиқ то фурӯ рафтани офтоб чизе нахӯрдану напӯшидан.
3)Аз субҳ то шом тарки алоқаи ҷинсӣ кардан.
Барои рӯзадор саҳархӯрӣ намудан суннат аст.
Чунончи Паёмбари гиромиқадри ислом (саллаллоху алайхи вассалам) дар фазилати саҳархӯрӣ фармудаанд: "Саҳарӣ бихӯред, зеро саҳархӯрӣ дорои баракат аст".
Ва дар ҳадиси дигар баён кардаанд: "Фарқ байни рӯзаи мо (мусулмонон) ва рӯзаи аҳли китоб (яҳудиву насрониҳо) дар хӯрдани саҳарӣ аст. Барои шахси рӯзадор чизе хондан, безарурат ба нӯги забон таъми чизеро чашидан, бо мақсади таскини ҳарорат дар об нишастан, дар ҳаммом зиёда аз ҳоҷат бисёр истодан, дар обҳои бузург мисли рӯду ҳавз ва кӯл оббозӣ кардан (ба шарте ки об ба дарунаш наравад. Агар об ба дарун равад, рӯзааш мешиканад) бо мардум гапҳои сахт гуфтану ҷанг кардан, чизҳои беҳударо тамошо кардан, тамоми рӯзро ба хоб ё бекорӣ гузаронидан, шаб ифтор накарда ду рӯз паиҳам рӯза гирифтан ва яке аз суннатҳои рӯзаро тарк намудан макрӯҳ аст. Дар ин ҳолатҳо рӯза нашиканад ҳам савоби рӯза кам мешавад.
Ҳар касе барқасдона чизе бихӯрад, бинӯшад ва ё алоқаи ҷинсӣ намояд, рӯзааш мешиканад. Ба ӯ лозим аст, ки барои кафорати якрӯза рӯзаи табоҳшудааш баъди Рамазон, ду моҳ паиҳам рӯза дошта сипас як рӯз рӯзаи қазоӣ гирад. Ва ё шаст мискинро як рӯз таом дода, як рӯз рӯзаи қазоӣ ният кунад".
Тавре дар боло гуфтем, рӯза бо ният саҳеҳ мешавад. Агар кас рӯзи дароз гуруснаю, ташна гардаду нияти рӯза накунад, он ҳеҷ манфиате надорад. Кӯшиш бояд кард, ки то дамидани субҳ (баъди хӯрдани саҳархӯрӣ) нияти рӯза карда шавад. Масалан, ин бегоҳ барои рӯзаи фардо метавонед ният кунед: "Вали савми ғаддин мин шаҳри Рамазон аллазӣ фаризатан навайту" (Ният кардам рӯзаи фарзии фардоро, ки аз моҳи Рамазон аст).
Барои ҳар рӯзи Рамазон алоҳида ният кардан лозим меояд.
Рӯзаро пеш аз хондани намози шом бо хурмою намак, мавиз об ё мева кушодан суннат аст. Зимни рӯзакушоӣ ин дуоро мехонанд: "Аллоҳума лака сумту ба дика аманту ва алайки таваккалту ва ало ризқина афтарту" (Парвардигоро, танҳо барои ту рӯза доштам, ба ту имон овардам, бар ту таваккал кардам ва аз ризқи додагиат ифтихор мекунам).
Худованди меҳрубон бо бандагонаш осониро хоста, душвориро намехоҳад. Аз ин рӯ Ҳақ Таъоло иддае аз бандагонашро, ки дар ин моҳи муборак рӯза гирифтан барояшон душвор аст, муваққатан озод кардааст. Чунончӣ.
...Вале оне, ки бемор асту маҳҷур,
Мусофир аст ӯ андар раҳи дур.
Ва ё марде ҳақиру нотавон аст,
Зане дар сина ширу ё дуҷон аст.
Ҳуқуқ аз амри ҳақ доранд, ишон,
Дар ин моҳи шариф аз обу аз дон.
Бинӯшанду биёшоманд, аммо,
Ба ҳар рӯзе, ки рафт аз он муаммо.
Қазо доранд ё бар шахси носер,
Диҳанд аз нуқли худ накарда бас дер.
("Тафсири Зарнигор", саҳ. 470)
Агар занони ҳомила ва кӯдаки ширмакдошта хавф баранд, ки рӯзадорӣ ба саломатиашон ё тандурустии кӯдаконашон зиён меоварад, пас аз таваллуд ё тамом шудани ширхорагии кӯдак рӯза мегиранд.
Баъди Рамазон ба шумораи рӯзҳои хӯрдагиашон метавонанд рӯзаи қазоӣ ният кунанд.
Рӯза доштан одоби махсусро талаб мекунад. Машоих шаш чизро одоби рӯзадорӣ шумурдаанд. Якум, нигоҳ доштани чашм аз назар кардан ба чизҳои номашрӯъ. Рӯзадор бояд ончунон эҳтиёткор бошад, ки на танҳо ба занони бегона, балки ба ҳамсари худ (рӯзона) бо шаҳват нигоҳ накунад. Дар ҳоли рӯзадорӣ ба тамошои лаҳву маъаб (бозию мащшғулиятҳои бефоида, беҳудагардӣ) наравад. Ҳазрати Муҳаммад (саллаллоху алайхи вассалам) фармудаанд: «Нигоҳ тире аз тирҳои заҳрогини Иблис аст. Касе аз тарси Худованд чашмашро аз нигоҳҳои ноҷо маҳфуз дорад, Худованд дар ба дари он ба ӯ нуре аз имон ато хоҳад кард, ки лаззату ҳаловати онро дар дилаш эҳсос хоҳад кард».
Дуюм, ҳифз кардани забон аз дурӯғу суханчинӣ, лағву беҳудагӯӣ, ғайбату бадгӯӣ, тӯҳмат, дашном, ҷосусӣ ва хиёнат нигоҳ дорад.
Cеюм, ҳифзи гӯш аз шунидани алфози бемаънию сӯҳбатҳои нолоиқ, зеро ғайбаткунандаву ғайбатшунаванда, дурӯғгӯю дурӯғшунав дар гуноҳ баробаранд.
Чорум, ҳифзи ҳама аъзои бадан аз гирифторӣ ба гуноҳ. Масалан, нигоҳдории даст аз дуздӣ ва латукӯби шахси бегуноҳ. Нигоҳдории пой аз рафти маҷлису маҳфилҳои нораво. Ҳифозати шикам аз хӯрдани чизҳои шубҳанок. Касе, ки рӯза мегирад ва бо моли ҳаром ифтор мекунад ба шахсе монанд аст, ки мехоҳад худро аз беморие табобат намояд, аммо ҳамроҳи доруҳо заҳр низ истифода карда худро ба ҳалокат мерасонад.
Панҷум, ҳангоми ифтор аз пурхӯрӣ худдорӣ намудан Расули Акрам (саллаллоху алайхи вассалам) фармудаанд: «Одамизод ҳеҷ зарферо пур намесозад, ки бадтар аз шикамаш бошад. Барои одамӣ чанд луқмае, ки ба воситаи он қуввати миёнашро рост карда тавонад, кофи мебошад. Агар шахсе бештар аз инро хӯрдан хоҳад бояд меъдаашро се тақсим намояд: Як ҳисса барои хӯрок ва ҳиссаи дуввумӣ барои нӯшокӣ ва ҳиссаи саввумиро холӣ бигзорад то нафасгириаш хуб бошад».
Имом Ғазолӣ (р) мегӯяд: «Агар одамӣ ҳангоми ифтор он қадар бихӯрад, ки он чиро нисфирӯзӣ нахӯрда буд, бихӯрад, мақсуди рӯзаро, ки саркӯб кардани иблису шаҳват аст, чӣ гуна метавонад ҳосил намояд?» Дар воқеъ шахси пурхӯр бо чунин рӯзадорӣ ғайр аз тағйир додани вақти хӯрок чизи дигареро анҷом надодааст.
Шашум, рӯзадор дар поёни рӯза умедвор бошад, ки рӯзааш ба мақоми қабул расидааст ва низ бимноку тарсон бошад, ки мабодо рӯзааш қабул нашуда бошад, чӣ кор хоҳад кард? Пас аз Худованди бениёз бо илтиҷову зорӣ бихоҳад то рӯзаи ӯро қабул фармояд.
Присоединяйтесь к ОК, чтобы подписаться на группу и комментировать публикации.
Нет комментариев