Предыдущая публикация
#Modric Կարիուսը ՉԼ-ի եզրափակչում Ռամոսի հարվածից հետո ուղեղի ցնցում է ստացել
Բոսթոնի հիվանդանոցի բժիշկները հայտարարությամբ են հանդես եկել կապված «Լիվերպուլի» դարպասապահ Լորիս Կարիուսի առողջության հետ:
Հաղորդվում էր, որ 24-ամյա գերմանացին Չեմպիոնների լիգայի եզրափակչի` «Ռեալի» հետ խաղի գրեթե ամբողջ երկրորդ կեսն անցկացրել է ունենալով ուղեղի ցնցում, որը վերջինս ստացել էր մադրիդցիների պաշտպան Սերխիո Ռամոսի` արմունկով հարվածից հետո:
Կարիուսը մայիսի 31-ին Բոսթոնում այցելել է գլխի վնասվածքների մասնագետ Ռոսա Զաֆոնտեին և Մասաչուսետսի հիվանդանոցում կատարել է գլխի ռենտգեն, և ահա թե ինչ հայտարարությամբ են հանդես եկել Կարիուսին բուժող բժիշկները.
«Այսօր մենք բազմաթիվ զանգեր ենք ստանում «Լիվերպուլի» դարպասապահ Լորիս Կարիուսի առողջության վերաբերյալ: Կարիուսի թույլտվությամբ, մենք որոշակի տեղեկատվություն կհաղորդենք, որպեսզի կանխենք սխալ կամ չճշտված տեղեկատվության հնարավոր տարածումը:
Մայիսի 31-ին Կարիուսը բազմակողմանի բուժզննում է անցել բժիշկ Ռոսա Զաֆոնտեի և բժիշկ Լենորա Հերգետայի հետ: Մանրակրկիտ բուժզննման արդյունքում մենք եկել ենք այն եզրահանգման, որ Կարիուսը մայիսի 26-ին կայացած խաղի ընթացքում ուղեղի ցնցում է ստացել:
Հնարավոր է` սա ազդել է Կարիուսի ելույթի վրա: Դարպասապահն այժմ նշում է, որ իրեն արդեն բավականին լավ է զգում: Մենք ակնկալում ենք, որ նա ամբողջովին կվերականգնվի:
Սա միակ մեկնաբանությունն է,որ մենք կանենք այս հարցի շուրջ: ԶԼՄ-ների բոլոր հարցերն այսուհետ պետք է ուղղվեն «Լիվերպուլի» մամուլի քարտուղարությանը»,- ասվում է բժիշկների տարածած հաղորդագրության մեջ:
Հիշեցնենք` Ռամոսի հետ ունեցած բախումից րոպեներ անց Կարիուսը կոպիտ սխալ է թույլ տվել, ինչի արդյունքում «Ռեալի» հարձակվող Կարիմ Բենզեման գրավել է մերսիսայդցիների դարպասը: Խաղավարտին Կարիուսը ևս մեկ սխալ էր թույլ տվել` Գարեթ Բեյլի հեռահար հարվածից հետո: Արդյունքում, «Լիվերպուլը» 1:3 հաշվով պարտություն է կրել:
Следующая публикация
Нет комментариев