Предыдущая публикация
#Adm
https://youtu.be/_p_nQiEpxKs
04:59
Արամ MP3-ի էներգետիկ համերգը, «Վեր ու վար» տեսահոլովակի պրեմիերան և Արամայիս Հայրապետյանի ստացած այրվածքը նկարահանման ժամանակ
Tert.am Life-ն իր ընթերցողներին արդեն պատմել է Արամ MP3-ի նոր երգի և տեսահոլովակի նկարահանման նախապատրաստական աշխատանքների մասին: Տեսահոլովակի պրեմիերան երգիչն ազդարարեց համերգային ծրագրով:
Պարային ռիթմեր, արդեն սիրված, աշխույժ կատարումներով երգացանկ և, իհարկե, ակտիվ հանդիսատես. այսպես անցավ երգչի համերգը: Tert.am Life-ը ներկա է եղել երեկոյին ու ֆիքսել հետաքրքիր պահերը, զրուցել Արամի հետ նոր աշխատանքի և սպասելիքների մասին:
Մինչ նոր տեսահոլովակը կցուցադրվեր մեծ էկրանին՝ Արամ MP3-ն հանդիսատեսին վարակեց դրական էներգետիկայով՝ հիշեցնելով իր արդեն սիրված ռիթմիկ կատարումները: Համերգային ծրագրի վերջին երգը «Սկսում ենք» կատարումն էր: Դրան հաջորդեց սպասված պահը՝ «Վեր ու վար» տեսահոլովակի պրեմիերան:
Տեսահոլովակի ռեժիսորն Արամայիս Հայրապետյանն է, երգի երաժշտության հեղինակն Արամն է, խոսքերը գրել են Ավետ Բարսեղյանն ու Ֆելիքս Խաչատրյանը, գործիքավորումն արել է Lazzaro-ն:
Արամը նշեց, որ նոր աշխատանքը նախորդ ռիթմիկ կատարումների տրամաբանական շարունակությունն է և հույս հայտնեց, որ այն նույնպես կսիրվի լսարանի կողմից:
«Տեսահոլովակը նկարահանել ենք 10 օր առաջ Ենոքավանի տարածքում, Ապագա գյուղում: Տեսահոլովակի բոլոր հերոսները այդ գյուղի բնակիչներն են, բացառությամբ երկոսի: Նկարահանումից մի քանի օր առաջ ռեժիսորն ու նկարահանող անձնակազմը գնացել էին այնտեղ, խոսել բնակիչների հետ: Բոլորը սրտաբաց հյուրընկալել էին և ուրախությամբ համաձայնել խաղալ տեսահոլովակում: Ես հուսով եմ, որ սա կդառնա ամառային բարձր տրամադրություն հաղորդող և ուրախություն պարգևող երգ»,-ասաց Արամը: Երգիչը տեսահոլովակում երևում է միայն մեկ կադրում:
Արամ MP3-ի վերջին մի քանի երգերը պարային և ռիթմիկ տրամադրությամբ են: «Ես եմ այդպիսին: Ես տխուր երգ չեմ ունեցել: «Եվրատեսիլի» երգն էր տխուր, որովհետև «Եվարտեսիլն» էր տխուր:)»,- իրեն հատուկ հումորով նկատեց Արամը:
Տեսահոլովակում հումորային էլեմենտներ ևս կան: Նկարահանման ընթացքն էլ, Արամի խոսքով ուղեկցվել է ծիծաղաշարժ պահերով. «Ամենածիծաղաշարժն ինձ համար այն էր, որ նկարահանման օրը Մայիսը որոշել էր շորտով սար բարձրանալ: Վերջում երրորդ կարգի այրվածք էր ստացել, չէր կարողանում քայլել, ոտքերը վեր պարզած հասել ենք Երևան: Դեռ շարունակվում է լավության տակից դուրս գալու պրոցեսը:)»:
Արամ MP3-ի նոր աշխատանքը հանդիսատեսն ընդունեց ջերմ ծափահարություններով, իսկ երեկոյի ավարտին շատերն օգտվեցին նրա հետ «սելֆի» ունենալու հնարավորությունից:
Следующая публикация
Нет комментариев