Предыдущая публикация
Ժպտում են մեր մեծերը
՛՛Ոզնու՛՛ զրույցը Շիրազի հետ
-- Ինչպե՞ս ես ,Շիրազ:
-- Մասիսի պես :
-- Այսինքն:
-- Հավերժակա՛ն:
-- Իսկ ինչպիսի՞ն է Մասիսը:
-- Ինձ նման ... մեծ:
-- Ինչպե՞ս ես պատկերացնում աշխարհի վաղվա օրը :
-- Աշխարհը հավերժ կապրի , ինչպես Մասիսը:
-- Իսկ ո՞րն է հայ ժողովրդի հավերժության գրավականը :
-- Հայ ժողովուրդը մեն- մենակ չի կրնա ապրի...
Մեր ազգը ախպեր ու ընգեր շատ է սիրել և շատ կսիրե : Սիսն առանց Մասիսի չի կրնա , ինպես որ Լենինականս՝ առանց Արագածիս...
-- Ինչու՞ են լենինականցիներն այդքան սրամիտ:
-- Տեղները բարձր է . Աստծուն ավելի մոտ են :Կգա ժամանակ , Մասիսին էլ կմոտենան : Դարը կլավանա:
-- Որպես Մասիս և Արարատ սարի երգիչ՝ ի՞նչ կասես ՛՛ Արարատ ՛՛ թիմի մասին:
-- Եթե ՛՛ Արարատը՛՛ Արարատը միշտ իր հոգու մեջ չպահե , չի կրնա հաղթե...
-- Ի՞նչ կասես արտագաղթողների մասին :
-- Իդոնց անունները չտաս ... Մասիս չեն սիրե :
-- Մենաշատը ո՞ր մասնագիտությունը կսիրես:
-- Հողագործինը: Գուզեի հողամաս ունենայի՝ էրեխեքիս ոտները հողից չկտրվեն: Չունեմ:
-- Երեխաներիդ անունները կարո՞ղ ես հերթով թվել:
-- Ի՞նչ կսեք ... Մեծինս՝ Արա Շիրազ / Արա Գեղեցիկիս անունն է /, հետո՝ Մասիս Շիրազ /սարիս անունն է / ,Սիփան Շիրազ / մյուս սարիս անունը / , Աստղիկ Շիրազ /մորս անունը / , Արաքս Շիրազ , Թադևոս Շիրազ/ հորս անունը/, Անի Շիրազ / քաղաքիս անունը/ Վան Շիրազ / մյուս քաղաքիս անունը /: Մի խոսքով՝ յոթ զավակ եմ տվել ազգիս , յոթ Մասիս ...
-- Ի՞նչ կարծիքի ես նոր բանաստեղծների մասին:
-- Հեչ : Ընձի չեն հետևե : Իդոնց գրածները օրըմ կարդացի, ուղեղս ցավեց ... Մեջները Մասիս չկա ... Մի գիրք գրում են , երկու գիրք է դառնում , այսինքն մի գրքի չափ էլ փոշի է նստում վրան ...
-- Քննադատների մասին ի՞նչ կասես:
-- Անունները չտաս: Ազնիվ չեն : Ով ինձի կգնահատի ,էնիկ է ազնիվ: Մայրիկս ինչըխ կգնահատեր ինձի ...
-- Մայրիկիդ ո՞ր խոսքն ես միշտ հիշում:
-- Ով էլ մեր տուն գար , ինքը վախենալով կըսեր . ՛՛ Շիրազիս լավ աշեք ...՛՛ Երբ էրեխեքը մորս համար կարդում էին գրքերս, ծնկներին էր խփում . ՛՛ Խե՜ղճ տղա ... Խե՜ղճ տղա...՛՛
-- Ինչու՞ բնակարանդ չես նորոգում:
-- Մորս ձեռքերի հետքերը կան ...
-- Ինչպե՞ս ես ոգելից խմիչքների հանդեպ՞
-- Տանել չեմ կարող :Մեկ - մեկ էլ ,որ շատ կստիպեն ,վանել չեմ կարող :
-- Ի՞նչ կուզեիր ,որ դառնային երեխաներդ:
-- Զորավարներ :
-- Ի՞նչ երկրում ես եղել:
-- Ոչ մի:
-- Տրանսպորտի ի՞նչ տեսակից ես օգտվում:
-- Ոչ մի :
-- Ինքնաթիռ էլ չե՞ս նստում :
-- Ոչ ինքնաթիռ , ոչ էլ ... վերելակ:
-- Ինչու՞ :
-- Վախենում եմ մեռնեմ , Մասիս երգող չլինի ...
-- Ինչու՞ է ժողովուրդը քեզ այդքան սիրում:
-- Ժողովրդին հարցրեք :
-- Ինչու՞ ես հանդիսավոր նիստերին ուշացումով ներկայանում:
-- Որպեսզի հակառակորդներս տեսնեն ժողովրդի սերը ...
-- Ե՞րբ ես զգացել քո հասունությունը :
-- Երբ ավարտել եմ մանկությունը : Իմ առաջին աշխատավարձը եղել է ... մի բուռ աղանձը : Ազատան գյուղում ուսուցիչ ուղարկվեցի , բայց երկար չմնացի : ՛՛ Դասի ժամանակ աղանձ ուտել չի կարելի ՛՛, ասել եմ երեխաներին և աղանձը նրանցից վերցնելով՝ ինքս կերել ...
-- Դու գրել ես . ՛՛Առակի ուժը կարճության մեջ է , շունը առյուծի վրա կհաչե ՛՛ : Իսկ ինչի՞ մեջ է պոեմի ուժը:
-- Պոեմի ուժն էլ էնոր մեջ է , որ շունը հաչե , թե չհաչե , հեղինակի վեջը չէ :
-- Ի՞նչ կարծիքի ես ... կանանց մասին:
-- Երբ ջահել էի ,իմ հանդեպ Մասիսի լանջի ծաղիկ էին ,
հիմա ... Մասիսի ձյուն են :
-- Իսկ ի՞նչ կարծիքի ես ՛՛ Ոզնու ՛՛ մասին :
-- Ուրախ եմ ,որ իմ դեմ չի գրե ...ուրեմն լավն է:
Զրույցը վարեցին՝ Ն .Միքայելյանը
Ա . Սահակյանը
Հովհ . Շիրազ ՛՛ Մի փետուր իմ արծիվ կյանքից ՛՛ գրքից, 1984 թ.
Следующая публикация
Комментарии 4
Մասիսի պես մեծ Շիրազ,Շիրազի պես մեծ Մասիս։
Շնորհակալ եմ թեման տեղադրողից։