Предыдущая публикация
Ո՞րն է չարիքի ու տառապանքի արմատը
Մենք շարունակում ենք շարքը, որը կրում է «Աստծու բարությունը մեղրից էլ քաղցր է» անվանումը։ Այս շարքի առաջին ուղերձի մեջ մենք խոսել ենք այն մասին, թե ինչ է բարությունը։ Բարությունը կապ ունի մարդու կարիքի հանդեպ մեկ ուրիշի հոգատար ու անշահախնդիր արձագանքի հետ։ Աստված բարի է։ Աստված գիտի մեր իրական կարիքը և ամեն բան անում է մեզ օգնելու համար։
Սիրելի՛ բարեկամ, շատերը չեն ընկալում Աստծու բարությունը, քանի որ չեն տեսնում իրենց կյանքի իրական կարիքները։ Ոչ հոգևոր մարդիկ հաճախ են շփոթում ցանկությունները կարիքի հետ։ Ինչպիսի՞ն են մարդկանց աղոթքները։ Մենք մի բան ենք ուզում, հետո մեկ ուրիշ բան և այդպես շարունակ։ Տեսնում ենք, ցանկանում ենք ունենալ, և մեզ թվում է, թե այս աշխարհի ունեցվածքին տիրանալը մեզ երջանկացնելու է։
Ցանկությունը և կարիքը բացարձակապես տարբեր բաներ են։ Եվ մարդկանց մեծամասնությունը չի կարողանում զանազանել դրանք, քանի որ միայն Աստծու Խոսքը՝ Աստվածաշունչն է լույս սփռում մարդու իրական կարիքի վրա։ Մենք կհասկանանք մեր մեծագույն կարիքը, եթե հասկանանք, թե ո՛րն է այս աշխարհում առկա չարիքի ու տառապանքի արմատը։
«Արդ այն ժամանակ ի՞նչ պտուղ ունեիք, որի համար հիմա ամաչում եք, որովհետև դրանց վերջը մահն է։ Բայց հիմա, որ մեղքից ազատված եք և Աստծու ծառա եք դարձել, սրբագործվելու համար ձեր պտուղն ունեք, և դրա վերջը հավիտենական կյանքն է։ Որովհետև մեղքի հատուցումը մահն է, իսկ Աստծու շնորհը՝ հավիտենական կյանքը մեր Տեր Հիսուս Քրիստոսի միջոցով» (Հռոմեացիս 6․21-23):
Մեղքը բոլոր չարիքների և այս աշխարհում առկա տառապանքի արմատն է։ Անշուշտ, գալու է ժամանակ, երբ Տերը վերադառնալու է և հաստատելու է մի այնպիսի թագավորություն այս երկրի վրա, որտեղ մեղք չի լինելու և արդարությունն է տիրելու։ Սակայն մինչև այդ մենք կարող ենք Նրա Արքայությունն ընդունել մեր կյանքերի մեջ։ Սա է մեր հոգիների մեծագույն կարիքը։
Ոչ թե նոր մեքենան կամ հեռախոսը, նոր զարդը կամ էլ աշխատանքն ու նորաոճ հագուստը, այլ՝ Տիրոջ Արքայությունը մեր սրտերի մեջ ընդունելը։
«Որովհետև Աստծու արքայությունն ուտելիք և խմելիք չէ, այլ արդարություն, խաղաղություն և ուրախություն Սուրբ Հոգով։ Ով այս կերպով է ծառայում Քրիստոսին, Աստծուն հաճելի է ու մարդկանց՝ գովելի» (Հռոմեացիս 14․17-18):
Աստծու համար թանկ ու սիրելի՛ զավակ, մարդիկ մեծամասամբ չեն ընկալում Տեր Աստծու բարությունը, քանի որ չեն տեսնում իրենց իրական կարիքը՝ արդարություն, խաղաղություն և ուրախություն Սուրբ Հոգով։ Մեր իրական կարիքը Տեր Աստծու հետ հաշտությունն է և Նրա Հոգու ներբնակությունը մեր մեջ։ Եվ Աստված հոգացել է այս ամենը՝ Գողգոթայի խաչի վրա զոհելով Իր ամենաթանկը՝ Իր Միածին Որդուն։
Մեր իրական կարիքը հավիտենական կյանքն է և Տեր Հիսուսի շնորհած հավատքը մինչև վերջ կենդանի պահելը։ Եվ Աստված հոգացել է եկեղեցի և հոգևոր առաջնորդներ ու ծառայողներ, որոնք կօգնեն քեզ հոգևոր աճի, ամրության, հասունության և հոգևորապես զորանալու ու Տիրոջը ծառայելու հարցերում։
Մեր իրական կարիքն այս աշխարհի բարիքներին ձգտելը կամ կարիքների համար հոգս անելը չէ։ Դա մեզ Աստված կպարգևի Իր հայրական հոգատարությամբ։ Մեր իրական կարիքը Նրա Արքայությունը և արդարությունը խնդրելն է։ Մենք իրապես կհասկանանք Տեր Աստծու բարության քաղցրությունը, եթե թույլ տանք, որ Աստվածաշունչը լուսավորի ու հայտնի մեզ մեր իրական կարիքները։
«'Ուրեմն մի՛ մտահոգվեք ասելով՝ ի՛նչ ենք ուտելու կամ ի՛նչ ենք խմելու կամ ի՛նչ ենք հագնելու, որովհետև այդ ամենը հեթանոսներն են փնտրում. որովհետև ձեր երկնավոր Հայրը գիտի, որ դուք այդ ամենի կարիքն ունեք։ Դուք նախ Աստծու արքայությունն ու Նրա արդարությո՛ւնը փնտրեք, և այդ ամենը ավելիով ձեզ կտրվի» (Մատթեոս 6․31-33):
Հիշի՛ր, որ դու Աստծո հրաշքն ես, և Աստված սիրում է քեզ։
Շնորհակալ եմ, որ դու կա՛ս։
Արման Մանուկյան
#ՔոՀրաշքնԱմենՕր
#ԱրմանՄանուկյան
Следующая публикация
Комментарии 1