ՉԼ-ի խմբային փուլում «Ռեալը» երկրորդ անգամ ուժերը չափելու է անգլիական «Մանչեսթեր Սիթիի» հետ: Bwin-ի պաշտոնական կայքին տված հարցազրույցում Սամի Խեդիրան խոսել է այդ հանդիպման մասին. ««Բորուսիան» ցույց տվեց, թե ինչպես պետք է խաղալ «Սիթիի» դեմ նրանց հարկի տակ` պայքարելով ամեն մի գնդակի համար ու փորձելով քո խաղը թելադրել մրցակցին: Որոշ դասեր քաղելով այդ հանդիպումից, բնականաբար, մեր սեփական խաղն ենք ցուցադրելու, մեր ոճով ենք փորձելու հաղթել: Չենք թողնելու, որ մրցակցի խաղը ստվեր գցի մեր սեփականի վրա: Ամեն ինչ կանենք մեր խաղը թելադրելու համար` դրանով իսկ հաղթելու մեծ նախադրյալներ ստեղծելով»:
«Սիթին» հատկապես վտանգավոր է իր հարձակման գծով: Այս մասին Խեդիրան ասաց. «Կարծում եմ նրանց հարձակվողներից յուրաքանչյուրը չափազանց պրոֆեսիոնալ է միայն հարձակման գոտում գործելու համար: Նրանք կարող են հավասարապես արդյունավետ գործել նաև խաղադաշտի այլ հատվածներում: Ջեկոն, Ագուերոն, Տևեսն ու Բալոտելին հարձակման հիանալի քառյակ են: Ճիշտ է, նրանց բոլորով միասին չեն խաղա, բայց այս ֆուտբոլիստներից յուրաքանչյուրը կարող է վճռել խաղի ելքը: Կապ չունի` նրանցից որ մեկն է խաղալու մեր դեմ, պետք է շատ զգոն լինենք ու փորձենք վերահսկել նրանց գործողությունները: Նրանք աշխարհի լավագույն հարձակվողների շարքում են»:
«Արքայական» ակումբում նույնպես խաղում են աշխարհում լավագույնների շարքին դասվող ֆուտբոլիստներ. «Չեմ ուզում առանձնացնել որևէ մեկին: Մեր թիմը շատ բարձրակարգ է, հագեցած իսկական պրոֆեսիոնալներով: Ուրախ եմ, որ ես նույնպես իմ դերն ունեմ դրա մեջ: «Ռեալը» գնում է միայն բարձրակարգ խաղացողների, ինչի արդյունքում թիմը նման որակ է ունենում»:
Գերմանացի կիսապաշտպանը խոսել է նաև իր անհատական աճի ու մարզավիճակը բարելավելու ձգտման մասին. «Հիմա ինձ ավելի լավ եմ զգում, քան անցած տարիներին, բայց ֆուտբոլիստը երբեք չպետք է ասի` հիմա լավագույն մարզավիճակում եմ: Ֆուտբոլիստը անվերջ աճելու հնարավորություն ունի: Այնուամենայնիվ, կարծում եմ` լավ մակարդակի եմ հասել: Միշտ պետք է ձգտես բարելավել խաղդ»:
Վերջում Խեդիրային հարցրին, թե ում է համարում այս տարվա ՉԼ-ի գավաթը բարձրացնելու գլխավոր ֆավորիտ. «Ինչպես ամեն տարի, այնպես էլ այս մրցաշրջանում մի քանի թիմ ֆավորիտ է համարվում, բայց մյուսների հանդեպ արդարացի չէր լինի, եթե հիմա անուններ նշեի: Կարծում եմ` այս տարվա պայքարն ավելի հետաքրքրիր ու լարված է լինելու, քանի որ, ինչպես կարող եք նկատել, մի շարք թիմեր ՉԼ-ն դարձրել են մրցաշրջանի իրենց գլխավոր նպատակը»:
Присоединяйтесь к ОК, чтобы подписаться на группу и комментировать публикации.
Комментарии 1