* * *

Маюс кўзларимга чучмома экиб,
Лоладан эгнимга кўйлаклар тикиб,
Қушлари тонгларда ғазалар ўқиб,
Баҳор келадику, жилла бўлмаса!
Сен келмас эканинг унуттирай деб,
Гўзал орзуларга мен еттирай деб,
Кутгинг келган бўлса, мен куттирай деб,
Баҳор келадику, жилла бўлмаса!
Интиқ нигоҳимда бодоми гуллаб,
Ўзидан аввалроқ ифорин йўллаб,
Соғинсам, ноз қилиб, бир оз ҳаяллаб,
Баҳор келадику, жилла бўлмаса!
Уни соғинганни етиб қадрига,
Тасаннолар айтиб бардош, сабрига,
Даво, малҳам бўлиб ёрнинг жабрига,
Баҳор келадику, жилла бўлмаса!
Толган юрагимнинг дармони бўлиб,
Дилгир турналарнинг карвони бўлиб,
Умрнинг энг олий фармони бўлиб,
Баҳор келадику, жилла бўлмаса!
14.02.2021.
Малика Тавфиқ