Күндү учууталлар, төрөппүттэр уонна үөрэнээччилэр!

Нам улууһун дьаһалтатын уонна тус бэйэм ааппыттан эһигини Билии күнүнэн эҕэрдэлиибин!
Балаҕан ыйын 1 күнэ биһиэхэ хас биирдиибитигэр умнуллубат үтүө өйдөбүллээх бэлиэ күн буолар. Бары көлүөнэ дьоҥҥо өйбүтүгэр-санаабытыгар дириҥник иҥмит, оскуолаҕа үөрэммит уонна устудьуоннаабыт сылларбытын, учууталларбытын ахтар-саныыр, умнуллубат үтүө өйдөбүллээх бэлиэ күммүт.
Балаҕан ыйын 1 күнэ – ордук маҥнайгы кылааска киирээччилэргэ ураты бырааһынньык. Быйыл Нам улууһун оскуолаларын боруогун 363 тахса оҕо атыллыаҕа. Оҕолор учууталларын кытта билсиэхтэрэ, элбэх доҕордонуохтара, билиилэрин кэҥэтиэхтэрэ, үөрэхтэригэр ситиһиилэниэхтэрэ.
9 кылааска – 417, 11 кылааска 247 оҕо үөрэниэҕэ. Саҥа үөрэх дьылыгар дьоһун хардыыны оскуоланы бүтэрээччилэр эмиэ оҥоруохтара. Ол курдук, сөбүлүүр идэлэрин талар бүтэһиктээх быһаарыныыны ылыныахтара, эксээмэннэригэр бэлэмнэниэхтэрэ уонна олох киэҥ аартыгар үктэниэхтэрэ.
Нам улууһугар 2022-2023 үөрэх дьылыгар 22 оҕо оскуоланы кыһыл уонна үрүҥ көмүс көмүс мэтээллэринэн бүтэрдэ. Биһиги кинилэр ситиһиилэринэн киэн туттабыт
Кэнники сылларга улууспутугар элбэх саҥа оскуола, оҕо уһуйаана тутуллар. Биһиги үөрэнээччилэрбит аныгы технологиялары баһылыыллар, уустук предметтэри үрдүк таһымҥа билэргэ дьулуһаллар, эбии үөрэхтээһин, култуура, спорт тэрилтэлэригэр дьоҕурдарын, талааннарын сайыннараллар. Ол дьоҕурдара инники олохторугар үрдүк көрдөрүүлэри ситиһэр акылаат буолуоҕа.
Күндү үөрэнээччилэр, Наммыт улууһун инники кэскиллэрэ, эрэллэрэ эһиги буолаҕыт. Үөрэх-билии аартыгынан хардыылаан, үрдүктэн үрдүккэ саҥа үрдэллэргэ дабайаҥҥыт үгүс билиилээх үтүө үлэһит, дьоһуннаах гражданин, патриот буола улаатыҥ.
Ытыктабыллаах учууталлар! Үөрэтэр-иитэр үлэҕитигэр дириҥ билиигитин, кыаххытын, сатабылгытын ууран туран айымньылаахтык, таһаарыылаахтык үлэлииргитигэр истиҥ махтал тылларын тиэрдэбин!
Күндү үөрэнээччилэр, учууталлар, төрөппүттэр! Баҕарабын барыгытыгар үүммүт саҥа үөрэх дьылыгар кытаанах доруобуйаны, үөрэххитигэр-үлэҕитигэр ситиһиилэри, этэҥҥэ буолууну! Үөрэтэр-иитэр үлэҕэ дьиэ кэргэн, оскуола, общественность бары түмсэн бииргэ үлэлиир үтүө үгэспит салҕанан сайда турдун!