Түбэлэр оскуола-саад тутуутун түргэтэтэр туһунан эттилэр.

Билиҥҥи туругунан докумуона барыта бэлэм. Эргэ оскуола хаарбах туруктааҕынан бэс ыйыгар сабыллыбыта, аны күһүн араас тэрилтэлэринэн тарҕанан үөрэниэхтэрэ. Кулууп дьиэтэ урут-уруккуттан анал дьиэтэ суох, куруутун атын тэрилтэ дьиэлэрин өрөмүөннээн, саҥардан киирэн үлэлээн испитэ. Онон, кулууп тутуута бу нэһилиэккэ эмиэ бастакы уочаракка турар туруорсуу буолар.
Доруобуйа харыстабылын эйгэтин таарыйдахха, Түбэ Хатырык балыыһатыгар сыһыарыллан турар. Бу Хатырыкка баар «Суһал көмө» массыыната аныгы ирдэбилгэ толору эппиэттиирэ буоллар диэн баҕа санааларын эттилэр. Быыһыыр сулууспа дьиэтин тутан быйыл үлэҕэ киирэрэ буоллар диэн санааларын үллэһиннилэр. Тыа хаһаайыстыбатыгар биир улахан хаһаайыстыбалаах Радик Лукин хотоно үлэҕэ киирэригэр көмө наадатын ыйдылар.
Республикаҕа киэҥник биллэр, үтүө түмүктэрдээх «Үрүҥ Уолан» күрэх ыытыллыбыта быданнаата. Бу күрэххэ кыттан кыайбыт уолаттарбыт «Дыгын оонньууларыгар» үрдүк көрдөрүүлэри көрдөрөн, улууспут аатын ааттаталлар. Аҥардас бу сылга икки уолбут Вячеслав Дьяконов уонна Артем Варданян икки бастыҥ миэстэҕэ таҕыстылар. Кинилэргэ анаан улууска улахан тэрээһин ыытан чиэстиэххэ диэн этии киллэрдилэр.
Түбэҕэ нэһилиэнньэ сүрүн дьарыга – балыктааһын. Манан «Түбэ» ТХПК сүрүннээн дьарыктанар, маныаха көмө баара буоллар диэн эттилэр уонна балыгы оҥорон таһаарыыны киллэриэххэ наадатын тоһоҕолоон эттилэр. Кэнники кэмнэргэ боростуой да дьон, туристар даҕаны балыктыы, сынньана кэлиилэрэ элбээтэ. Онон, туристическай хайысхаҕа туох эмэ үлэ барара буоллар диэн баҕа санааларын тиэртилэр.
Көрсүһүүгэ кэлбит дьон «Биир ньыгыл Россия» партияттан турбут бары кандидаттар үлэлииллэрин, дьон итэҕэлин ылалларын, инникитин даҕаны сайдыы суолун тобулуохтара, үлэлиэхтэрэ-хамныахтара диэн эрэнэн туран, бары биир киһи курдук өйүүллэрин биллэрдилэр.