Предыдущая публикация
ТУМАН
6-Б
Эртеси милицияга барам десем, Анарбек жанчып сабап салды.
– Сизди Султан менен сүйлөшчү деп жатат го… Кадимкидей билип эле келген деп?
– Султанын мен биринчи жолу көрдүм. Анарбек экөөбүздүн сүйлөшүп жүргөнүбүздү баары билет. Керек болсо чогуу түшкөн сүрөттөрүбүз бар. Мен далилдеп берем баарын.
– Чынында ишениш кыйын болуп жатат мындай окуяга,- сурак алып жаткан милиция кызматкери башын кашыды.
– Эмнеге ишениш кыйын?
– Кайсы жинди киши кыз ала качып келип, анан аны агасына аял кылып берип салсын? Болгондо да өзүнүн сүйлөшкөн кызын.
– Анткени ал адам эмес, айбан экен! Андай коркунучтуу адам түрмөдө отурушу керек.
– Жок, мен сиздин абалыңызды түшүнүп жатам… Бирок адегенде сен Анарбек менен сүйлөшүптүрсүң. Анан ал сени теңине албай коёт. Сен анын мындай кадамына өчөшүп, анын агасы Султан менен сүйлөшүп, ага тийиптирсиң. Атайын өчөшүп жасады деп жатат Анарбек…
– Анарбек өзү достору менен ала качып келген! Жанын жебесин!
– Жок, эми…
– Мен ишти башка тергөөчүгө беришин талап кылам. Сен аларга жан тартып жатасың. Алчуңду алып алгансың го…
– Жок, андай эмес.
– Андай болбосо эмнеге антип сүйлөйсүң? Мына көрдүңбү бетим былчыйып шишип турат, экспертиза зордукталганымды далилдеди… Ушунун өзү эле аларды токтоосуз түрмөгө камаганга себеп болмок. А сен болсо мага келип алып "өчөшүп тийгенсиң го" деп жатасың!
Шайыр ачууланып чыкты. Тергөөчү уурулугун карматкан кишидей көздөрүн ала качып унчукпай калды.
Аз өтпөй иш башка тергөөчүгө тапшырылып, анан заматта эле сотко өттү. Бул учурда Шайыр ооруканадан чыгып, өзүнө келип калган. Сотко ал болгон жек көрүүсүн топтоп алып келди. Ичинен да, сыртынан да аны кордогон адамдар түрмөдө чиришин тилеп жатты. Султан менен Анарбек темир тордун артында отуруп баягы алсыз кызды тааныбай турушту. Ыйлап-ыйлап анан баш ийип отуруп калат деп ойлошкон кыз, көзү менен аларды жерге киргизчүдөй тиктеп жатты.
Ар бири 8 жылга кесилди. Бир тууган ага-инилер…
– Бул оңой жаза болуп калды,- деп кыйкырды Шайыр.
ххх
Ооба, чынында эле Султан менен Анарбектин жазасы кийин алардын айынан Шайыр тарткан азаптардын алдында болбогон нерсе болуп калды. Ага-ини анын жашоосун түп орду менен талкалап салышыптыр. Же Шайыр өзү талкалап алдыбы? Түркиянын ысык абасы аны тумчуктуруп жиберди ушул учурда.
Балким, булардын баары өзүндөгү чектен чыккан жек көрүүнү ооздуктай албай калганы үчүн болуп жүрбөсүн?! А жек көрүүнү кантип ооздукташ керек эле? Жанагындай азап тарттырып жатса кантип жек көрбөйт?
ххх
Сот иштери бүткөн соң Шайыр окуусун таштап айылда, ата-энесинин жанында жүрүп калды. Киши менен сүйлөшкүсү келбейт.
– Кызым, мен сенин алдыңда абдан күнөөлүүмүн. Сени коргой албадым… Бирок сен жашоону улантышың керек. Шаарга психологго алып барайын… Минтип чүнчүп отурганыңды көрүүгө жүрөгүм түтпөй жатат,- деди бир күнү атасы...
– Психолог? Кайдагы психолог?!- жини келип чыкты. Эмнеге ага баруу керектигин ойлонгусу келбеди. Өзүн оорулуу сезгиси келген жок. Жан дүйнө оорусун бир адис дарылай аларына ишенбеди…
– Койчу, ата, кайдагыны айтпай!- кагып койду атасын. Айласы кете түштү. Акыркы кезде атасы кызына көрсөтпөй көп ыйлачу болду.
ххх
Бир жолу анын көңүлү айланып, оозуна кара суу келип окшуп жиберди. Жанында апасы бар болчу. Элейип карап калды.
– Деги сен…
– Эмне мен?
– Боюңда болуп калган эмеспи деги?
–Эмне?! Баргылачы ары?!- ичиндеги жек көрүү аны толугу менен бийлеп алды. Өз дүйнөсүнө эч кимди жакындатпай, адамдарга, керек болсо өз ата-энесине да ишенбей калыптыр. Баарын жек көрөт!
– Бир текшерилип койсоңчу!
– Тажатпагылачы!- ошол күнү апасын катуу какты. Ал да таарына түштү. Бирок баары бир эне жүрөгү түтпөйт да, таң эрте кызынын бөлмөсүнө кечирим сураш үчүн баш баккан. Тилекке каршы, Шайыр ордунда жок болуп чыкты… Ал шаарга баса берген болчу.
Шаарга жеткенче апасы да, атасы да тынбай телефон чалышты. Таптакыр алган жок. Эч ким менен сүйлөшкүсү келген жок. Качан Бишкекке жеткенде гана «Мен Бишкектемин. Мени издеп тынчымды албай тургулачы. Өзүмө келген соң барам» деп кыска жооп айтып, телефонун коюп салды.
Ал күнү Шайыр мейманканада түнөгөн. Кымбат экен. Ал жакта көпкө жашоого мүмкүн эместей. Батир издеп баштады. Жумуш таап алаксыйын деп чечти.
ххх
Аялдамада быжырап чапталган жарыялардын ичинен батир берилет дегенин жулуп алып, чалып көрдү. Тилекке каршы, батир башкаларга эбак берилип кеткен экен. Шаабайы сууй түштү. Аргасы кеткендей аялдаманын отургучуна отуруп оор үшкүрүп алды.
– Сен да таппай жатасыңбы?- жүзү купкуу болуп бир жерди мелтиреп тиктеп турган Шайырдан жашы отуздарга барып калган келин сурады. Кыз үндөгөн жок. Эч ким менен сүйлөшкүсү деле келбей турат. Жайына коюшса жакшы болот эле. Бирок тигил келин сүйлөнө баштады.
– Уф, мен да батир таппай кыйналдым. Бир жума болду издегениме. Жакшысы чыкса баасы кымбат, арзанына жашай алчудай эмессиң... Айла жок, классташымдыкына барат окшойм. И-ий, айла гана жок да. Шүмшүк күйөөм ичпей жакшынакай жүрсө, шаарга эзели келмек эмесмин… Тажатпадыбы! Ичип алып сабап. Боюмдан да түшүрдү. Бала көрбөй калгыр, как баш!
– Эже, арманыңызды башкага айтыңызчы, сураныч! Чарчап турам, сүйлөшкүм келген жок!
– Аа… Аялды аял түшүнөт деп…
– Өөх,- онтоп жиберди Шайыр. Көзү караңгылап кетти. Ордунан туруп бул наалып баш ооруткан немеден алыстайын деген. Бирок өйдө болору менен башы айланып кулап түштү. Дагы жакшы, тигил келин кармап калды.
– Эй, чоң кыз, жакшы элесиңби? Кокуй, купкуу болуп кеттиң го! «Тез жардам» чакыралыбы? Жүрөк-пүрөгүң оорулуу немесиң го…
– Жок, «Тез жардам» кереги жок!- башын мыкчып отура кетти.
– Ай, чоң кыз, барар жериң барбы деги?
– Мейманканада жашап жаткам.
– Ий, кокуй, ал жактан жыгылсаң эч ким көрбөй калат… «Тез жардам» чакырткан оң эмеспи деги?
– Жок, кереги жок!
– Анда жок дегенде мени менен бар! Мен бир классташ курбумдукунда болуп жатам убактылуу. Бирок ал шүмшүк да жанагындай неме да… Уктатышпайт экен. Түнү менен эркектер келе берип. Бирок айла жок. Жаман көрсөң жаман көр деп баш калкалап жатам. Сени да эптеп бир күн батыра тур дейин… Барасыңбы?
Шайыр айласыз макул болду. Бул жерден өзү басып кете алчудай эмес. Тигил келин колтуктап таяп тургузуп жатканда телефонуна чалуу келди. Караса атасы экен, алган жок. Бир күндө элүүдөн ашык жолу чалып коюптур. Атасы менен азыр да сүйлөшкүсү келбеди.
ххх
«Кызым, кайсы жерде экениңди айтып кой! Апаңдын жүрөгү ооруп жатат» телефонуна атасынан ушундай кат келиптир. Окуп туруп үндөбөй чөнтөгүнө салып койду.
– Сен да көйгөйү башынан ашкан бир байкуш окшойсуң?- тамекисин чычайтып алып түтөтүп отурган кызыл чачтуу келин үн катты. Шайыр, аны алып келген келин, анан ал келиндин ушул тамеки чеккен классташы болуп эки бөлмөлүү батирдин ашканасында отурушат.
– Менин атым Света, бул Калипа…
– Шайыр.
– Бул Калипа да шаарга сага окшоп бакыт издеп келген киши. Хе-хе… Жапжакшынакай карачы! Мен буга мени менен иште, сулуу денени карып кете электе сатып акча таап алыш керек деп айтып жатам. Кардарлардын аягы үзүлбөйт. Бул болсо макул болбойт. "Өзүнчө батирге чыгып, тигүүчү болуп иштейм" дейт. Түйшүк тартканды жакшы көрөт. Карабайсыңбы өзүнүн көйгөйү аз келгенсип сени сүйрөп келген тура!- тамекисинин түтүнүн үйлөп кыткылыктады кызыл чачтуу Света.
– Койчу, Света! Менин андайга дитим барбайт. Анын үстүнө тигил шүмшүк күйөөм бир күнү «мына, мен оңолдум. Бас, айылга кеттик» десе…
– Ошого үмүт арткан сен да жинди! Эй, иштеп жүрүп эле сонун күйөөгө тийип алган кыздар толтура!
– А эмне болгон жумуш?- Шайыр кызыга сурады.
– Хе, сүйүү сатабыз!
– Сүйүү дейт… Денесин сатат!
– А бирок кандай жашап жатам. Машина алдым, жакында үй алам. Анан күйөө керек болсо бирөөнүн башын айлантам да, тийип кетем, ха-ха-ха… А баса, сага жумуш бар менде.
– Жөн турчу жаш кызды азгырбай!- Калипа Светага жинденип кетти.
– Жок, Калипа, жаман ойлобо! Бул Шайыр жаш кыз турбайбы. Үй-пүйдү жыйнап, тамак жасаганга киши керек эле. Анан келип кезек күтүп калган кардарлар болсо кофе берип дегендей. Иштебейт белең? Жашаган жериң бекер болот.
Шайыр ал кезде Света ага боору ооруп ушундай жумуш сунуштаган деп ойлогон. Көрсө, ал эптеп жаныма алып жүрсөм, бир күнү муну тирүү товарга айлантып пайдасын көрөм деп ойлогон экен. Аны кийин гана билбедиби… Баёо тура!
Шайыр жашаган жер бекер болсо иштей берейин деп чечти. 10 миң сом айлык бермей болду Светасы. Ошондо Калипа ыза болуп кетти.
– Света, канчадан бери жумуш издеп жүргөнүмдү билип туруп…
Уландысы бар
Следующая публикация
Комментарии 13