Предыдущая публикация
ԱՆԺԵԼԱ ԱՄԻՐԽԱՆՅԱՆ
ԿԻՆ-ՆՈՏԱԳԻՐ
Երաժշտությունը
Հոսում է քո մարմնով,
Լցվում է գույների
Խառնարանը…
Աշխարհի բոլոր գույները
Սկիզբ են առնում
Քո մատներից
Ու նկարում
Լուսաբացների ճիչը,
Արևի ջերմությունը,
Ջրերի քրքիջը,
Քամիների խենթությունը:
Ժամանակը քո դերձակն է՝
Թզատերև շորեր կարող…
Հոգ չէ նրան, թե մեկը
Փողոցում մնաց մերկ,
Կամ սիրո երակում
Գտավ բազմաբիծ
Մատնահետքը մեղքի...
Թարթիչներիդ ծափերով
Կշռի́ր լույսի զորությունը
Ու ցողի՛ր
Խնձորենու բողբոջներում
Ապրող մեղուներին:
Քո՛նն են ծաղիկների հմայքը,
Թիթեռների պարը,
Մանկան ժպիտը՝
Որպես պատուհաններ,
Ուր թաքնվում է
Աշխարհի անմեղությունը՝
Իմ ու քո ձեռքերը բռնած…
Կին-նոտագիր,
Մաքրամաքուր
Թղթերի վրա
Խազի՛ր Ադամի կրծքին՝
Որպես թարգման,
Որ ես զգամ
Երկրագնդի շնչառությունը:
ԱՆԺԵԼԱ ԱՄԻՐԽԱՆՅԱՆ
Следующая публикация
Нет комментариев