"ЛЫМ" мыреш кырык мары тыменьшӹвлӓн рисуноквлӓ дон клип.

Пиш кого тау рисуноквлӓм мӓлӓннӓ колтымыштылан:
Елизавета Черновалан (Кулаковы клуб); Йоласал школын тымдышы Людмила Беляевалан; Дарья Хазановалан (Виловат ДШИ),Майя Афанасьевалан(Пӹзӹкныр школын тымдышы).
Никандр Ильяковын "ЛЫМ" лыдышеш пиш сӹлнӹ викӹм Виталий Салдушкин сирен ылын. Йӓнг вашт яратен ти мырым ӹштеннӓ:
"ЯЛАВА" группы: Лидия Кучера, Светлана Палагина, Ирина Капустина, Маргарита Синуткина;
запись, сведение - Дмитрий Пекцоркин;
аранжировка - Михаил Анеев.
Никандр Ильяков
Лым
Вала, вала
Ялавала
Ош лым кӱшӹц выжге вел.
Цилӓ ошы
Ош лым лошты, -
Тидӹ ошы толеш тел.
Левӓш вӹкӹ
Ош лым вӹсӓ,
Ош лым вилеш ныр вӹкӓт.
Йырлан тӹреш
Тӹрлӓ тӹрӹм,
Пуалтемӹшкӹ сӓрнӓлт.
Кырык нер гӹц
Изидиреш
Вӹсӓ рвезӹ ӓнгӹр док.
Лым вӹлецӹн
Кого ечӓн
Кеӓ весӹ паштекшок.
Вала, вала
Ялавала
Ош лым кӱшӹц выжге вел.
Цилӓ ошы
Ош лым лошты,-
Тидӹ ошы толын тел.