Предыдущая публикация
Хаёл қандай яхши,
Акангга ўхшар.
Ўйнатар елкага кўтариб олиб.
Бу парвоз сўнгида йиғлашинг мумкин,
Соғинган онангнинг олдида қолиб.
Хаёл қандай яхши,
Хаёл қандай соз.
Қўшиқлар сочади босган изингга.
Бир кечада бориб айтишинг мумкин
Изҳори дилингни суйган қизингга.
Беғубор болалик юлдуздай олис,
Аммо хаёл учун у ҳам бир қадам.
Тарсиллаб қовунлар ёрилган полиз,
Сен ёлғиз ётибсан остида бодом.
Гуллари тўкилар ўша бодомнинг,
Капалакдай келиб юзингга қўнар.
Хаёл ҳам туғишган укаси одамнинг
Қаёққа юборсанг ғинг демай жўнар.
Кўксида хаёлинг турса йиғилиб,
Қуёшни уйғотиб келса бўлади.
Шоирларнинг бари ерда туғилиб,
Осмону фалакда ўлади.
Следующая публикация
Нет комментариев