Гоҳ ёмғирдек ёғдинг юракка,
Гоҳ қуёшдек чиқдинг фалакка.
Айтгин, яна не қийноғинг бор,
Фироғингда жони ҳалакка?!
Ўзинг келдинг тинчимни бузиб.
Энди кўзим ёшида сузиб,
Кетаяпсан жонимни узиб,
Яна қанча озоринг бор, ёр?!
Кечмоқликка қўймадинг имкон,
Қуриб олдинг кўнглимдан макон,
Энди юрак-бағрим этиб қон,
Яна қанча озоринг бор, ёр?!
Суйдургунча қилдинг кўп чора,
Шу иш билан бўлдинг оввора,
Энди бағру-дилим сатпора,
Яна қанча озоринг бор, ёр?!
Гоҳ оёғим узасан ердан,
Гоҳ муз бўлиб оласан бирдан,
Қўрқмайсанми дил оғришидан,
Яна қанча озоринг бор, ёр?!
Мен аслингни билолмай толдим,
Бор гуноҳни зиммамга олдим,
Шунча ширин қийноққа қолдим,
Яна қанча озоринг бор, ёр?!
Ўтинчимдан ўт чиқди, қара,
Ишқ юртида бўлдим масхара,
Энди раҳм айласанг зора,
Яна қанча озоринг бор, ёр?!
Малика Тавфиқ
Присоединяйтесь к ОК, чтобы подписаться на группу и комментировать публикации.
Нет комментариев