Шумілінскі гісторыка-краязнаўчы музей шукае для музейных выстаў людзей творчых, якія захапляюцца любімай справай і ствараюць прыгожыя рэчы. Сярод іх – старшыня райкама прафсаюза работнікаў АПК Вольга Пусянкова. Яе выстава «Мой свет» была прымеркавана да справаздачна-выбарнай канферэнцыі работнікаў аграпрамысловага комплексу і будзе працаваць да канца верасня.
Да творчасці Вольга Пусянкова прыйшла пятнаццаць гадоў таму, калі знаходзілася ў дэкрэтным водпуску. Паспрабавала вырабляць рэчы з бісеру, стразаў і паетак – атрымаліся цудоўныя ўпрыгожванні. Можна сказаць, сама ў сабе ад-крыла талент, была задаволена вынікам і вырашыла спрабаваць далей. Потым быў фааміран, з якога вырабляла кветкі, заколкі, бранзалеты, лялькі. З умелых рук выйшлі прыгожыя шкатулкі з кніг, самаробнае мыла, пасля занялася дэкупажам, палімернай глінай. Назіральнасць, прыроднае пачуццё гармоніі, уседлівасць дапамагалі ісці далей, ствараць цудоўныя падзелкі, сувеніры. Усё гэта прадстаўлена на выставе. Адзначым, што тут, між іншым, няма ніводнага паўтарэння.
Нядаўна Вольга Пусянкова знайшла для сябе новы занятак – вырабляе сумачкі з пацерак (бусин – рус.). Яны ўсе розныя па колеры, памерах, форме. «У сярэднім на сумачку ідзе да паўтары тысячы пацерак, – кажа Вольга Іванаўна. – Матэрыял заказваю праз інтэрнэт. Нанізваю пацеркі на лёску вечарамі».
«Такое захапленне для мяне – гэта адпачынак, – кажа Вольга Іванаўна. – Яно вельмі заспакойвае. Калі пачынаеш рабіць нейкі сувенір, то поўнасцю пагружаешся ў свет творчасці, і нічога іншае табе не цікава. Антыстрэс цудоўны!».
Імкненне да творчасці ў Вольгі Пусянковай – на генным узроўні, перадалося ад маці Ларысы Пятроўны, якая і сёння захапляецца бісерам і вышыўкай, абнаўленнем старых мяккіх цацак.
Нет комментариев