⚫ ЗДАНІ - прывіды, пужакі, пужалкі, тарпачы, прывіды ў выглядзе людзей, жывёл, неадушаўлёных прадметаў ці агнёў, што здаралася людзям «бачыць» у розных сакральна вылучаных месцах: на могільніках ці паблізу ад іх, на скрыжаваньнях дарог, на старых дварышчах, гарадзішчах, а таксама ў лесе, на полі, у сваім двары і да т. п. 3дані з'яўляліся часта на месцах сьмерці ці пахаваньня «закладных» нябожчыкаў, людзей, што загінулі трагічнай сьмерцю, самагубцаў. 3дані з'яўляюцца найчасьцей у начны час, на зьмярканьні, іх можа бачыць адзін чалавек ці гурт людзей, яны то праўляюць поўную абыякавасьць да чалавека, то ўступаюць зь ім
у кантакт, завабліваюць і завуць некуды падманам. Так, прывідныя жнеі, што нібыта жалі на ніве блізу старога пакінутага могільніка пасьля заходу сонца, не рэагавалі на запрашэньне кабет ісьці зь імі дамоў, у вёску. Прывідны карагод моладзі, што скакаў вакол прывіднага вогнішча, наадварот, клікаў моладзь да сябе: «Да нас, да нас!», увесь час аддаляючыся, пакуль урэшце не зьнікаў. На месцы прывіднага карагода засталося кола, якое не зарастала травой і пра якое хадзіла паданьне, што яно засталося пасьля таго, як некалі моладзь гэтай мясцовасьці, сабраўшыся ля царквы на ўсеначную, наладзіла карагод, і гэты карагод праваліўся скрозь зямлю (в. Сваткі Мядзелскага р-на). 3дані стваралі не толькі візуальныя вобразы, але і гукавыя: рытмічнае стуканьне, завываньне, шоргат, які нагадваў крокі і рыпеньне. Паўсюль бытуюць апавяданьні, як людзі пакідалі толькі што набытыя дамы, бо ў іх нешта пужала, стукала, завывала. Да нашага часу захавалася жывая вера ў хаджэньне некаторых нябожчыкаў, іх прысутнасьць пэўны час пасьля пахаваньня сям'я пазнае па кроках нібы па сьцяне, парыпваньні столі ды інш. Пра тое, што чалавек спатыкаўся са Зданямі, часам здагадваюцца пасьля падзеі. Так, спозненаму падарожніку раптам прывідзелася зграя ваўкоў. Са страху ён ускочыў на прыдарожны крыж, а зьвяры аблягалі яго, шчоўкалі зубамі, скрэблі кіпцямі дрэва да раніцы. Пры дзённым сьвятле змучаны чалавек не знайшоў ані сьледу ваўкоў, і тады зразумеў, што гэта былі 3дані. Асобны раздзел гэтых уяўленьняў складаюць аповеды пра зманлівыя агні, што з'яўляюцца на месцах заклятых скарбаў.
Присоединяйтесь к ОК, чтобы подписаться на группу и комментировать публикации.
Нет комментариев