ЭПИР ÇУРТА ПЕК ИРĔЛЕТПĔР

Вăрăм Палюк

.

Эпир çурта пек ирĕлетпĕр

Кунран кун хытă юратса.

Çунат хушса вĕçсе çÿретпĕр

Çĕрле пылак ыйха татса.

.

Çурта пек ĕмĕр ирĕлесчĕ,

Кăвар ыйтать вĕри чĕре.

Сар кайăксем пекех вĕçесчĕ

Пĕрле хĕвеллĕ тÿпере.

.

Эпир çурта пек ирĕлетпĕр,

Пĕрне-пĕри чуп тунă май.

Иксĕмĕр те аван пĕлетпĕр:

Пирте çу туйăмсем нумай.

.

Çурта пек ĕмĕр ирĕлесчĕ,

Кăвар ыйтать вĕри чĕре.

Çак пурнăçа пĕрле тĕрлесчĕ,

Савниçĕм, маншăн эс – пĕрре.

.

Эпир çурта пек ирĕлетпĕр,

Çунса çут туйăм вутĕнче.

Ялан пĕрлех пуласчĕ, тетпĕр,

Юратупа вĕри тĕнче.

.

01.01.2018.

МĔН ТЕРИ АВАН ПИРЕ

Вăрăм Палюк

.

Эс – ман чунăм, ман чĕре те,

Мĕн пурри йăлтах пĕрле.

Вут пек сан çумра хĕретĕп

Юратса сана çĕрле.

.

Пирĕн – пĕр шăпа, пĕр çăлтăр,

Халь пĕрлешрĕ икĕ çул.

Сан куçу – пит тарăн çăл-тăр,

Савăнса юхать куççуль.

.

Эс – ман чунăм, ман чĕре те,

Вĕсене ма уйăрас?

Эп кулатăп е йĕретĕп,

Пур пĕр кăмăлăм хавас.

.

Пирĕн – пĕр шăпа, пĕр çăлтăр,

Халь пĕрлешрĕ икĕ çул.

Сан куçу, ав, йăлтăр-йăлтăр

Çиçнĕ май иртет кун-çул.

.

Эс – ман чунăм, ман чĕре те,

Уçă сывлăш та пĕрре.

Чуп туса ыйха сиретĕн,

Мĕн тери аван пире.

.

01.01.2018.

ЭПĔ – САНĂН ЮРАТУ ЧУРИ

Вăрăм Палюк

.

Эпĕ – санăн юрату чури:

Çыпăçсах-çке ларнă сан çумна.

Тен, санпа паллашрăм эп юри,

Ах, кайран вут хыпрĕ ман чуна.

.

Тусăм, эсĕ кирлĕ-çке мана,

Мансăр пурăнаймăн эсĕ те.

Сĕртĕнетĕн те ман тутана –

Вĕл вĕçетĕп эп çÿлте-çÿлте.

.

Эпĕ – санăн юрату чури:

Пурнăçлатăп мĕн каланине.

Халĕ пулăшать пире Турри,

Юратса пăхатăп сан çине.

.

Тусăм, эсĕ кирлĕ-çке мана,

Мансăр пурăнаймăн эсĕ те.

Илтĕн те ыйтмасăр тыткăна

Эс ăçта халь, эпĕ те – унта.

.

Эпĕ – санăн юрату чури,

Манăн юрату патши-çке эс.

Мĕн тери телей вăл эс пурри,

Халь юрлатăп эпĕ саншăн çеç.

.

01.01.2017.

ПИРĔШТИ

Вăрăм Палюк

.

Эс – манăн пирĕштиçĕм,

Упран ман пурнăçа.

Санпа кăна, савниçĕм,

Пайлатăп савнăçа.

.

Сана чунтан саватăп,

Пĕр эсĕ çеç – пуçра.

Турра эп тав тăватăп,

Юрлатăп çак юрра.

.

Эс – манăн пирĕштиçĕм,

Вĕçетĕн тÿпере.

Çиçет çап-çутă çиçĕм

Ялан ик чĕрере.

.

Сана чунтан саватăп,

Пĕр эсĕ çеç – пуçра.

Хĕрÿллĕн чуп тăватăп,

Телей – юратура.

.

Эс – манăн пирĕштиçĕм,

Ик чун – пĕр юрату.

Пиçсе хĕрелнĕ иçĕм,

Савниçĕм, сан туту.

.

02.01.2017.

САНСĂР ЫРАТАТЬ ЧĔРЕ

Вăрăм Палюк

.

Эс ăçта çÿретĕн, тусăм?

Сансăр ыратать чĕре.

Пĕр сана курасшăн куçăм,

Килĕшрĕн мана сĕре.

.

Ах, чĕре, чĕре, чĕреçĕм

Юратать сана кăна.

Шухăшра ялан – пĕр эсĕ,

Лекрĕ чунăм тыткăна.

.

Эс килсем часрах, кĕтетĕп,

Сансăр ыратать чĕре.

Пĕр сана киле кĕртетĕп,

Эсĕ ĕмĕрлĕх – пĕрре.

.

Ах, чĕре, чĕре, чĕреçĕм

Юратать сана кăна.

Эсĕ – ман шăпа, хĕресĕм,

Кÿрĕн-ши телей мана?

.

Эс ăçта çÿретĕн, тусăм?

Сансăр ыратать чĕре.

Хам чуна пĕр саншăн уçрăм,

Тăхăн пÿрнери çĕрре.

.

02.01.2018.

МАН ЧĔРЕНЕ ИРĔЛТЕРЕТĔН

Вăрăм Палюк

.

Тĕл пулсанах ыталаса

Ман чĕрене ирĕлтеретĕн.

Çут туйăмсем хĕрÿ, таса,

Эс хăв та çулçă пек чĕтретĕн.

.

Чĕре вăл, калăн, сарă çу,

Вăл ирĕлет çав чун савсассăн.

Халь сан та пĕтрĕ канăçу,

Çапах кулатăн эс хавассăн.

.

Хыт чуп туса эс тутаран

Ман чĕрене ирĕлтеретĕн.

Сана кăна юратнăран

Хĕретĕп, эсĕ те хĕретĕн.

.

Чĕре вăл, калăн, сарă çу,

Вăл ирĕлет çав чун савсассăн.

Сан пурнăçпа сан пурнăçу

Хăйсен çулне пĕрле сарасшăн.

.

Чунна уçса парса мана

Ман чĕрене ирĕлтеретĕн.

Юратнă çыннăм – эс кăна,

Савса ман пурнăçа кĕретĕн.

.

02.01.2018.

ПЫЛАК ПЫЛ МАНШĂН ЭСĔ

Вăрăм Палюк

.

Пылак пыл маншăн эсĕ,

Туту та – чи тутли.

Сан куçусем çиçеççĕ,

Куллу – хĕвел шевли.

.

Ăçтан персе эс антăн

Ман çамрăк пуç çине?

Чуна халь пăлхататăн,

Хĕм сапрăн чĕрене.

.

Пылак пыл маншăн эсĕ,

Сăну – çурхи чечек.

Хумханнипе чĕтреççĕ

Сан аллусем тем пек.

.

Ăçтан персе эс антăн

Ман çамрăк пуç çине?

Çĕрле ыйха тататăн

Савса çине-çине.

.

Пылак пыл маншăн эсĕ –

Çисе тăранайми.

Ман туйăмсем хĕреççĕ

Питÿ сан – пан улми.

.

02.01.2018.

ТУЯТĂП САНĂН ĂШШУНА

Вăрăм Палюк

.

Çупăрласа сана, савниçĕм,

Туятăп санăн ăшшуна.

Çиçет вара ăшра та çиçĕм

Хыт пĕçертсе çемçе чуна.

.

Мана, пикеçĕм, питĕ кирлĕ

Сан чунупа сан ÿт ăшши.

Мĕн-ма тесен халь эпĕ чирлĕ,

Мана мĕнле сиплейĕн-ши?

.

Хыт чуп туса сана, савниçĕм,

Туятăп санăн ăшшуна.

Тавах сана эс ман пулнишĕн,

Пар, чуп тăвам сан аллуна.

.

Мана, пикеçĕм, питĕ кирлĕ

Сан чунупа сан ÿт ăшши.

Юрат мана ялан пит вирлĕ,

Санран килет сар пыл шăрши.

.

Ачашласа сана, савниçĕм,

Туятăп санăн ăшшуна.

Куллен ÿсет-çке туйăм-сисĕм

Чун-чĕререн савса сана.

.

02.01.2018.

ЮРАТУ – ЧИ ПЫСĂК МУЛ

Вăрăм Палюк

.

Юрату – чи пысăк мул,

Ним те çук унран хакли.

Тусăм, ĕмĕр çамрăк пул,

Эс çуралнă ман валли.

.

Юратуçăм, юрату,

Хитререх унпа тĕнче.

Илĕртет мана туту,

Çăлтăрсем – куçусенче.

.

Юрату – чи чаплă мул,

Упранать вăл чĕрере.

Кайăк пек вĕç, савăн, кул,

Çамрăк ĕмĕр вăл – пĕрре.

.

Юратуçăм, юрату,

Хитререх унпа тĕнче.

Пурăнар пĕрле тату,

Пуçăм – сан чĕрçÿ çинче.

.

Юрату – чи тутлă мул,

Пыллатать вăл пурнăçа.

Час иртсен те яш кун-çул

Ан çухат эс савнăçа.

.

03.01.2017.

ПУЛТАРАЙМĂП САНА ЮРАТМАСĂР

Вăрăм Палюк

.

Пултараймăп сана юратмасăр,

Ку манран та килмест – хăть мĕн ту.

Пурнăç тĕксĕм-çке, чунăмçăм, сансăр,

Шак шаккать чĕрене юрату.

.

Чун сисет, эсĕ те юрататăн,

Савнă тусăм, мана чĕререн.

Тутаран çеç чуп ту эс тата та,

Хытăрах ытала кунсерен.

.

Пултараймăп сана юратмасăр,

Хушма çук чĕрене, мĕн тăвас.

Юрататăп, паллах, пĕр сăлтавсăр,

Ай, курма та сана чун хавас.

.

Чун сисет, эсĕ те юрататăн,

Савнă тусăм, мана чĕререн.

Сан валли чечексем эп тататăп,

Вĕсене эсĕ килĕштерен.

.

Пултараймăп сана юратмасăр,

Эп çуралнă чунтан юратма.

Хăш чухне эп юрлатăп пĕр сассăр,

Халлатăп сана юррăма.

.

03.01.2018.

САНА ÇĂТМАХ ЭП ПАРНЕЛЕТĔП

Вăрăм Палюк

.

Сана çăтмах эп парнелетĕп,

Тавралăх пит хитре унта.

Çав ырлăха лексен, пĕлетĕп,

Эп пулăп санăн çумăнта.

.

Ай, çăтмахра çеç пурăнасчĕ,

Савниçĕм, ман санпа пĕрле.

Сана савса хыт савăнасчĕ,

Эс маншăн хитререх çĕрле.

.

Сана çăтмах эп парнелетĕп,

Юрлаççĕ кайăксем унта.

Чуп тунă май эп ирĕлетĕп,

Сан еннеллех туртать тута.

.

Ай, çăтмахра çеç пурăнасчĕ,

Савниçĕм, ман санпа пĕрле.

Сана телей кăна сунасчĕ,

Мана эс ăшăтăн хĕлле.

.

Сана çăтмах эп парнелетĕп,

Ÿсеççĕ чечексем унта.

Санпа куллен эп киленетĕп,

Хитре эс, кăмăллă тата.

.

03.01.2018.

ЮРАТАТĂН ПУЛСАН

Вăрăм Палюк

.

Юрататăн пулсан эс мана

Çупăрла пур çĕртен те ачашшăн.

Чуп туса ирĕлтер ман чуна,

Эпĕ хам та сана юратасшăн.

.

Паллă, эс те мана юратан,

Ан вăтан киленсе савăнмашкăн.

Юратса ман ыйха та татан,

Чармăп, эсĕ манпа хытă ашкăн.

.

Юрататăн пулсан эс мана

Чарăнмасăр чуп ту пит хĕрÿллĕн.

Ан шелле ман çемçе тутана,

Чуп туса сывлăша та эс пÿлĕн.

.

Паллă, эс те мана юратан,

Ан вăтан киленсе савăнмашкăн.

Чĕрÿпе ман чуна ăшăтан,

Сар хĕвел, чунăмçăм, эсĕ маншăн.

.

Юрататăн пулсан эс мана

Чи пылак сăмахсем каласамччĕ.

Ăнсăртран эп тĕл пултăм сана,

Çитрĕ маншăн та савнăç саманчĕ.

.

03.01.2018.

ТАСА ХУТРАН ПУÇЛАТПĂР ПУРНĂÇА

Вăрăм Палюк

.

Таса хутран пуçлатпăр пурнăçа

Санпа, савниçĕм, çĕнĕрен.

Çухатрăм эпĕ канăçа

Мана эс хытă хĕртнĕрен.

.

Эс маншăн хăв та – таса хут,

Çырма пуçлатăп хам унта.

Çÿл тÿпере çĕн çăлтăр çут,

Çути ун ÿктĕр ман пата.

.

Таса хутран пуçлатпăр пурнăçа,

Умра – шап-шурă юрлă хир.

Эс турăн вичкĕнрех куçа,

Вĕçсе çÿретпĕр халь эпир.

.

Эс маншăн хăв та – таса хут,

Çырма пуçлатăп хам унта.

Пăхатăн тарăн, хуть те пут,

Савниçĕм, санăн куçунта.

.

Таса хутран пуçлатпăр пурнăçа

Хыçа пăхмасăр çаврăнса.

Пайлатăп хам савăнăçа

Санпа эп туслă пурăнса.

.

03.01.2018.

ПУРПĔРЕХ ЭС МАНĂН ПУЛĂН

Вăрăм Палюк

.

Пурпĕрех эс манăн пулăн,

Çитĕ маншăн та уяв.

Чĕрере яланлăх юлăн,

Эсĕ те мана хыт сав.

.

Эпĕ – санăн, эсĕ – манăн,

Юратсан ялан çапла.

Пуç çинех вĕçсе эс анăн

Кĕçĕр сарă кайăкла.

.

Пурпĕрех эс манăн пулăн,

Ыран мар-тăк – тепĕр кун.

Ман çумра хĕвел пек кулăн,

Саншăн хĕпĕртет ман чун.

.

Эпĕ – санăн, эсĕ – манăн,

Юратсан ялан çапла.

Çаврăнать пуç, тухатланăн,

Ÿкесрен тыт ман алла.

.

Пурпĕрех эс манăн пулăн,

Юрататпăр пĕр-пĕрне.

Эпĕ – пулăç, эсĕ – пулă,

Ишсе килĕн каçхине.

.

03.01.2018.

МАНА ЭС ХЫТĂ ЫТАЛАТĂН

Вăрăм Палюк

.

Мана эс хытă ыталатăн,

Пуç çаврăнсах каять вара.

Мĕнле илемлĕ, йăрăс эсĕ?

Кĕрет чĕлхÿ ман çăвара.

.

Хăвна мĕнле туятăн çăмăл

Эс пăрахсассăн юратса.

Паллах, ун чух хĕвеллĕ кăмăл,

Куçу çиçет сан çутатса.

.

Мана эс хытă ыталатăн,

Чупса каять юн вăйлăрах.

Эппин, чунтан эс юрататăн,

Юратура асам пурах.

.

Хăвна мĕнле туятăн çăмăл

Эс пăрахсассăн юратса.

Ун чух пит кулянса эс тăмăн,

Çут туйăмсем вĕри, таса.

.

Мана эс хытă ыталатăн,

Кăлт-кăлт сикме пуçлать чĕре.

Ахăлтатсах вара кулатăн,

Вĕçетĕн çÿллĕ тÿпере.

.

03.01.2017.

ĔМĔТЛЕНЕТĔП

Вăрăм Палюк

.

Савниçĕм, эп ĕмĕтленетĕп

Туйма сан туйăм ăшшине.

Хăш чух санран эп тĕлĕнетĕп:

Кам хĕм сапать сан чĕрÿне?

.

Ах, ĕмĕт, ĕмĕт, çутă ĕмĕт,

Хăçан вăл пурнăçланĕ-ши?

Хура куçу сан – пиçнĕ çĕмĕрт,

Çÿхе те вăрăм куç харши.

.

Савниçĕм, эп ĕмĕтленетĕп

Сана хĕрÿллĕн чуп тума.

Вĕçетĕп янкăр тÿпене те,

Килсе ларсам эс ман çума.

.

Ах, ĕмĕт, ĕмĕт, çутă ĕмĕт,

Хăçан вăл пурнăçланĕ-ши?

Çиçет сан чĕрÿнте вут хĕмĕ,

Унтах – çут туйăмсен ташши.

.

Савниçĕм, эп ĕмĕтленетĕп

Халь пурăнма санпа пĕрле.

Эп сансăр хăвăрт сивĕнетĕп,

Эс ăшăтсам мана çĕрле.

.

03.01.2017.

МĔН-МА ХĂРАС ЮРАТУРАН?

Вăрăм Палюк

.

Мĕн-ма хăрас юратуран?

Чун-чĕрене вăл питĕ кирлĕ.

Эс йăл кулса савăнтаран,

Санпа, савниçĕм, чунăм чирлĕ.

.

Мĕн-ма çапла-ши юрату?

Пурне те ырă чун савсассăн.

Хăш чух кÿрсен те ырату,

Çапах чĕре юрлать хавассăн.

.

Мĕн-ма хăрас юратуран?

Хĕрÿллĕ унăн вут-кăварĕ.

Мана эс хытă çунтаран,

Пĕрне-пĕри ялан савар-и?

.

Мĕн-ма çапла-ши юрату?

Пурне те ырă чун савсассăн.

Çырла пек тутлă сан туту,

Ай, чуп тăвасчĕ тĕл пулсассăн.

.

Мĕн-ма хăрас юратуран?

Çунат хушса вĕл-вĕл вĕçетĕн.

Мана савса эс астаран

Анчах сăлтавсăр кĕвĕçетĕн.

.

04.01.2017.

ЮРАТУШĂН

Вăрăм Палюк

.

Юратушăн йăлтах эпĕ парăп

Хамăн мĕн пуррине пĕр сана.

Вĕл вĕçме çуната эпĕ сарăп,

Халь чĕнет çÿл тÿпе те мана.

.

Çунтарать пирĕн ик чĕрене те

Юрату, юрату, юрату.

Сан çине пăхсанах хĕрелетĕп,

Ухмаха-çке ертет сан туту.

.

Юратушăн йăлтах эпĕ парăп,

Чи малтан – пит вĕри чĕрене.

Каçсерен сан çумна пырса ларăп,

Лайăх ырă тума пĕр-пĕрне.

.

Çунтарать пирĕн ик чĕрене те

Юрату, юрату, юрату.

Анчах эпĕ санран именетĕп,

Эс мана хытă-хытă чуп ту.

.

Юратушăн йăлтах эпĕ парăп

Пĕр сана – саншăн ним те шел мар.

Сан валли сĕреке те эп карăп:

Тыткăна лекĕн эсĕ вăр-вар.

.

04.01.2017.

КУÇ ТĂРĂХ ВУЛАМА ВĔРЕНТĔМ

Вăрăм Палюк

.

Куç тăрăх вулама вĕрентĕм,

Куçу сан, тусăм – кĕнеке.

Анчах та калама иментĕм,

Сан туйăму таса, пике.

.

Савниçĕм, сан куçу пит тарăн,

Вăл çырмари çăл куçĕ пек.

Чунтан савма та эс пултарăн,

Сăну – тин çурăлнă чечек.

.

Куç тăрăх вулама вĕрентĕм,

Унта мĕн çырнă – тĕрĕсех.

Вуларăм та çÿле çĕклентĕм,

Ман чун савни те вăл эсех.

.

Савниçĕм, сан куçу пит тарăн,

Вăл çырмари çăл куçĕ пек.

Пĕрре пăхсах мана путарăн –

Эс ман çине ан пăх-ха тек.

.

Куç тăрăх вулама вĕрентĕм,

Куç ăнланать-çке сан куçна.

Анчах çырла пек эп хĕрелтĕм

Эс чуп тусассăнах мана.

.

04.01.2017.