Сизни соғинаяпман Онажон!

Кўксимда гуриллар бир ўт, бир олов,
Унга юрак қалов, унга дил қалов,
Сиз кеча кетдингиз, мен бугун дарров,
Сизни соғинаяпман Онажон!
Ёстуқлар бағридан излаб исингиз,
Кўзимнинг олдидан кетмай юзингиз,
Энди қандоқ қилсин шўрлик қизингиз,
Сизни соғинаяпман Онажон!
Кенг дунё бўшлиққа айланиб олди,
Таянчим, тиргагим бирдан йўқолди,
Бу қисмат бошимга не кунни солди,
Сизни соғинаяпман Онажон!
Эшик тутқичларин ўпгим келяпди,
Бир тола сочингиз топгим келяпди,
Кўксим заҳга бериб ётгим келяпди,
Сизни соғинаяпман Онажон!
У уйдан бу уйга тентиб саро-сар,
Суратга термулиб оппоқ тонг қадар,
Афсус, якуни йўқ сиз кетган сафар,
Сизни соғинаяпман Онажон!