Предыдущая публикация
Годекlабах рукlун давладул бицун
Дида чlалг1ун руго вай магlарулал
Кlалцlуца цlуллъарал цlахlилал чуял
Цlоралде ралагьун хlихlулел руго
Рилъа гlолохъаби Нахъа Цlоралде
Хъат кьабун босизе нилъейго давла
Илхъилъа тlад рищун чуялги рачун
Черкессалъа рищун тlад кьалалги лъун
Жиндаго рекъараб къокъаги бачун
Къокъарав Ражбадин Нахъа Цlоралде
Доб Ццебе Цlоралде тlаде щваралго
Цо гьари гьабураб Ражбадиница
Аварагзабазул заманаялда
Зирарий гlадинаб талихl кьегиян
Чи чlван би гьекъолел хlамул гуржиял
Хвалчай насиблъаги Я РасулюЛлагь
Доб Цебе Цlоралда гьариги гьабун
Доб нахъа Цlоралде давла гьабураб
Дояго цlар арай Уздал Меседо
Цlа бакьулъе кlанцlун гьейги хъамунин
Лъаратlа натl бугел цlахlилал оцал
Цlалацаги кьабгlун ццере къотlанин
Гьединаб хlалалда рачlунеб мехалъ
Алазан рагlалде рещтlун рукlадго
Макьилъ бихьанила Ражбадинасда
Бидул хlоринисан чердон рахунел
Жеги бихьанила гlолохъабазда
Хвалчадул балалъан биял гьекъолеб
Щибдай гlаламатан тlуркlун рорчlидал
Сверун ккун ратана хlамул гуржияз
Нужей талихl къаял хlамул гуржиял
Ниж эбел инсуе цо цоял руго
Рачарал лъудбузе ниж цlакъ хириял
Нижее нух биччаe хlамул гуржиял!
Нуж эбел инсуе цо цо ратани
Бакьулъа къотlила, кlи кlи гьарила!
Рачарал лъудбузе хирал ратани
къаркъала гьаниб тун бутlрул ритlила
Бацlияб гьелица чанги гьеланин
Гьанже кир гьелил вай магlарулал
Царалаб макруялъ чанги щинкlанин
Гьанже кив щинкlилев Рекъав Ражбадин?
Зодихъе роржине хlанчlиги гуро
Кире нуж роржинел гьитlинаб къокъа?
Ракьалде тlерхьине гlункlкlалги гуро
Киве мун тlерхьинев тlадмагlарулав?
Зодихъе роржине хlанчlи гуродай,
Кьвагьаралъуб къалеб мазгарул гулла
Ракьалде тlерхьунел гlункlкlал гуродай
Кьабураб къотlулеб чарамул хвалчен
Кьабе гlолохъаби чарамул хвалчен
Хвалчадул балада би бетизегlан
Речlчlе г1олохъаби дурусаб гулла
Хъирмазул кlкlалабахъ кlуй бетизегlан
Кьабизе журана вай магlарулал
Гlурдай сангарал ран къвекlун чуял къан
Гьал маг1арулазул рагъи бихьидал
Ахlдезе лъугьана хваяв Ираклий:
Гьаб гьитlинаб къокъа щиб рахалдасан
Къокъадул ццевехан щив гьезул кколев!
Гьаб гьитlинаб къокъа тlадмагlарулал
Рохьазда куцарал квешал къачагъал
Къокъадул ццевехъан Рекъав Ражбадин
Бицунеб рагlичlищ багьадурасул
Вачlа ле Ражбадин рекъел гьабизе
Ясал дуй бокьани мусудул кьела
Васал дуй бокьани лебалал кьела
Чуял дуй бокьани тириял кьела
Ххазина бокьани гьакица кьела
Г1арац дуй бокьани къолоца кьела
Месед дуй бокьани сахlица кьела
Дурги дирги инсул рекъел батичlо
Рекъела нилъеда паркъи хвалчадул
Кlияздаго гьоркьоб хиси ккеларо
Хис хисун т1амила т1ухьидул гулла
Гьал магlарулазул гlедерлъи бихьун
Хван кагъат бит1ана гlурус ханасде:
«Вачlа ле гlурус хан бал къварилъуде
Цо гlаламат буго бал къварилъуда.
Цо цоял ч1валелде анцlгояв чlвала,
Анцlгоял чlвалелде нусгояв чlвала,
Гlадамал лъаларо жундул лъаларо
Квер базе к1оларо маг1арулазда»
Вачlунев вихьула доле гlурус хан
Жиндирго хlохьлица чу бихьуларо
Чуязул хlуруца бо бихьуларо
Гьел гуржиязул бо кlодo бихьун
Свердизе лъугьана вай магlарулал
Свердуге свердуге вай магlарулал
Аллагьас кьелебин нилъейги къуват
Вахъа гьитlинав вац Гъолоде ине.
Гьанисан Гъолоде лъабго къоил нух
Къалъилалде щвола щватал хъахlаб чу.
Саламилан абе гъолодисезда
Гьанисан Гъолоде лъабго къоил нух
Къалъилалде щвана Ражбадинил вац
Ассалам гlалайкум вай гъолодисел!
Вагlалайкум салам Ражбадинил вац!
Гулайищ чучараб чуйищ свакараб?
Гуллаги чучичlо чуги саквачlо
Сверун гуржияца къан, тана багьадур!
Рагъуй гъира бугел дол гъолодисел
Хъат кьабун кьолона кьариял чуял
Дов гlурус ханасул багlараб байрахъ
Чол малакь мерхьана магlарулаца
Гьороца тlамулел т1амах гlадинан
Тlамана авараз гуржиязул бо.
Доб нахъа цlоралда цlар бугел ясал
Чодул кьолонир лъун гьелги хъамана
Лъаратlа натl бугел цlахьилал оцал
Цlaлацаги кьабун ццере къотlана
Гьединаб хlалалда хlал хьараб куцалъ
Хlал кlвараб давлаги бащад бикьанин
Гьединан руссана васал рокъоре.
Я Аллагь гьареги Аварал васал
Ара аралъуса давла босулел.
#музыка
Следующая публикация
Нет комментариев