Предыдущая публикация
Ўлсам, жанозамни булбул ўқисин,
Куйиб ўтган умрим шархини айтсин.
Бардошим хақида ашъор тўқисин,
Мендан норозилар фикридан қайтсин.
Ўлсам, жанозамни булбул ўқисин,
Айтолмай қолганим десин оллохга.
Саловатлар айтсин тўплаб бор кучин,
Билмаган билганин десин оллохга.
Ўлсам, олов таним муз билан ювинг,
Токи кафанларим кетмасин куйиб.
Ювгач юрагимга парча муз қўйинг,
Борай хузурига озгина совиб.
Ўлсам, кафанимни булутдан қилинг,
Ёмғирга айлансин ёнсам қабрда.
Қабримни қазсангиз сал кенгроқ олинг,
Гунохкор бандага тор гўр жабрда.
Ўлсам, чинор экинг қабрим бошига,
Токи соясида тиловат ўқинг.
Чўмилиб яшадим кўзим ёшига,
Йиғламанг сиз фақат саловат ўқинг.
Кичкина ясатинг қабр тошимни,
Қуръон оятларин ёздиринг ўйиб.
Ёзманг қабр тошга умрим ёшимни,
Мен сафарга кетдим чориғим кийиб.
Ўлсам, оёқ томон, ўнг томонимга,
Тўрт киши сиғарлик курси ясатинг.
Соғиниб келсангиз ихлосни ўқинг,
Қабримни гул эмас қуръон безасин.
Ўнг тарафдан келинг оёқ тарафдан,
Токи кўрсин сизни очиқ кўзларим.
Ўлим хақ эканин оласизда тан,
Қувонай келди деб ўғил қизларим.
Ўлсам, йўқлаб туринг билинг кутаман,
Чунки сиз деб ўтдим ўзимдан кечиб.
Йўқламай қўйсангиз зардоб ютаман,
Ётаман гўрда хам кўз ёшим ичиб.
Ўлсам, умрим шархин набираларга,
Яширмай оширмай борини сўзланг.
Интиқ кутганимни уларни хамда,
Ёниб ўтган кўнглим зорини сўзланг.
Ўлсам, ахл бўлинг мехрибон бўлинг,
Имконин топсангиз тўланг қарзимни.
Дуосини олинг мен севган элни,
Мерос қолдираман сизга сабримни.
Ўлсам, жанозамни булбул ўқисин.....
Следующая публикация
Нет комментариев