Бу дунё жумбоқми, ёки бир синов,
Бошингга иш тушса қарамас биров.
Қоп-қора сочингга тушганда қиров,
Тушуниб етарсан онанг дўстлигин,
Бу дунёда сенга отанг дўстлигин!
Тўй қилсанг ошинг еб кетарлар қара,
Сўнг ортдан ғийбатни отарлар қара.
Ўз дўстинг қилганда сени масхара,
Тушуниб етарсан онанг дўстлигин,
Йиқилсанг, қалқонинг отанг дўстлигин!
Дўстман деб тилида айтганлар ҳам бор,
Ёрингга кўзини тикканлар ҳам бор.
Пичоғин билдирмай суққанлар ҳам бор,
Вақт келиб биларсан онанг дўстлигин,
Бу дунёда сенга отанг дўстлигин.
Кулфатлар ёғилса агар бошингга,
Йўқлаб келмас ҳатто дўстинг қошингга.
Эътибор қилмайди кўзда ёшингга,
Онангдан ўзгаси қарамас экан,
Ўзгаси кунингга ярамас экан.
Худойим мен сендан сўрарман фақат,
Сабр бер ёмонга қилайин тоқат.
Эй дунё, бунчалар бўлма бешафқат,
Оқибат тушундим онам дўстлигин,
Бошимга иш тушса отам дўстлигин...
Присоединяйтесь к ОК, чтобы подписаться на группу и комментировать публикации.
Нет комментариев