БИЛДИРУВ Менга сумалак ҳақида ва пайғамбаримиз алайҳиссаломнинг у зотга бир баҳор таоми мажусийлар томонидан ҳадя этилганида "бу нима?" деганлари, саҳобаларнинг "бу найруз таоми экан" деганлари, пайғамбаримизнинг "ҳар кунингиз найруз (наврўз) бўлсин" деганлари бирор саҳиҳ ёки заиф санад билан келганми? деб бир неча киши савол беришди. Қуйидагиларни маълум қилмоқчиман: Бундай ривоят пайғамбар алайҳиссаломга мансуб равишда бирор манбада келмаган, на саҳиҳ санад билан ва на заиф санад билан. Мабодо келган бўлса ёлғон ва тўқима бўлади. Негаки, пайғамбаримиз алайҳиссалом ҳаётликларида мажусийлар билан мусулмонлар аралашмаган эдилар. Ҳижрий саккизинчи йилда атроф мамлакатларга пайғамбар алайҳиссалом даъватни ёйиш учун хат йўллаганларида мажусий форслар подшоси Кисрога ҳам элчи жўнатган эдилар. Бўлган алоқа шу, холос. Бир саҳобий элчи ўлароқ мажусийлар диёрига сафар қилиб, исломга даъватномани етказиб қайтган. Кисро ўз навбатида пайғамбар алайҳиссалом мактубини бурдалаган эди. Элчи қайтгач, бу хабарни эшитиб пайғамбар алайҳиссалом "Раббим! Унинг-да мамлакатини парчала!" деган эдилар. Бу хабар Саҳиҳи Бухорий ва бошқа саҳиҳ манбаларда келган. У зот вафотларигача бошқа алоқа бўлган эмас. Пайғамбар алайҳиссалом вафотларидан сўнг Абу Бакр розияллоҳу анҳу халифалиги даври ўтди. Ундан сўнг Умар розияллоҳу анҳу халифалиги даври охирларида форс диёрлари қўлга киритилди. Бу - барча тарихчилар иттифоқ ва ижмо қилган воқеалардир. Хулоса, юқоридаги каби ҳадиснинг мутлақо асоси йўқ. Оллоҳ таоло барчамизни ислоҳ қилсин, пайғамбар алайҳиссаломга билиб-билмай ёлғон тўқиб қўйишдан ўзи асрасин. ===== Биродарлар! Бу ерда мендан қаттиқ сўралгани учун жавоб қилинди. Аҳли илмларга тил чўзиш учун эмас. Ҳар ким хато қилади. Бизнинг вазифамиз хатонинг хато эканини кўрсатмоқ ва хато қилган киши ҳақига истиғфор айтмоқдир. Номусга тегиб ўзимизга гуноҳ сотиб олмоқ эмас. Бинобарин, биродарлардан тилларига эҳтиёт бўлишларини сўраб қоламан. © Сайфуллоҳ Носир ҳафизаҳуллоҳ http://t.me/sayfulloh_nosir