Предыдущая публикация
Шке мутет кӱлеш шукташ
Оккӱл еҥым ондалаш
Илыш закон ден илаш
Чылалан пример лияш
Мылам тыге кӱштенат
Шочмо кушмо ачаем
Яклакарак корныштат
Йолым пеҥгыдын шындаш
Камвочмаш деч арален
Лӱдде ончык ошкедаш
Неле, ойгымат сеҥаш
Тура корнышко лекташ
Сугыньым пуен шоген
Илаш мылам кӱштенат
Сурт капка гыч лектынат
Ял урем ден ошкеден
Вашлиялын пошкудет
Ӱдырамашым, йочамат
Поро эрым каласен
Шыргыжалын колтенат
Шинчамат пӱялынат
Воштылтарен эртенат
Куандарен моштенат
Кӱдырчӧ виян йӱк ден
Осал,торжа еҥымат
Веран верыш шынденат
Лишыл поро ачайем
Каласаш мастар улат
Кӱдырчӧ йӱкет денат
Чыным веле ойленат
Тыгак илаш кӱштенат
Кучылтмо ӱзгарымат
Верыш пышташ ойленат
Пашам ыштен пытармек
Эрыкташ туныктенат
Кеч могай ӱзгарымат
Кӱштен отул йышт налаш
Шкендын улшо ӱзгарет
Ит йомдаре манынат
Шкендын улшо ӱзгарет
Арам ит пу нигӧлан
Весын кучылтмо ӱзгар
Тыйын ок лий, нигунам
Умылтарен ойленат
Еҥ ӱзгар ок кӱл тылат
Йышт ит нал, нигунамат
Шӧртньӧ правилым мылам
Тыгеракын ойленат
Еҥ шинчаш тура ончаш
Мутым пеҥгыдын ойлаш
Калык дене кутыраш
Кугуракымат аклаш
Мутшым шыпак колышташ
Туныктенак ойленат
Чыла еҥым пагалаш
Весын мутым колышташ
Шонен, акымат пуаш
Икманаш ушан лияш
Туныкташак тыршенат
Тура корныш луктынат
Тыланет кӧра, ачай
Илышым аклен шогем
Ошым-шемым,ойырем
Сай-осалым,шекланем
Шере-кочымат,тамлем
Лийынат мылам ӱшан
Пеҥгыде, чотак виян
Тау мутым каласен
Сугынь мутетым шуктем
Кӱртньӧ виян ачаем
16.04.2024г. Леонид Гаврилов
Следующая публикация
Комментарии 9