Предыдущая публикация
Елімізде алғаш рет «Егемендігім – елдігім!
» атты республикалық «Қола домбыра» оқушылар айтысы өтті
Оқу-ағарту министрлігі Айтыс ақындары мен жыршы-термешілердің халықаралық одағымен бірлесіп «Егемендігім – елдігім» тақырыбында республикалық «Қола домбыра» оқушылар айтысын ұйымдастырды. Оған еліміздің 20 өңірінен 12-18 жас аралығындағы 22 жас ақын қатысты.
Оқу-ағарту министрі Ғани Бейсембаев айтыс ұлттық құндылықтарымызды ақындық өнер арқылы жас ұрпаққа насихаттау ғана емес, сондай-ақ оқушыларды адал, саналы, жасампаз азамат ретінде тәрбиелеудің рухани құралы деп атап өтті.
«Мемлекет басшысының Ұлттық құрылтайдың «Әділетті Қазақстан – адал азамат» атты екінші отырысында айтқан маңызды мақсаттарының біріне қол жеткізу үшін министрлік жалпыадамзаттық және ұлттық құндылықтар, патриотизм мен еңбекқорлық қағидаттарына негізделген «Біртұтас тәрбие» бағдарламасы аясында бірқатар шараларды жүзеге асыруда. Кез келген елдің бірлігі мен өркендеуі ұлттық тәрбие мен рухани құндылықтарды дәріптеуге байланысты. Айтыс – өнер сайысы ғана емес, жастарымыздың шығармашылық, рухани-мәдени әлеуетін дамытатын, эстетикалық тәрбие жүйесін жетілдіретін маңызды алаң», – деді Ғани Бейсембаев.
Айта кету керек, айтыс «Біртұтас тәрбие» бағдарламасы аясында бекітілген «Төрт тоқсан – төрт өнер» ұлттық мәдени-ағартушылық жобасының алғашқы тоқсанын қорытындылайды.
Толығырақ біздің веб-сайттан оқыңыз - https://bilimdinews.kz/?p=263102
Следующая публикация
Нет комментариев