Предыдущая публикация
ЧААП БАРАТЫП ЧАЛКАМАН КЕТТИМ
-5-
-Ушинтип жүрөгүм жайында турбай, ар дайым күдүк ой менен коркуу сезим менен дагы канча жашашым керек? Турмуш катуу сыноого койду мени. Эки тарапты тең кыя албай, же ачыкка чыгып жашай албай кыйналдым. Чынара мени менен дароо эле ажырашса керек, эгерде Марал менен мамилемди билсе. Муну апам көтөрө албас. Топурагын түйүп берээр. Айылга бут баспай бетим күйөт. Атам аталыктан кечип кетет. Төрт уулум мени акылдарына киргенде жек көрөт го. Ушуларды ойлосом коркуп кетем.
Марал нике кыйдыралы дейт. Ооба, баламды никесиз төрөлбөсүн деп жатат да, мен дагы каалайм. Ушундай чачыранды ойлор менен алышып кеч жаттым.
Таң кашкаяр замат жумушка жөнөдүм.
МАРАЛ:
Демек, Алиге дагы деле айтпай жүрөт экен да хм?! Өзүн абдан акылдуу аял сезет го ээ? Байкушум десе, Алибекке кыз төрөп бергенде жеңилээрсиң менден.
Нике кыйдырып, мен дагы башкалар сыяктуу бактылуу жашагым келет. Балам пайда боло электе ойлорум такыр башкача эле, азыр түп тамыры менен өзгөрдү. Эми артка кайтпаймын Чынара айым. Азырынча өзүңдү акылдуу сезе тур. Убакыт көрсөтөт.
Болгону, тиги кемпайдан кутулуп алыс кетүү керек. Ал бизди жайыбызга койбойт го. Башым катты, ойлосом коркуп кетем. Марал ушинтип күбүрөнүп, тынчсызданып алды.
АЛИБЕК:
Убакытты созуп олтурбай Марал менен нике кыйдырууну туура көрдүм. Курсагы алты ай болуп билинип калды. Дасторконду дүйүмгө толтуруп, жакшы молдону үйгө алып келип, экөөбүз ант беришкен жубайлардан болдук. Ушул убакыт аралыгында Чынара экөөбүз катуу алыстап кеткен болчубуз. Акыры кесепети мени ушул чечимге келип такады. Ал таптакыр өзгөрдү, себеби мага белгисиз бойдон калды. Сүйлөшпөй калдык. Бир төшөктө чогуу жатканыбыз эле болбосо эки башка адамга айландык. Менин үйдө бар жогум ага маанилүү болбой калды. Ошондо мага жетишсиз мээримди, жылуулукту Маралдан таптым. Мага баары бир сыяктуу көп убакытты Марал менен өткөрүп, үйүмө уулдарым үчүн гана келип калдым.
Адаттагыдай сыр алдырбай үйгө келип керектүү документтерди издеп жаткан элем. Себеби үй бүлөбүзгө кошумча булак болгон дүкөндү сатууну туура көрдүм. Анткени Маралга башка үй алып берип, өз үйүмдөн алысыраак жашоосун кааладым. Ал дагы жашап жаткан бир бөлмөлүү батирин сатып, кененирээк үй алалы деп сунуштады. Эртеби кечпи баары билинет, ошондо Марал менен жашоочу өз үйүм болсун дедим.
- Алибек,- деди Чынар үнү дирилдей.
- Эмне болду?
- Кел, экөөбүз сүйлөшүп алалы, убакыт деле келди окшойт.
- Макул, эмне жөнүндө?
- Экөөбүз жөнүндө.
Ыйлап, көздөрү шишиген. Жүр дегендей ашкананы көздөй басты. Экөөбүз бет маңдай олтурдук.
- Али, ушул күнгө чейин сени капа кылдым беле?
- Жок,- дедим башымды чайкап.
- Сенин айтканыңды укпай, бейчеки бастым беле?
-Жок...
- Ата- энеңе жаман мамиле жасадымбы?
- Жок...
- Сага төрөп бердимби?
- Ооба...
- Же, үй- жайыңды тыкан алып олтурбай иленди аял болдумбу? Балдарыңа туура эмес тарбия берип, кароосуз таштадымбы? Сенин карегиңден тең айланган жокмунбу? Сага жаман жубай болуп бердимби? Же эмне, сулуу эмесминби? Өзүмдү карабай койдумбу? Сага жаштыгымды арнаган жокмунбу? Алгач турмушка чыкканда таза келген жок белем? Же көзүңө чөп салдымбы?
Чынара сүйлөп жатты, көзүнөн жашы агып жатты. Мен сөз төркүнүн түшүндүм. Акыры ушундай болмок, мен буга эчак даярданган элем.
- Жок, сенден айып кеткен жок, - дедим сүйлөп бүткөн соң.
-Анан эмне болду айтчы? Кудайым кыз бала бербесе менде эмне айып? Колумдан келсе азыр дагы төрөп берет элем, аргам жок. Кана менин акылдуу күйөөм? Же ушунчалык келесоо экениңди байкабай жүрдүм беле? Ушунча убактымды бир акылсыз адам менен өткөрүп жибердимби? Балдарым акырындык менен атасынан ажырап жатканын байкабай жатат дейсиңби? Ысыгы тараса ал уятсыз немесин таштайт го, көздөрүм көргөн жок, кулагым уккан жок,- деп жашап келдим. Сени мени келесоо ойлойсуңбу Алибек? Башкасына көз жумайын, азыр эле унутайын. Нике кыйдырып алганың эмнең?
- Сен кайдан билдиң?- дедим шашып кетип.
- Кызыксың, билинбей калат дедиң беле?
Ал дайымкыдай эле, олуттуу сүйлөгөнү эле болбосо үнүн көтөрүп сүйлөбөйт, ызы чуу да кылган жок. Жөн гана акырын ушул кептерди айтып жатты. Шылкыйып жер тиктеп олтурдум.
Ага биресе боорум ооруса, башка жашоону кыялданып, чечим чыгарып алган жаным оюмдан кайтпай турдум. Анын үстүнө көптөн күткөн кыздуу болушумду ойлогондо алдыда мени башка бактылуу турмуш күтүп тургандай сезилет.
- Чынар, мени кечирип кой. Суранам. Мен акмактык кылдым. Сенин алдыңда күнөөм тоодой. Бирок бир нерсени эсиңе ал. Менден алыстап, аябай өзгөрдүң. Биздин жолдор эки башка жакка бөлүндү. Силерди таштап кетпейм. Балдарымды таштабайм. Экөөбүз гана ажырашабыз. Сенден эч нерсе талашпайм, болгону дүкөндү сатам. Үй- жай, унаа баары балдарым үчүн. Бир ыңгайын издеп жүрдүм эле сүйлөшө албай. Оюңду айт, ачууланба өтүнөм. Балдарга бат- бат келип турам.
- Менин муздап, өзгөрүүмө сен себеп болуп жүрбө Али? Ушул тууралуу ойлодуңбу?
- Эмнеси болсо да таарынба, мени күнөөлөбө сураныч. Жашоодо ар нерсе болот экен.
- Байкашымча өз катаңды сезбес абалга жетипсиң Али, аттиң дейм, аргам жок. Сени кармабайм. Өз билгениңди кыл. Биздин күнүбүз өтпөй калмак беле. Ата- энелерибизге өзүң түшүндүрөсүң. Мен эч нерсе дей албаймын.
- Ал жагынан сарсанаа болбо, өзүм түшүндүрөм.
Ушул сөздөрдү айтып, ордумдан турдум да жөнөй бердим. Жүрөгүмдө боштук, алсыздык жашынып турду. Бир гана ой башымдан кетпей жатты. Үйдөн чыгып баратып артыма бурулдум да, Чынарадан сурадым.
- Сага ким айтты? Качантан бери билесиң? Ачыгын айтчы,- дедим.
Жүзүн жууп, мени таң кала карады да...
- Айырмасы кайсы? Билгениме көп болду,- деди да басып кетти.
Чынардын акылдуулугун, токтоолугун, сабырдуулугун пайдаландым көрүнөт. Үйдөн чыгып баратып, эч нерсе жоготпогондой жүрөгүм ток болду. Жаман оюмда эки аял менен жашагым келип турду.
Уландысы бар
Эльвира Мейманова
Следующая публикация
Комментарии 22
Марал да билип туруп жасады жакшы болгон жок аман эсен тороп алсын кайра келет го сага чвгармачылык ийгилик