Предыдущая публикация
Ўзбекистон миллий терма жамоаси ва "Анжи" клуби ярим ҳимоячиси Одил Аҳмедов фаолиятини Москванинг ЦСКА клубида давом эттириши мумкин.
Айни вақтда москваликлар 26 ёшли футболчининг агенти ва "Анжи" билан музокара олиб бормоқдалар. ЦСКА футболчини ижарага олишни ёки 8 миллион евро эвазига сотиб олишни истайди.
Аммо Одил Аҳмедовда бошқа таклифлар ҳам бор. БАА клубларидан бири футболчига жуда катта наф келтирадиган шартнома таклиф қилмоқда.
Эслатиб ўтамиз, қишда "Краснодар" Одил Аҳмедов учун жуда яхши таклиф билдирган, аммо "Анжи" бу таклифни рад этган эди.
Аммо ҳозирда вазият ўзгарган. "Анжи" қуйи лигага тушиб кетгани сабабли фақат уч нафар легионерни таркибда сақлаб қола олади ва бошқаларни сотиб юборишга мажбур. Аслида махачқалъаликлар Одил Аҳмедовни бир мавсумга ижарага бериб, келаси йил премьер лигага қайтгач, яна қайтариб олишни истамоқда. Аммо ЦСКА раҳбарияти бунга рози бўлмаслиги мумкин. Чунки москваликлар ижарага олинган футболчилар билан ишлашни ёқтирмайдилар.
ЦСКА клубининг икки нафар швед футболчиси Расмус Эльм ва Понтус Вернблумлар Европага қайтишни истамоқдалар. Шу сабабли "армиячилар" Одил Аҳмедов билан жамоа таркибини кучайтиришни кўзламоқдалар. Айни вақтда Ўзбекистон терма жамоаси ярим ҳимоячиси ЦСКА учун энг асосий трансфер мақсади бўлиб турибди. Хабар қилинишича, томонлар келишувга эришишга яқин турибдилар.
Следующая публикация
Комментарии 4