ХххххххХ

Сени ючюн умутуму бырнак эте,
Айланч- буйланч тогъуз жолну, ах , арытып...
Жашау этдим, жулдузланы чыракъ эте,
Баллы сыртны кече сайын жап- жарытып.
Ма кёр, кюйген жюрегиме дарман излей,
Жол тапмадым, къайдам...Хорлатмады антым.
Алай а барды - бар санга осуятым,
Мудах осуятым - алтынкъанат кюзлей...
Сени ючюн умутуму жерге сугъа,
Керексизге кюйдюм тогъуз отха кирип.
Жюрегиме такъдым тогъуз бугъоу кирит,
Ачхычларын атдым тогъуз баргъан суугъа...
Алма терегингден жаннет кёгет юзмем,
мени ахшым...Уллу сёлеширге базмам.
Къадар сынау берсе, жашауубуз - базман.
Насыбыбыз кетди къула тюзге.
Сени ючюн макъам салып тогъуз жыргъа,
Тебиретдим сюймекликни бош бешигин...
Тебиретдим кюймекликни шош бешигин,
Эшмелерим бууакъ болуп тогъуз жылгъа...