Предыдущая публикация
MEN QALADA OQIG'ANDA.
Sabaqtan kesh shig'ar edik,
Men qalada oqig'anda.
Ku'n bata awildan kelip,
Ku'ter edi anam sonda.
Paxta zavod diywalina,
Su'yenip ol turar edi.
Pu'tkil du'nya qiyalina,
Men dep jolg'a qarar edi.
To'bemdi ha'r ko'rgen sayin,
Bir jilli so'z aytadi ol.
"Sharshadin'-aw, aynanayin",
Dep basimnan siypadi ol.
Qayta tuwg'anday quwanip,
Aldi-artig'a qaramay-aq.
Qaran'g'ida qariwlanip,
Barar edik jalan' ayaq.
Iyt ko'rinse qarsimizdan,
Qoriqpag'ang'a usar edik.
Adam shiqsa aldimizdan,
Joldan shetke qashar edik.
Endi bazda mashinali,
O'tsem zuwlap sol ka'radan.
Jelbirep aq oramali,
Meni ku'tip turar anam.
Ha'm to'bemdi ko'rgen sayin,
Quwanip qol bilg'ag'anday.
"Sharshadin'-aw, aynanayin!"
Dep basimnan siypag'anday.
Mart. 1987-jil
Следующая публикация
Нет комментариев