Предыдущая публикация
🌹☘️🌹 КАНОН РОЖДЕСТВУ ХРИСТОВУ.
🌹☘️🌹
Тропарь, глас 4
Рождество́ Твое́ Христе́ Бо́же наш, возсия́ ми́рови свет ра́зума, в нем бо звезда́м служа́щии, звездо́ю уча́хуся, Тебе́ кла́нятися Со́лнцу пра́вды, и Тебе́ ве́дети с высоты́ восто́ка, Го́споди, сла́ва Тебе́.
Глас 1.Песнь 1
Ирмос: Христо́с ражда́ется, сла́вите; Христо́с с небе́с, сря́щите; Христо́с на земли́, возноси́теся. По́йте Го́сподеви вся земля́, и весе́лием воспо́йте лю́дие, я́ко просла́вися.
ПРИПЕВ: Сла́ва, Го́споди, Свято́му Рождеству́ Твоему́.
Истле́вша преступле́нием, по Бо́жию о́бразу бы́вшаго всего́ тле́ния су́ща, лу́чшия отпа́дша Боже́ственныя жи́зни, па́ки обновля́ет Му́дрый Соде́тель, я́ко просла́вися.
ПРИПЕВ: Сла́ва, Го́споди, Свято́му Рождеству́ Твоему́.
Ви́дев Зижди́тель ги́блема челове́ка, рука́ми его́же созда́, приклони́в небеса́ схо́дит. Сего́ же от Де́вы Боже́ственныя Чи́стыя, всего́ осуществу́ет, вои́стинну вопло́щься, я́ко просла́вися.
Слава: Му́дрость, Сло́во и Си́ла, Сын сый Отчий и Сия́ние, Христо́с Бог, сил утаи́вся, ели́ко преми́рных, и ели́ко на земли́, и вочелове́чься обнови́л есть нас, я́ко просла́вися.
И ныне: Му́дрость, Сло́во и Си́ла, Сын сый Отчий и Сия́ние, Христо́с Бог, сил утаи́вся, ели́ко преми́рных, и ели́ко на земли́, и вочелове́чься обнови́л есть нас, я́ко просла́вися.
Песнь 3
Ирмос: Пре́жде век от Отца́ рожде́нному нетле́нно Сы́ну, и в после́дняя от Де́вы воплоще́нному безсе́менно, Христу́ Бо́гу возопии́м: вознесы́й рог наш, Свят еси́ Го́споди.
ПРИПЕВ: Сла́ва, Го́споди, Свято́му Рождеству́ Твоему́.
Иже дохнове́ния прича́щься лу́чшаго Адам пе́рстный, и к тле́нию попо́лзся же́нскою ле́стию, Христа́ от Жены́ ви́дя, вопие́т: Иже мене́ ра́ди по мне быв, Свят еси́ Го́споди.
ПРИПЕВ: Сла́ва, Го́споди, Свято́му Рождеству́ Твоему́.
Сообра́зен бре́нному умале́нию растворе́нием Христе́ быв, и прича́стием пло́ти го́ршия, пода́в Боже́ственнаго естества́, зе́млен быв, и пребы́в Бог, и возвы́сивый рог наш, Свят еси́ Го́споди.
Слава: Вифлее́ме весели́ся, князе́й Иу́довых сый Царь: Изра́иля бо пасы́й, на ра́мех Херуви́мских, из Тебе́ про́йде Христо́с я́ве: и вознесы́й рог наш, над все́ми воцари́ся.
И ныне: Вифлее́ме весели́ся, князе́й Иу́довых сый Царь: Изра́иля бо пасы́й, на ра́мех Херуви́мских, из Тебе́ про́йде Христо́с я́ве: и вознесы́й рог наш, над все́ми воцари́ся.
Го́споди, поми́луй. (Трижды.) Слава, и ныне:
Ипакои, глас 8
Нача́ток язы́ков, не́бо Тебе́ принесе́, лежа́щему Младе́нцу во я́слех, звездо́ю волхвы́ призва́вый, я́же и ужаса́ше, не ски́птры и престо́ли, но после́дняя нищета́: что бо ху́ждше верте́па, что же смире́ншее пеле́н? В ни́хже просия́ Божества́ Твоего́ бога́тство: Го́споди, сла́ва Тебе́.
Песнь 4
Ирмос: Жезл из ко́рене Иессе́ова, и цвет от него́ Христе́, от Де́вы прозя́бл еси́, из горы́ хва́льный приосене́нныя ча́щи, прише́л еси́ вопло́щься от Неискусому́жныя Невеще́ственный и Бо́же: сла́ва си́ле Твое́й, Го́споди.
ПРИПЕВ: Сла́ва, Го́споди, Свято́му Рождеству́ Твоему́.
Его́же дре́вле прорече́ Иа́ков, язы́ков ожида́ние Христе́, от коле́на Иу́дова возсия́л еси́, и си́лу Дама́скову, Самари́йскую же коры́сть прише́л еси́ испроврещи́, лесть пременя́я в ве́ру боголе́пну: сла́ва си́ле Твое́й, Го́споди.
ПРИПЕВ: Сла́ва, Го́споди, Свято́му Рождеству́ Твоему́.
Волхва́ дре́вле Валаа́ма слове́с ученики́, му́дрыя звездоблюсти́тели, ра́дости испо́лнил еси́, звезда́ от Иа́кова возсия́в Влады́ко, язы́ков нача́ток вводи́мый, прия́л же еси́ я́ве: сла́ва си́ле Твое́й, Го́споди.
Слава: Я́ко на руно́ во чре́во Де́вы сшел еси́ дождь Христе́, и я́ко ка́пли на зе́млю ка́плющия. Ефио́пиа и Фарси́с, и Арави́йстии о́строви же, Сава́, Ми́дов всю зе́млю держа́щии, припадо́ша Тебе́, Спа́се: сла́ва си́ле Твое́й, Го́споди.
И ныне: Я́ко на руно́ во чре́во Де́вы сшел еси́ дождь Христе́, и я́ко ка́пли на зе́млю ка́плющия. Ефио́пиа и Фарси́с, и Арави́йстии о́строви же, Сава́, Ми́дов всю зе́млю держа́щии, припадо́ша Тебе́, Спа́се: сла́ва си́ле Твое́й, Го́споди.
Песнь 5
Ирмос: Бог сый ми́ра, Оте́ц щедро́т, Вели́каго Сове́та Твоего́ Ангела, мир подава́юща посла́л еси́ нам: тем Богоразу́мия к све́ту наста́вльшеся, от но́щи у́тренююще, славосло́вим Тя, Человеколю́бче.
ПРИПЕВ: Сла́ва, Го́споди, Свято́му Рождеству́ Твоему́.
В рабе́х ке́саревым повеле́нием написа́тися поко́рься, и нас рабы́ су́щия, врага́ и греха́ свободи́л еси́ Христе́; весь же по нам обнища́в, и пе́рстнаго от самаго́ едине́ния и обще́ния богосоде́лал еси́. (Дважды.)
Слава: Се Де́ва, я́коже дре́вле рече́, во чре́ве прие́мши родила́ есть Бо́га вочелове́чшася, и пребыва́ет Де́ва. Ея́же ра́ди примири́вшеся Бо́гу гре́шнии, Богоро́дицу су́щую вои́стинну ве́рнии воспои́м.
И ныне: Се Де́ва, я́коже дре́вле рече́, во чре́ве прие́мши родила́ есть Бо́га вочелове́чшася, и пребыва́ет Де́ва. Ея́же ра́ди примири́вшеся Бо́гу гре́шнии, Богоро́дицу су́щую вои́стинну ве́рнии воспои́м.
Песнь 6
Ирмос: Из утро́бы Ио́ну младе́нца изблева́ морски́й зверь, якова́ прия́т: в Де́ву же все́льшееся Сло́во, и плоть прие́мшее, про́йде сохра́ншее нетле́нну. Его́же бо не пострада́ истле́ния, Ро́ждшую сохрани́ неврежде́нну.
ПРИПЕВ: Сла́ва, Го́споди, Свято́му Рождеству́ Твоему́.
Прии́де вопло́щься Христо́с Бог наш из чре́ва, Его́же Оте́ц пре́жде денни́цы ражда́ет: правле́ния же держа́ пречи́стых сил, в я́слех ско́тиях возлежи́т, и пелена́ми повива́ется, разреша́ет же многоплете́нныя плени́цы прегреше́ний. (Дважды.)
Слава: Ю́но из Ада́ма Отроча́ смеше́ния, роди́ся Сын, и ве́рным даде́ся; бу́дущаго ве́ка сей есть Оте́ц и Нача́льник, и нарица́ется Вели́каго Сове́та Ангел: Сей Кре́пок Бог есть, и держа́й о́бластию всю тварь.
И ныне: Ю́но из Ада́ма Отроча́ смеше́ния, роди́ся Сын, и ве́рным даде́ся; бу́дущаго ве́ка сей есть Оте́ц и Нача́льник, и нарица́ется Вели́каго Сове́та Ангел: Сей Кре́пок Бог есть, и держа́й о́бластию всю тварь.
Го́споди, поми́луй. (Трижды.) Слава, и ныне:
Кондак, глас 3
Де́ва днесь Пресу́щественнаго ражда́ет, и земля́ верте́п Непристу́пному прино́сит. Ангели с па́стырьми славосло́вят, волсви́ же со звездо́ю путеше́ствуют: нас бо ра́ди роди́ся Отроча́ мла́до, Преве́чный Бог.
Икос
Еде́м Вифлее́м отве́рзе, прииди́те ви́дим, пи́щу в та́йне обрето́хом: прииди́те, прии́мем су́щая ра́йская внутрь верте́па. Та́мо яви́ся ко́рень ненапое́н, прозяба́я отпуще́ние: та́мо обре́теся кла́дязь неиско́пан, из него́же Дави́д пи́ти дре́вле возжада́ся. Та́мо Де́ва ро́ждши Младе́нца, жа́жду уста́ви а́бие Ада́мову и Дави́дову. Сего́ ра́ди к Нему́ иде́м, где роди́ся Отроча́ мла́до, Преве́чный Бог.
Песнь 7
Ирмос: Отроцы благоче́стию совоспита́ни, злочести́ваго веле́ния небре́гше, о́гненнаго преще́ния не убоя́шася, но посреди́ пла́мене стоя́ще поя́ху: отце́в Бо́же благослове́н еси́.
ПРИПЕВ: Сла́ва, Го́споди, Свято́му Рождеству́ Твоему́.
Па́стырие свиря́юще, ужа́сно светоявле́ние получи́ша: сла́ва бо Госпо́дня облиста́ их, и Ангел, воспо́йте, вопия́: я́ко роди́ся Христо́с, отце́в Бог Благослове́нный.
ПРИПЕВ: Сла́ва, Го́споди, Свято́му Рождеству́ Твоему́.
Внеза́пу с сло́вом Ангеловым небе́сная во́инства, сла́ва, вопия́ху, Бо́гу в вы́шних, на земли́ мир, в челове́цех благоволе́ние: Христо́с возсия́, отце́в Бог Благослове́нный.
Слава: Глаго́л что сей, реко́ша па́стырие? Преше́дше уви́дим бы́вшее, Боже́ственнаго Христа́. Вифлее́ма же доше́дше, с Ро́ждшею покланя́хуся, воспева́юще, отце́в Бо́же благослове́н еси́.
И ныне: Глаго́л что сей, реко́ша па́стырие? Преше́дше уви́дим бы́вшее, Боже́ственнаго Христа́. Вифлее́ма же доше́дше, с Ро́ждшею покланя́хуся, воспева́юще, отце́в Бо́же благослове́н еси́.
Песнь 8
Ирмос: Чу́да преесте́ственнаго росода́тельная изобрази́ пещь о́браз, не бо я́же прия́т пали́т ю́ныя, я́ко ниже́ огнь Божества́ Де́вы, в Ню́же вни́де утро́бу. Тем воспева́юще воспое́м: да благослови́т тварь вся Го́спода и превозно́сит во вся ве́ки.
ПРИПЕВ: Сла́ва, Го́споди, Свято́му Рождеству́ Твоему́.
Влече́т вавило́ня дщи о́троки плене́нныя Дави́довы от Сио́на к себе́, дароно́сцы же слет во́лхвы де́ти, Дави́дове Богоприя́тней Дще́ри моля́щияся. Тем воспева́юще воспои́м: да благослови́т тварь вся Го́спода, и превозно́сит во вся ве́ки.
ПРИПЕВ: Сла́ва, Го́споди, Свято́му Рождеству́ Твоему́.
Орга́ны уклони́ша плаче́вныя пе́сни, не поя́ху бо в земли́ чужде́й о́троцы Сио́новы: вавило́нскую же разреша́ет лесть всю и мусики́йския соста́вы, в Вифлее́ме возсия́в Христо́с. Тем воспева́юще воспои́м: да благослови́т тварь вся Го́спода, и превозно́сит во вся ве́ки.
Слава: Коры́сти Вавило́н ца́рства Сио́ня, и плене́нное бога́тство прия́т: сокро́вища же Христо́с в Сио́н сего́, и ца́ри звездо́ю наставля́я звездоблюсти́тели влече́т. Тем воспева́юще воспои́м: да благослови́т тварь вся Го́спода и превозно́сит во вся ве́ки.
И ныне: Коры́сти Вавило́н ца́рства Сио́ня, и плене́нное бога́тство прия́т: сокро́вища же Христо́с в Сио́н сего́, и ца́ри звездо́ю наставля́я звездоблюсти́тели влече́т. Тем воспева́юще воспои́м: да благослови́т тварь вся Го́спода и превозно́сит во вся ве́ки.
Песнь 9
Ирмос: Та́инство стра́нное ви́жу и пресла́вное; не́бо, верте́п; Престо́л Херуви́мский, Де́ву; я́сли, вмести́лище, в ни́хже возлеже́ невмести́мый Христо́с Бог, Его́же воспева́юще велича́ем.
ПРИПЕВ: Сла́ва, Го́споди, Свято́му Рождеству́ Твоему́.
Изря́дное тече́ние зря́ще волсви́ необы́чныя но́выя звезды́ новосия́ющия, небеса́ просвеща́ющия, Христа́ Царя́ зна́менующия на земли́ ро́ждшагося в Вифлее́ме на спасе́ние на́ше.
ПРИПЕВ: Сла́ва, Го́споди, Свято́му Рождеству́ Твоему́.
Новорожде́нное, волхво́м глаго́лющим, Отроча́ Царь, Его́же звезда́ яви́, где есть? Тому́ бо поклони́тся приидо́хом; яря́ся Ирод смуща́шеся, Христа́ уби́ти, богобо́рец шата́яся.
Слава: Испыта́ Ирод вре́мя звезды́, ея́же вожде́нием волсви́ в Вифлее́ме покланя́хуся Христу́ с да́ры; е́юже ко оте́честву наставля́еми, лю́таго детоуби́йцу оста́виша пору́гана.
И ныне: Испыта́ Ирод вре́мя звезды́, ея́же вожде́нием волсви́ в Вифлее́ме покланя́хуся Христу́ с да́ры; е́юже ко оте́честву наставля́еми, лю́таго детоуби́йцу оста́виша пору́гана.
ЗАДОСТОЙНИК
Люби́ти у́бо нам, я́ко безбе́дное стра́хом, удо́бее молча́ние, любо́вию же Де́во, пе́сни тка́ти спротяже́нно сложе́нныя, неудо́бно есть: но и Ма́ти, си́лу, ели́ко есть произволе́ние, даждь.
Следующая публикация
Нет комментариев